Tipitaka2500tipitaka2500.github.io

1.7 Vasalasutta

1.7. วสลสุต์ต

Uragavagga

Vasalasutta

133 Evaṁ me sutaṁ— ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme. Atha kho bhagavā pubbaṇhasamayaṁ nivāsetvā pattacīvaramādāya sāvatthiṁ piṇḍāya pāvisi. Tena kho pana samayena aggikabhāradvājassa brāhmaṇassa nivesane aggi pajjalito hoti āhuti paggahitā. Atha kho bhagavā sāvatthiyaṁ sapadānaṁ piṇḍāya caramāno yena aggikabhāradvājassa brāhmaṇassa nivesanaṁ tenupasaṅkami.

134 Addasā kho aggikabhāradvājo brāhmaṇo bhagavantaṁ dūratova āgacchantaṁ. Disvāna bhagavantaṁ etadavoca— “tatreva, muṇḍaka; tatreva, samaṇaka; tatreva, vasalaka, tiṭṭhāhī”ti. [71]

135 Evaṁ vutte, bhagavā aggikabhāradvājaṁ brāhmaṇaṁ etadavoca— “jānāsi pana tvaṁ, brāhmaṇa, vasalaṁ vā vasalakaraṇe vā dhamme”ti? “Na khvāhaṁ, bho gotama, jānāmi vasalaṁ vā vasalakaraṇe vā dhamme; sādhu me bhavaṁ gotamo tathā dhammaṁ desetu, yathāhaṁ jāneyyaṁ vasalaṁ vā vasalakaraṇe vā dhamme”ti. “Tena hi, brāhmaṇa, suṇāhi, sādhukaṁ manasi karohi; bhāsissāmī”ti. “Evaṁ, bho”ti kho aggikabhāradvājo brāhmaṇo bhagavato paccassosi. Bhagavā etadavoca—

116. 136 [72] “Kodhano upanāhī ca,
pāpamakkhī ca yo naro;
Vipannadiṭṭhi māyāvī,
taṁ jaññā vasalo iti. (1)

117. 137 Ekajaṁ vā dvijaṁ vāpi,
yodha pāṇaṁ vihiṁsati;
Yassa pāṇe dayā natthi,
taṁ jaññā vasalo iti. (2)

118. 138 Yo hanti parirundhati[73],
gāmāni nigamāni ca;
Niggāhako samaññāto,
taṁ jaññā vasalo iti. (3) [74]

119. 139 Gāme vā yadi vā raññe,
yaṁ paresaṁ mamāyitaṁ;
Theyyā adinnamādeti[75],
taṁ jaññā vasalo iti. (4)

120. 140 Yo have iṇamādāya,
cujjamāno palāyati;
Na hi te iṇamatthīti,
taṁ jaññā vasalo iti. (5) [76]

121. 141 Yo ve kiñcikkhakamyatā,
panthasmiṁ vajantaṁ janaṁ;
Hantvā kiñcikkhamādeti,
taṁ jaññā vasalo iti. (6)

122. 142 Attahetu parahetu,
dhanahetu ca[77] yo naro;
Sakkhipuṭṭho musā brūti,
taṁ jaññā vasalo iti. (7)

123. 143 Yo ñātīnaṁ sakhīnaṁ vā,
dāresu paṭidissati;
Sāhasā sampiyena vā,
taṁ jaññā vasalo iti. (8) [78]

124. 144 Yo mātaraṁ pitaraṁ vā,
jiṇṇakaṁ gatayobbanaṁ;
Pahu santo na bharati,
taṁ jaññā vasalo iti. (9)

125. 145 Yo mātaraṁ pitaraṁ vā,
Bhātaraṁ bhaginiṁ sasuṁ;
Hanti roseti vācāya,
Taṁ jaññā vasalo iti. (10)

126. 146 Yo atthaṁ pucchito santo,
Anatthamanusāsati;
Paṭicchannena manteti,
Taṁ jaññā vasalo iti. (11)

127. 147 Yo katvā pāpakaṁ kammaṁ,
Mā maṁ jaññāti icchati[79];
Yo paṭicchannakammanto,
Taṁ jaññā vasalo iti. (12)

128. 148 Yo ve parakulaṁ gantvā,
Bhutvāna sucibhojanaṁ;
Āgataṁ nappaṭipūjeti,
Taṁ jaññā vasalo iti. (13) [80]

129. 149 Yo brāhmaṇaṁ samaṇaṁ vā,
Aññaṁ vāpi vanibbakaṁ;
Musāvādena vañceti,
Taṁ jaññā vasalo iti. (14)

130. 150 Yo brāhmaṇaṁ samaṇaṁ vā,
Bhattakāle upaṭṭhite;
Roseti vācā na ca deti,
Taṁ jaññā vasalo iti. (15)

131. 151 Asataṁ yodha pabrūti,
Mohena paliguṇṭhito;
Kiñcikkhaṁ nijigīsāno[81],
Taṁ jaññā vasalo iti. (16)

132. 152 Yo cattānaṁ samukkaṁse,
Pare ca mavajānāti[82];
Nihīno sena mānena,
Taṁ jaññā vasalo iti. (17)

133. 153 Rosako kadariyo ca,
Pāpiccho maccharī saṭho;
Ahiriko anottappī,
Taṁ jaññā vasalo iti. (18)

134. 154 Yo buddhaṁ paribhāsati,
Atha vā tassa sāvakaṁ;
Paribbājaṁ gahaṭṭhaṁ vā,
Taṁ jaññā vasalo iti. (19) [83]

135. 155 Yo ve anarahaṁ[84] santo,
Arahaṁ paṭijānāti[85];
Coro sabrahmake loke,
Eso kho vasalādhamo;
Ete kho vasalā vuttā,
Mayā yete pakāsitā. (20)

136. 156 Na jaccā vasalo hoti,
Na jaccā hoti brāhmaṇo;
Kammunā vasalo hoti,
Kammunā hoti brāhmaṇo. (21) [86]

137. 157 Tadamināpi jānātha,
Yathāmedaṁ nidassanaṁ;
Caṇḍālaputto sopāko[88],
Mātaṅgo iti vissuto. (22) [87]

138. 158 So yasaṁ paramaṁ patto[89],
Mātaṅgo yaṁ sudullabhaṁ;
Āgacchuṁ tassupaṭṭhānaṁ,
Khattiyā brāhmaṇā bahū. (23)

139. 159 Devayānaṁ abhiruyha,
Virajaṁ so mahāpathaṁ;
Kāmarāgaṁ virājetvā,
Brahmalokūpago ahu;
Na naṁ jāti nivāresi,
Brahmalokūpapattiyā. (24)

140. 160 Ajjhāyakakule jātā,
Brāhmaṇā mantabandhavā;
Te ca pāpesu kammesu,
Abhiṇhamupadissare. (25)

141. 161 Diṭṭheva dhamme gārayhā,
Samparāye ca duggati;
Na ne jāti nivāreti,
Duggatyā garahāya vā. (26) [90]

142. 162 Na jaccā vasalo hoti,
Na jaccā hoti brāhmaṇo;
Kammunā vasalo hoti,
Kammunā hoti brāhmaṇo”ti. (27)

163 Evaṁ vutte, aggikabhāradvājo brāhmaṇo bhagavantaṁ etadavoca— “abhikkantaṁ, bho gotama…pe… upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṁ gatan”ti.

164 Vasalasuttaṁ sattamaṁ.

  1. "tatreva: atreva (syā1-3, ka-ma) (Word Variant) ↩
  2. 26Ps:838 (Cross Reference) ↩
  3. parirundhati: uparundheti (syā1-3), uparundhati (ka-ma) (Word Variant) ↩
  4. Niggāhako: nigghātako (?) (Word Variant) ↩
  5. adinnamādeti: adinnaṁ ādiyati (sī, pā1), adinnaṁ āneti (syā1-3) (Word Variant) ↩
  6. cujjamāno: bhuñjamāno (syā1-3, ka-ma) (Word Variant) ↩
  7. ca: dhanahetu va (ka-ma) (Word Variant) ↩
  8. Sāhasā: sahasā (sī, syā1-3, pā1) (Word Variant) ↩
  9. icchati: 30Vbh:2685 (Word Variant) ↩
  10. Bhutvāna: bhutvā ca (syā1-3, ka-ma) (Word Variant) ↩
  11. nijigīsāno: nijigiṁsāno (sī, syā1-3, kaṃ, pā1) (Word Variant) ↩
  12. mavajānāti: ca mavajānati (sī, pā1), ca avajānati (syā1-3) (Word Variant) ↩
  13. Paribbājaṁ: paribbājakaṁ (syā1-3, kaṃ), paribbajaṁ (ka-ma) (Word Variant) ↩
  14. anarahaṁ: anarahā (sī, pā1) (Word Variant) ↩
  15. paṭijānāti: paṭijānati (sī, syā1-3, pā1) (Word Variant) ↩
  16. Kammunā: kammanā (sī, pā1) (Word Variant) ↩
  17. Yathāmedaṁ: yathāpedaṁ (ka-ma) (Word Variant) ↩
  18. sopāko: sapāko (?) (Word Variant) ↩
  19. patto: so yasapparamappatto (syā1-3, ka-ma) (Word Variant) ↩
  20. Duggatyā: duggaccā (sī, syā1-3, kaṃ, pā1) (Word Variant) ↩