Tipitaka2500 tipitaka2500.github.io

1.1.2.2 Vinītavatthu

1.2.2.2. วินีตวัต์ถุ

Mahāvibhaṅga

Pārājikakaṇḍa

Dutiyapārājikasikkhāpada

Vinītavatthu

132. 292 Tena kho pana samayena chabbaggiyā bhikkhū rajakattharaṇaṁ gantvā rajakabhaṇḍikaṁ avahariṁsu. Tesaṁ kukkuccaṁ ahosi— “bhagavatā sikkhāpadaṁ paññattaṁ. Kacci nu kho mayaṁ pārājikaṁ āpattiṁ āpannā”ti. Bhagavato etamatthaṁ ārocesuṁ. “Āpattiṁ tumhe, bhikkhave, āpannā pārājikan”ti. (1)

293 Tena kho pana samayena aññataro bhikkhu rajakattharaṇaṁ gantvā mahagghaṁ dussaṁ passitvā theyyacittaṁ uppādesi. Tassa kukkuccaṁ ahosi— “bhagavatā sikkhāpadaṁ paññattaṁ, kacci nu kho ahaṁ pārājikaṁ āpattiṁ āpanno”ti? Bhagavato etamatthaṁ ārocesi. “Anāpatti, bhikkhu, cittuppāde”ti. (2)

294 Tena kho pana samayena aññataro bhikkhu rajakattharaṇaṁ gantvā mahagghaṁ dussaṁ passitvā theyyacitto āmasi. Tassa kukkuccaṁ ahosi…pe… “anāpatti, bhikkhu, pārājikassa. Āpatti dukkaṭassā”ti. (3)

295 Tena kho pana samayena aññataro bhikkhu rajakattharaṇaṁ gantvā mahagghaṁ dussaṁ passitvā theyyacitto phandāpesi. Tassa kukkuccaṁ ahosi…pe… “anāpatti, bhikkhu, pārājikassa. Āpatti thullaccayassā”ti. (4)

296 Tena kho pana samayena aññataro bhikkhu rajakattharaṇaṁ gantvā mahagghaṁ dussaṁ passitvā theyyacitto ṭhānā cāvesi. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (5)

133. 297 Tena kho pana samayena aññataro piṇḍacāriko bhikkhu mahagghaṁ uttarattharaṇaṁ passitvā theyyacittaṁ uppādesi…pe… theyyacitto āmasi…pe… theyyacitto phandāpesi…pe… theyyacitto ṭhānā cāvesi. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (6--9)

134. 298 Tena kho pana samayena aññataro bhikkhu divā bhaṇḍaṁ passitvā nimittaṁ akāsi— “rattiṁ avaharissāmī”ti. So taṁ maññamāno taṁ avahari…pe… taṁ maññamāno aññaṁ avahari…pe… aññaṁ maññamāno taṁ avahari…pe… aññaṁ maññamāno aññaṁ avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (10--13)

299 Tena kho pana samayena aññataro bhikkhu divā bhaṇḍaṁ passitvā nimittaṁ akāsi— “rattiṁ avaharissāmī”ti. So taṁ maññamāno attano bhaṇḍaṁ avahari. Tassa kukkuccaṁ ahosi…pe… “anāpatti, bhikkhu, pārājikassa. Āpatti dukkaṭassā”ti. (14)

300 Tena kho pana samayena aññataro bhikkhu aññassa bhaṇḍaṁ haranto sīse bhāraṁ theyyacitto āmasi…pe… theyyacitto phandāpesi…pe… theyyacitto khandhaṁ oropesi…pe… khandhe bhāraṁ theyyacitto āmasi…pe… theyyacitto phandāpesi…pe… theyyacitto kaṭiṁ oropesi…pe… kaṭiyā bhāraṁ theyyacitto āmasi…pe… theyyacitto phandāpesi…pe… theyyacitto hatthena aggahesi…pe… hatthe bhāraṁ theyyacitto bhūmiyaṁ nikkhipi…pe… theyyacitto bhūmito aggahesi. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (15--25)

135. 301 Tena kho pana samayena aññataro bhikkhu ajjhokāse cīvaraṁ pattharitvā vihāraṁ pāvisi. Aññataro bhikkhu— “māyidaṁ cīvaraṁ nassī”ti, paṭisāmesi. So nikkhamitvā taṁ bhikkhuṁ pucchi— “āvuso, mayhaṁ cīvaraṁ kena avahaṭan”ti? So evamāha— “mayā avahaṭan”ti. “So taṁ ādiyi, assamaṇosi tvan”ti. Tassa kukkuccaṁ ahosi…pe… . Bhagavato etamatthaṁ ārocesi. “Kiṁcitto tvaṁ, bhikkhū”ti? “Niruttipatho ahaṁ, bhagavā”ti. “Anāpatti, bhikkhu, niruttipathe”ti. (26)

302 Tena kho pana samayena aññataro bhikkhu pīṭhe cīvaraṁ nikkhipitvā. Pīṭhe nisīdanaṁ nikkhipitvā… heṭṭhāpīṭhe pattaṁ nikkhipitvā vihāraṁ pāvisi. Aññataro bhikkhu— “māyaṁ patto nassī”ti paṭisāmesi. So nikkhamitvā taṁ bhikkhuṁ pucchi— “āvuso, mayhaṁ patto kena avahaṭo”ti? So evamāha— “mayā avahaṭo”ti. So taṁ ādiyi, “assamaṇosi tvan”ti. Tassa kukkuccaṁ ahosi…pe… “anāpatti, bhikkhu, niruttipathe”ti. (27--29)

303 Tena kho pana samayena aññatarā bhikkhunī vatiyā cīvaraṁ pattharitvā vihāraṁ pāvisi. Aññatarā bhikkhunī— “māyidaṁ cīvaraṁ nassī”ti paṭisāmesi. Sā nikkhamitvā taṁ bhikkhuniṁ pucchi— “ayye, mayhaṁ cīvaraṁ kena avahaṭan”ti? Sā evamāha— “mayā avahaṭan”ti. “Sā taṁ ādiyi, assamaṇīsi tvan”ti. Tassā kukkuccaṁ ahosi…pe… . Atha kho sā bhikkhunī bhikkhunīnaṁ etamatthaṁ ārocesi. Bhikkhuniyo bhikkhūnaṁ etamatthaṁ ārocesuṁ. Bhikkhū bhagavato etamatthaṁ ārocesuṁ…pe… “anāpatti, bhikkhave, niruttipathe”ti. (30)

136. 304 Tena kho pana samayena aññataro bhikkhu vātamaṇḍalikāya ukkhittaṁ sāṭakaṁ passitvā sāmikānaṁ dassāmīti, aggahesi. Sāmikā taṁ bhikkhuṁ codesuṁ— “assamaṇosi tvan”ti. Tassa kukkuccaṁ ahosi…pe… “kiṁcitto tvaṁ, bhikkhū”ti? “Atheyyacitto ahaṁ, bhagavā”ti. “Anāpatti, bhikkhu, atheyyacittassā”ti. (31)

305 Tena kho pana samayena aññataro bhikkhu vātamaṇḍalikāya ukkhittaṁ veṭhanaṁ passitvā— “pure sāmikā passantī”ti theyyacitto aggahesi. Sāmikā taṁ bhikkhuṁ codesuṁ— “assamaṇosi tvan”ti. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (32)

137. 306 Tena kho pana samayena aññataro bhikkhu susānaṁ gantvā abhinne sarīre paṁsukūlaṁ aggahesi. Tasmiñca sarīre peto adhivattho hoti. Atha kho so peto taṁ bhikkhuṁ etadavoca— “mā, bhante, mayhaṁ sāṭakaṁ aggahesī”ti. So bhikkhu anādiyanto agamāsi. Atha kho taṁ sarīraṁ uṭṭhahitvā tassa bhikkhuno piṭṭhito piṭṭhito anubandhi. Atha kho so bhikkhu vihāraṁ pavisitvā dvāraṁ thakesi. Atha kho taṁ sarīraṁ tattheva paripati. Tassa kukkuccaṁ ahosi…pe… “anāpatti, bhikkhu, pārājikassa. Na ca, bhikkhave, abhinne sarīre paṁsukūlaṁ gahetabbaṁ. Yo gaṇheyya, āpatti dukkaṭassā”ti. (33)

138. 307 Tena kho pana samayena aññataro bhikkhu saṁghassa cīvare bhājīyamāne theyyacitto kusaṁ saṅkāmetvā cīvaraṁ aggahesi. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (34)

139. 308 Tena kho pana samayena āyasmā ānando jantāghare aññatarassa bhikkhuno antaravāsakaṁ attano maññamāno nivāsesi. Atha kho so bhikkhu āyasmantaṁ ānandaṁ etadavoca— “kissa me tvaṁ, āvuso ānanda, antaravāsakaṁ nivāsesī”ti? “Sakasaññī ahaṁ, āvuso”ti. Bhagavato etamatthaṁ ārocesuṁ. “Anāpatti, bhikkhave, sakasaññissā”ti. (35)

140. 309 Tena kho pana samayena sambahulā bhikkhū gijjhakūṭā pabbatā orohantā sīhavighāsaṁ passitvā pacāpetvā paribhuñjiṁsu. Tesaṁ kukkuccaṁ ahosi…pe… “anāpatti, bhikkhave, sīhavighāse”ti. (36)

310 Tena kho pana samayena sambahulā bhikkhū gijjhakūṭā pabbatā orohantā byagghavighāsaṁ passitvā… dīpivighāsaṁ passitvā… taracchavighāsaṁ passitvā… kokavighāsaṁ passitvā pacāpetvā paribhuñjiṁsu. Tesaṁ kukkuccaṁ ahosi…pe… “anāpatti, bhikkhave, tiracchānagatapariggahe”ti. (37--40)

141. 311 Tena kho pana samayena aññataro bhikkhu saṁghassa odane bhājīyamāne— “aparassa bhāgaṁ dehī”ti amūlakaṁ aggahesi. Tassa kukkuccaṁ ahosi…pe… “anāpatti, bhikkhu, pārājikassa. Āpatti sampajānamusāvāde pācittiyassā”ti. (41)

312 Tena kho pana samayena aññataro bhikkhu saṁghassa khādanīye bhājīyamāne… saṁghassa pūve bhājīyamāne… saṁghassa ucchumhi bhājīyamāne… saṁghassa timbarūsake bhājīyamāne— “aparassa bhāgaṁ dehī”ti amūlakaṁ aggahesi. Tassa kukkuccaṁ ahosi…pe… . “Anāpatti, bhikkhu, pārājikassa. Āpatti sampajānamusāvāde pācittiyassā”ti. (42--45)

142. 313 Tena kho pana samayena aññataro bhikkhu dubbhikkhe odanīyagharaṁ pavisitvā pattapūraṁ odanaṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (46)

314 Tena kho pana samayena aññataro bhikkhu dubbhikkhe sūnagharaṁ[84] pavisitvā pattapūraṁ maṁsaṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (47)

315 Tena kho pana samayena aññataro bhikkhu dubbhikkhe pūvagharaṁ pavisitvā pattapūraṁ pūvaṁ theyyacitto avahari…pe… pattapūrā sakkhaliyo theyyacitto avahari…pe… pattapūre modake theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (48--50)

143. 316 Tena kho pana samayena aññataro bhikkhu divā parikkhāraṁ passitvā nimittaṁ akāsi— “rattiṁ avaharissāmī”ti. So taṁ maññamāno taṁ avahari…pe… taṁ maññamāno aññaṁ avahari…pe… aññaṁ maññamāno taṁ avahari…pe… aññaṁ maññamāno aññaṁ avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (51--54)

317 Tena kho pana samayena aññataro bhikkhu divā parikkhāraṁ passitvā nimittaṁ akāsi— “rattiṁ avaharissāmī”ti. So taṁ maññamāno attano parikkhāraṁ avahari. Tassa kukkuccaṁ ahosi…pe… “anāpatti, bhikkhu, pārājikassa. Āpatti dukkaṭassā”ti. (55)

144. 318 Tena kho pana samayena aññataro bhikkhu pīṭhe thavikaṁ passitvā— “ito gaṇhanto pārājiko bhavissāmī”ti saha pīṭhakena saṅkāmetvā aggahesi. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (56)

319 Tena kho pana samayena aññataro bhikkhu saṁghassa bhisiṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (57)

145. 320 Tena kho pana samayena aññataro bhikkhu cīvaravaṁse cīvaraṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (58)

321 Tena kho pana samayena aññataro bhikkhu vihāre cīvaraṁ avaharitvā— “ito nikkhamanto pārājiko bhavissāmī”ti vihārā na nikkhami[86]…pe… bhagavato etamatthaṁ ārocesuṁ. “Nikkhami vā so, bhikkhave, moghapuriso na vā nikkhami, āpatti pārājikassā”ti. (59) [85]

146. 322 Tena kho pana samayena dve bhikkhū sahāyakā honti. Eko bhikkhu gāmaṁ piṇḍāya pāvisi. Dutiyo bhikkhu saṁghassa khādanīye bhājīyamāne sahāyakassa bhāgaṁ gahetvā tassa vissasanto paribhuñji. So jānitvā taṁ codesi— “assamaṇosi tvan”ti. Tassa kukkuccaṁ ahosi…pe… “kiṁcitto tvaṁ, bhikkhū”ti? “Vissāsaggāho ahaṁ, bhagavā”ti. “Anāpatti, bhikkhu, vissāsaggāhe”ti. (60)

147. 323 Tena kho pana samayena sambahulā bhikkhū cīvarakammaṁ karonti. Saṁghassa khādanīye bhājīyamāne sabbesaṁ paṭivisā āharitvā upanikkhittā honti. Aññataro bhikkhu aññatarassa bhikkhuno paṭivisaṁ attano maññamāno paribhuñji. So jānitvā taṁ codesi— “assamaṇosi tvan”ti. Tassa kukkuccaṁ ahosi…pe… “kiṁcitto tvaṁ, bhikkhū”ti? “Sakasaññī ahaṁ, bhagavā”ti. “Anāpatti, bhikkhu, sakasaññissā”ti. (61)

324 Tena kho pana samayena sambahulā bhikkhū cīvarakammaṁ karonti. Saṁghassa khādanīye bhājīyamāne aññatarassa bhikkhuno pattena aññatarassa bhikkhuno paṭiviso āharitvā upanikkhitto hoti. Pattasāmiko bhikkhu attano maññamāno paribhuñji. So jānitvā taṁ codesi— “assamaṇosi tvan”ti. Tassa kukkuccaṁ ahosi…pe… “anāpatti, bhikkhu, sakasaññissā”ti. (62)

148. 325 Tena kho pana samayena ambacorakā ambaṁ pātetvā bhaṇḍikaṁ ādāya agamaṁsu. Sāmikā te corake anubandhiṁsu. Corakā sāmike passitvā bhaṇḍikaṁ pātetvā palāyiṁsu. Bhikkhū paṁsukūlasaññino paṭiggahāpetvā paribhuñjiṁsu. Sāmikā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… bhagavato etamatthaṁ ārocesuṁ. “Kiṁcittā tumhe, bhikkhave”ti? “Paṁsukūlasaññino mayaṁ, bhagavā”ti. “Anāpatti, bhikkhave, paṁsukūlasaññissā”ti. (63)

326 Tena kho pana samayena jambucorakā… labujacorakā… panasacorakā… tālapakkacorakā… ucchucorakā… timbarūsakacorakā timbarūsake uccinitvā bhaṇḍikaṁ ādāya agamaṁsu. Sāmikā te corake anubandhiṁsu. Corakā sāmike passitvā bhaṇḍikaṁ pātetvā palāyiṁsu. Bhikkhū paṁsukūlasaññino paṭiggahāpetvā paribhuñjiṁsu. Sāmikā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… “anāpatti, bhikkhave, paṁsukūlasaññissā”ti. (64--69)

327 Tena kho pana samayena ambacorakā ambaṁ pātetvā bhaṇḍikaṁ ādāya agamaṁsu. Sāmikā te corake anubandhiṁsu. Corakā sāmike passitvā bhaṇḍikaṁ pātetvā palāyiṁsu. Bhikkhū— “pure sāmikā passantī”ti, theyyacittā paribhuñjiṁsu. Sāmikā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… “āpattiṁ tumhe, bhikkhave, āpannā pārājikan”ti. (70)

328 Tena kho pana samayena jambucorakā… labujacorakā… panasacorakā… tālapakkacorakā… ucchucorakā… timbarūsakacorakā timbarūsake uccinitvā bhaṇḍikaṁ ādāya agamaṁsu. Sāmikā te corake anubandhiṁsu. Corakā sāmike passitvā bhaṇḍikaṁ pātetvā palāyiṁsu. Bhikkhū— “pure sāmikā passantī”ti, theyyacittā paribhuñjiṁsu. Sāmikā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… “āpattiṁ tumhe, bhikkhave, āpannā pārājikan”ti. (71--76)

329 Tena kho pana samayena aññataro bhikkhu saṁghassa ambaṁ theyyacitto avahari… saṁghassa jambuṁ… saṁghassa labujaṁ… saṁghassa panasaṁ… saṁghassa tālapakkaṁ… saṁghassa ucchuṁ… saṁghassa timbarūsakaṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (77--83)

149. 330 Tena kho pana samayena aññataro bhikkhu pupphārāmaṁ gantvā ocitaṁ pupphaṁ pañcamāsagghanakaṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (84)

331 Tena kho pana samayena aññataro bhikkhu pupphārāmaṁ gantvā pupphaṁ ocinitvā pañcamāsagghanakaṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (85)

150. 332 Tena kho pana samayena aññataro bhikkhu gāmakaṁ gacchanto aññataraṁ bhikkhuṁ etadavoca— “āvuso, tuyhaṁ upaṭṭhākakulaṁ vutto vajjemī”ti. So gantvā ekaṁ sāṭakaṁ āharāpetvā attanā paribhuñji. So jānitvā taṁ codesi— “assamaṇosi tvan”ti. Tassa kukkuccaṁ ahosi…pe… “anāpatti, bhikkhu, pārājikassa. Na ca, bhikkhave, vutto vajjemīti vattabbo. Yo vadeyya, āpatti dukkaṭassā”ti. (86)

333 Tena kho pana samayena aññataro bhikkhu gāmakaṁ gacchati. Aññataro bhikkhu taṁ bhikkhuṁ etadavoca— “āvuso, mayhaṁ upaṭṭhākakulaṁ vutto vajjehī”ti. So gantvā yugasāṭakaṁ āharāpetvā ekaṁ attanā paribhuñji, ekaṁ tassa bhikkhuno adāsi. So jānitvā taṁ codesi— “assamaṇosi tvan”ti. Tassa kukkuccaṁ ahosi…pe… “anāpatti, bhikkhu, pārājikassa. Na ca, bhikkhave, vutto vajjehīti vattabbo. Yo vadeyya, āpatti dukkaṭassā”ti. (87)

334 Tena kho pana samayena aññataro bhikkhu gāmakaṁ gacchanto aññataraṁ bhikkhuṁ etadavoca— “āvuso, tuyhaṁ upaṭṭhākakulaṁ vutto vajjemī”ti. Sopi evamāha— “vutto vajjehī”ti. So gantvā āḷhakaṁ sappiṁ tulaṁ guḷaṁ doṇaṁ taṇḍulaṁ āharāpetvā attanā paribhuñji. So jānitvā taṁ codesi— “assamaṇosi tvan”ti. Tassa kukkuccaṁ ahosi…pe… “anāpatti, bhikkhu, pārājikassa. Na ca, bhikkhave, vutto vajjemīti vattabbo, na ca vutto vajjehīti vattabbo. Yo vadeyya, āpatti dukkaṭassā”ti. (88)

151. 335 Tena kho pana samayena aññataro puriso mahagghaṁ maṇiṁ ādāya aññatarena bhikkhunā saddhiṁ addhānamaggappaṭipanno hoti. Atha kho so puriso suṅkaṭṭhānaṁ passitvā tassa bhikkhuno ajānantassa thavikāya maṇiṁ pakkhipitvā suṅkaṭṭhānaṁ atikkamitvā aggahesi. Tassa kukkuccaṁ ahosi…pe… “kiṁcitto tvaṁ, bhikkhū”ti? “Nāhaṁ, bhagavā, jānāmī”ti. “Anāpatti, bhikkhu, ajānantassā”ti. (89)

336 Tena kho pana samayena aññataro puriso mahagghaṁ maṇiṁ ādāya aññatarena bhikkhunā saddhiṁ addhānamaggappaṭipanno hoti. Atha kho so puriso suṅkaṭṭhānaṁ passitvā gilānālayaṁ karitvā attano bhaṇḍikaṁ tassa bhikkhuno adāsi. Atha kho so puriso suṅkaṭṭhānaṁ atikkamitvā taṁ bhikkhuṁ etadavoca— “āhara me, bhante, bhaṇḍikaṁ; nāhaṁ akallako”ti. “Kissa pana tvaṁ, āvuso, evarūpaṁ akāsī”ti? Atha kho so puriso tassa bhikkhuno etamatthaṁ ārocesi. Tassa kukkuccaṁ ahosi…pe… “kiṁcitto tvaṁ, bhikkhū”ti? “Nāhaṁ, bhagavā, jānāmī”ti. “Anāpatti, bhikkhu, ajānantassā”ti. (90)

152. 337 Tena kho pana samayena aññataro bhikkhu satthena saddhiṁ addhānamaggappaṭipanno hoti. Aññataro puriso taṁ bhikkhuṁ āmisena upalāpetvā suṅkaṭṭhānaṁ passitvā mahagghaṁ maṇiṁ tassa bhikkhuno adāsi— “imaṁ, bhante, maṇiṁ suṅkaṭṭhānaṁ atikkāmehī”ti. Atha kho so bhikkhu taṁ maṇiṁ suṅkaṭṭhānaṁ atikkāmesi. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (91)

153. 338 Tena kho pana samayena aññataro bhikkhu pāse bandhaṁ sūkaraṁ kāruññena muñci. Tassa kukkuccaṁ ahosi…pe… “kiṁcitto tvaṁ, bhikkhū”ti? “Kāruññādhippāyo ahaṁ, bhagavā”ti. “Anāpatti, bhikkhu, kāruññādhippāyassā”ti. (92)

339 Tena kho pana samayena aññataro bhikkhu pāse bandhaṁ sūkaraṁ— “pure sāmikā passantī”ti, theyyacitto muñci. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (93)

340 Tena kho pana samayena aññataro bhikkhu pāse bandhaṁ migaṁ kāruññena muñci… pāse bandhaṁ migaṁ— “pure sāmikā passantī”ti, theyyacitto muñci… kumine bandhe macche kāruññena muñci… kumine bandhe macche— “pure sāmikā passantī”ti theyyacitto muñci. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (94--97)

341 Tena kho pana samayena aññataro bhikkhu yāne bhaṇḍaṁ passitvā— “ito gaṇhanto pārājiko bhavissāmī”ti, atikkamitvā pavaṭṭetvā[87] aggahesi. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (98)

342 Tena kho pana samayena aññataro bhikkhu kulalena ukkhittaṁ maṁsapesiṁ— “sāmikānaṁ dassāmī”ti aggahesi. Sāmikā taṁ bhikkhuṁ codesuṁ— “assamaṇosi tvan”ti. Tassa kukkuccaṁ ahosi…pe… “anāpatti, bhikkhu, atheyyacittassā”ti. (99)

343 Tena kho pana samayena aññataro bhikkhu kulalena ukkhittaṁ maṁsapesiṁ— “pure sāmikā passantī”ti, theyyacitto aggahesi. Sāmikā taṁ bhikkhuṁ codesuṁ— “assamaṇosi tvan”ti. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (100)

154. 344 Tena kho pana samayena manussā uḷumpaṁ bandhitvā aciravatiyā nadiyā osārenti[88]. Bandhane chinne kaṭṭhāni vippakiṇṇāni agamaṁsu. Bhikkhū paṁsukūlasaññino uttāresuṁ. Sāmikā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… “anāpatti, bhikkhave, paṁsukūlasaññissā”ti. (101)

345 Tena kho pana samayena manussā uḷumpaṁ bandhitvā aciravatiyā nadiyā osārenti. Bandhane chinne kaṭṭhāni vippakiṇṇāni agamaṁsu. Bhikkhū— “pure sāmikā passantī”ti, theyyacittā uttāresuṁ. Sāmikā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… “āpattiṁ tumhe, bhikkhave, āpannā pārājikan”ti. (102)

346 Tena kho pana samayena aññataro gopālako rukkhe sāṭakaṁ ālaggetvā uccāraṁ agamāsi. Aññataro bhikkhu paṁsukūlasaññī aggahesi. Atha kho so gopālako taṁ bhikkhuṁ codesi— “assamaṇosi tvan”ti. Tassa kukkuccaṁ ahosi…pe… “anāpatti, bhikkhu, paṁsukūlasaññissā”ti. (103)

347 Tena kho pana samayena aññatarassa bhikkhuno nadiṁ tarantassa rajakānaṁ hatthato muttaṁ sāṭakaṁ pāde laggaṁ hoti. So bhikkhu— “sāmikānaṁ dassāmī”ti aggahesi. Sāmikā taṁ bhikkhuṁ codesuṁ— “assamaṇosi tvan”ti. Tassa kukkuccaṁ ahosi…pe… “anāpatti, bhikkhu, atheyyacittassā”ti. (104)

348 Tena kho pana samayena aññatarassa bhikkhuno nadiṁ tarantassa rajakānaṁ hatthato muttaṁ sāṭakaṁ pāde laggaṁ hoti. So bhikkhu— “pure sāmikā passantī”ti, theyyacitto aggahesi. Sāmikā taṁ bhikkhuṁ codesuṁ— “assamaṇosi tvan”ti. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (105)

155. 349 Tena kho pana samayena aññataro bhikkhu sappikumbhiṁ passitvā thokaṁ thokaṁ paribhuñji. Tassa kukkuccaṁ ahosi…pe… “anāpatti, bhikkhu, pārājikassa; āpatti dukkaṭassā”ti. (106)

350 Tena kho pana samayena sambahulā bhikkhū saṁvidahitvā agamaṁsu— “bhaṇḍaṁ avaharissāmā”ti. Eko bhaṇḍaṁ avahari. Te evamāhaṁsu— “na mayaṁ pārājikā. Yo avahaṭo so pārājiko”ti. Bhagavato etamatthaṁ ārocesuṁ… “āpattiṁ tumhe, bhikkhave, āpannā pārājikan”ti. (107)

351 Tena kho pana samayena sambahulā bhikkhū saṁvidahitvā bhaṇḍaṁ avaharitvā bhājesuṁ. Tehi bhājīyamāne ekamekassa paṭiviso na pañcamāsako pūri. Te evamāhaṁsu— “na mayaṁ pārājikā”ti. Bhagavato etamatthaṁ ārocesuṁ. “Āpattiṁ tumhe, bhikkhave, āpannā pārājikan”ti. (108)

352 Tena kho pana samayena aññataro bhikkhu sāvatthiyaṁ dubbhikkhe āpaṇikassa taṇḍulamuṭṭhiṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (109)

353 Tena kho pana samayena aññataro bhikkhu sāvatthiyaṁ dubbhikkhe āpaṇikassa muggamuṭṭhiṁ… māsamuṭṭhiṁ… tilamuṭṭhiṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (110--112)

354 Tena kho pana samayena sāvatthiyaṁ andhavane corakā gāviṁ hantvā maṁsaṁ khāditvā sesakaṁ paṭisāmetvā agamaṁsu. Bhikkhū paṁsukūlasaññino paṭiggahāpetvā[89] paribhuñjiṁsu. Corakā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… “anāpatti, bhikkhave, paṁsukūlasaññissā”ti. (113)

355 Tena kho pana samayena sāvatthiyaṁ andhavane corakā sūkaraṁ hantvā maṁsaṁ khāditvā sesakaṁ paṭisāmetvā agamaṁsu. Bhikkhū paṁsukūlasaññino paṭiggahāpetvā paribhuñjiṁsu. Corakā te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… “anāpatti, bhikkhave, paṁsukūlasaññissā”ti. (114)

356 Tena kho pana samayena aññataro bhikkhu tiṇakkhettaṁ gantvā lūtaṁ tiṇaṁ pañcamāsagghanakaṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (115)

357 Tena kho pana samayena aññataro bhikkhu tiṇakkhettaṁ gantvā tiṇaṁ lāyitvā pañcamāsagghanakaṁ theyyacitto avahari. Tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (116)

156. 358 Tena kho pana samayena āgantukā bhikkhū saṁghassa ambaṁ bhājāpetvā paribhuñjiṁsu. Āvāsikā bhikkhū te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… bhagavato etamatthaṁ ārocesuṁ. “Kiṁcittā tumhe, bhikkhave”ti? “Paribhogatthāya mayaṁ, bhagavā”ti. “Anāpatti, bhikkhave, paribhogatthāyā”ti. (117) [90]

359 Tena kho pana samayena āgantukā bhikkhū saṁghassa jambuṁ… saṁghassa labujaṁ… saṁghassa panasaṁ… saṁghassa tālapakkaṁ… saṁghassa ucchuṁ… saṁghassa timbarūsakaṁ bhājāpetvā paribhuñjiṁsu. Āvāsikā bhikkhū te bhikkhū codesuṁ— “assamaṇāttha tumhe”ti. Tesaṁ kukkuccaṁ ahosi…pe… “anāpatti, bhikkhave, paribhogatthāyā”ti. (118--123)

360 Tena kho pana samayena ambapālakā bhikkhūnaṁ ambaphalaṁ denti. Bhikkhū— “gopetuṁ ime issarā, nayime dātun”ti, kukkuccāyantā na paṭiggaṇhanti. Bhagavato etamatthaṁ ārocesuṁ. “Anāpatti, bhikkhave, gopakassa dāne”ti. (124)

361 Tena kho pana samayena jambupālakā… labujapālakā… panasapālakā… tālapakkapālakā… ucchupālakā… timbarūsakapālakā bhikkhūnaṁ timbarūsakaṁ denti. Bhikkhū— “gopetuṁ ime issarā, nayime dātun”ti, kukkuccāyantā na paṭiggaṇhanti. Bhagavato etamatthaṁ ārocesuṁ. “Anāpatti, bhikkhave, gopakassa dāne”ti. (125--130)

362 Tena kho pana samayena aññataro bhikkhu saṁghassa dāruṁ tāvakālikaṁ haritvā attano vihārassa kuṭṭaṁ upatthambhesi. Bhikkhū taṁ bhikkhuṁ codesuṁ— “assamaṇosi tvan”ti. Tassa kukkuccaṁ ahosi. Bhagavato etamatthaṁ ārocesi. “Kiṁcitto tvaṁ, bhikkhū”ti? “Tāvakāliko ahaṁ, bhagavā”ti. “Anāpatti, bhikkhu, tāvakālike”ti. (131)

363 Tena kho pana samayena aññataro bhikkhu saṁghassa udakaṁ theyyacitto avahari… saṁghassa mattikaṁ theyyacitto avahari… saṁghassa puñjakitaṁ tiṇaṁ theyyacitto avahari… tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (132--134)

364 Tena kho pana samayena aññataro bhikkhu saṁghassa puñjakitaṁ tiṇaṁ theyyacitto jhāpesi. Tassa kukkuccaṁ ahosi…pe… “anāpatti, bhikkhu, pārājikassa. Āpatti dukkaṭassā”ti. (135)

365 Tena kho pana samayena aññataro bhikkhu saṁghassa mañcaṁ theyyacitto avahari… tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (136)

366 Tena kho pana samayena aññataro bhikkhu saṁghassa pīṭhaṁ… saṁghassa bhisiṁ… saṁghassa bibbohanaṁ[91]… saṁghassa kavāṭaṁ… saṁghassa ālokasandhiṁ… saṁghassa gopānasiṁ theyyacitto avahari… tassa kukkuccaṁ ahosi…pe… “āpattiṁ tvaṁ, bhikkhu, āpanno pārājikan”ti. (137--142)

157. 367 [92] Tena kho pana samayena bhikkhū aññatarassa upāsakassa vihāraparibhogaṁ senāsanaṁ aññatra paribhuñjanti. Atha kho so upāsako ujjhāyati khiyyati vipāceti— “kathañhi nāma bhadantā aññatra paribhogaṁ aññatra paribhuñjissantī”ti. Bhagavato etamatthaṁ ārocesuṁ. “Na, bhikkhave, aññatra paribhogo aññatra paribhuñjitabbo. Yo paribhuñjeyya, āpatti dukkaṭassā”ti. (143)

368 [93] Tena kho pana samayena bhikkhū uposathaggampi sannisajjampi harituṁ kukkuccāyantā chamāyaṁ nisīdanti. Gattānipi cīvarānipi paṁsukitāni honti. Bhagavato etamatthaṁ ārocesuṁ. “Anujānāmi, bhikkhave, tāvakālikaṁ haritun”ti. (144)

369 Tena kho pana samayena campāyaṁ thullanandāya bhikkhuniyā antevāsinī bhikkhunī thullanandāya bhikkhuniyā upaṭṭhākakulaṁ gantvā— “ayyā icchati tekaṭulayāguṁ pātun”ti, pacāpetvā haritvā attanā paribhuñji. Sā jānitvā taṁ codesi— “assamaṇīsi tvan”ti. Tassā kukkuccaṁ ahosi…pe… . Atha kho sā bhikkhunī bhikkhunīnaṁ etamatthaṁ ārocesi. Bhikkhuniyo bhikkhūnaṁ etamatthaṁ ārocesuṁ. Bhikkhū bhagavato etamatthaṁ ārocesuṁ. “Anāpatti, bhikkhave, pārājikassa; āpatti sampajānamusāvāde pācittiyassā”ti. (145)

370 Tena kho pana samayena rājagahe thullanandāya bhikkhuniyā antevāsinī bhikkhunī thullanandāya bhikkhuniyā upaṭṭhākakulaṁ gantvā— “ayyā icchati madhugoḷakaṁ khāditun”ti, pacāpetvā haritvā attanā paribhuñji. Sā jānitvā taṁ codesi— “assamaṇīsi tvan”ti. Tassā kukkuccaṁ ahosi…pe… “anāpatti, bhikkhave, pārājikassa; āpatti sampajānamusāvāde pācittiyassā”ti. (146)

158. 371 Tena kho pana samayena vesāliyaṁ āyasmato ajjukassa upaṭṭhākassa gahapatino dve dārakā honti— putto ca bhāgineyyo ca. Atha kho so gahapati āyasmantaṁ ajjukaṁ etadavoca— “imaṁ, bhante, okāsaṁ yo imesaṁ dvinnaṁ dārakānaṁ saddho hoti pasanno tassa ācikkheyyāsī”ti. Tena kho pana samayena tassa gahapatino bhāgineyyo saddho hoti pasanno. Atha kho āyasmā ajjuko taṁ okāsaṁ tassa dārakassa ācikkhi. So tena sāpateyyena kuṭumbañca saṇṭhapesi dānañca paṭṭhapesi. Atha kho tassa gahapatino putto āyasmantaṁ ānandaṁ etadavoca— “ko nu kho, bhante ānanda, pituno dāyajjo— putto vā bhāgineyyo vā”ti? “Putto kho, āvuso, pituno dāyajjo”ti. “Ayaṁ, bhante, ayyo ajjuko amhākaṁ sāpateyyaṁ amhākaṁ methunakassa ācikkhī”ti. “Assamaṇo, āvuso, āyasmā ajjuko”ti. Atha kho āyasmā ajjuko āyasmantaṁ ānandaṁ etadavoca— “dehi me, āvuso ānanda, vinicchayan”ti. Tena kho pana samayena āyasmā upāli āyasmato ajjukassa pakkho hoti. Atha kho āyasmā upāli āyasmantaṁ ānandaṁ etadavoca— “yo nu kho, āvuso ānanda, sāmikena ‘imaṁ okāsaṁ itthannāmassa ācikkheyyāsī’ti vutto tassa ācikkhati, kiṁ so āpajjatī”ti? “Na, bhante, kiñci āpajjati, antamaso dukkaṭamattampī”ti. “Ayaṁ, āvuso, āyasmā ajjuko sāmikena— ‘imaṁ okāsaṁ itthannāmassa ācikkhā’ti vutto tassa ācikkhati; anāpatti, āvuso, āyasmato ajjukassā”ti. (147) [94]

159. 372 Tena kho pana samayena bārāṇasiyaṁ āyasmato pilindavacchassa upaṭṭhākakulaṁ corehi upaddutaṁ hoti. Dve ca dārakā nītā honti. Atha kho āyasmā pilindavaccho te dārake iddhiyā ānetvā pāsāde ṭhapesi. Manussā te dārake passitvā— “ayyassāyaṁ pilindavacchassa iddhānubhāvo”ti, āyasmante pilindavacche abhippasīdiṁsu. Bhikkhū ujjhāyanti khiyyanti vipācenti— “kathañhi nāma āyasmā pilindavaccho corehi nīte dārake ānessatī”ti. Bhagavato etamatthaṁ ārocesuṁ. “Anāpatti, bhikkhave, iddhimassa[95] iddhivisaye”ti. (148)

160. 373 Tena kho pana samayena dve bhikkhū sahāyakā honti— paṇḍuko ca kapilo ca. Eko gāmake viharati, eko kosambiyaṁ. Atha kho tassa bhikkhuno gāmakā kosambiṁ gacchantassa antarāmagge nadiṁ tarantassa sūkarikānaṁ hatthato muttā medavaṭṭi pāde laggā hoti. So bhikkhu— “sāmikānaṁ dassāmī”ti aggahesi. Sāmikā taṁ bhikkhuṁ codesuṁ— “assamaṇosi tvan”ti. Taṁ uttiṇṇaṁ gopālikā[96] passitvā etadavoca— “ehi, bhante, methunaṁ dhammaṁ paṭisevā”ti. So— “pakatiyāpāhaṁ assamaṇo”ti tassā methunaṁ dhammaṁ paṭisevitvā kosambiṁ gantvā bhikkhūnaṁ etamatthaṁ ārocesi. Bhikkhū bhagavato etamatthaṁ ārocesuṁ. “Anāpatti, bhikkhave, adinnādāne pārājikassa; āpatti methunadhammasamāyoge pārājikassā”ti. (149)

161. 374 Tena kho pana samayena sāgalāyaṁ āyasmato daḷhikassa saddhivihāriko bhikkhu anabhiratiyā pīḷito āpaṇikassa veṭhanaṁ avaharitvā āyasmantaṁ daḷhikaṁ etadavoca— “assamaṇo ahaṁ, bhante, vibbhamissāmī”ti. “Kiṁ tayā, āvuso, katan”ti? So tamatthaṁ ārocesi. Āharāpetvā agghāpesi. Taṁ agghāpentaṁ na pañcamāsake agghati. “Anāpatti, āvuso, pārājikassā”ti. Dhammakathaṁ akāsi. So bhikkhu abhiramatīti[97]. (150)

375 Dutiyapārājikaṁ samattaṁ.

  1. sūnagharaṁ: sūnāgharaṁ (sī) (Word Variant) ↩
  2. "Nikkhami: nikkhameyya (sī, syā1-3, pā1) (Word Variant) ↩
  3. nikkhami: nikkhameyya (sī, syā1-3, pā1) (Word Variant) ↩
  4. pavaṭṭetvā: pavattetvā (pā1, ka-ma) (Word Variant) ↩
  5. osārenti: osādenti (sī) (Word Variant) ↩
  6. paṭiggahāpetvā: paṭiggāhāpetvā (sī) (Word Variant) ↩
  7. "Paribhogatthāya: paribhogatthā (sī) (Word Variant) ↩
  8. bibbohanaṁ: bimbohanaṁ (sī, syā1-3, pā1) (Word Variant) ↩
  9. 4V.324/1 (Cross Reference) ↩
  10. 4V.324/1 (Cross Reference) ↩
  11. ācikkheyyāsī"ti: ācikkheyyāsīti so kālamakāsi (syā1-3) (Word Variant) ↩
  12. iddhimassa: iddhimato (sī), iddhimantassa (syā1-3, pā1) (Word Variant) ↩
  13. gopālikā: aññatarā gopālikā (sī, syā1-3) (Word Variant) ↩
  14. abhiramatīti: abhiramīti (sī, syā1-3, pā1) (Word Variant) ↩