Codanākaṇḍa
Codakādipaṭipatti
363. 1798 Codakena kathaṁ paṭipajjitabbaṁ? Cuditakena kathaṁ paṭipajjitabbaṁ? Saṁghena kathaṁ paṭipajjitabbaṁ? Anuvijjakena kathaṁ paṭipajjitabbaṁ? Codakena kathaṁ paṭipajjitabbanti? Codakena pañcasu dhammesu patiṭṭhāya paro codetabbo. Kālena vakkhāmi no akālena, bhūtena vakkhāmi no abhūtena, saṇhena vakkhāmi no pharusena, atthasaṁhitena vakkhāmi no anatthasaṁhitena, mettācitto vakkhāmi no dosantaroti— codakena evaṁ paṭipajjitabbaṁ. Cuditakena kathaṁ paṭipajjitabbanti? Cuditakena dvīsu dhammesu paṭipajjitabbaṁ. Sacce ca akuppe ca— cuditakena evaṁ paṭipajjitabbaṁ. Saṁghena kathaṁ paṭipajjitabbanti? Saṁghena otiṇṇānotiṇṇaṁ jānitabbaṁ. Saṁghena evaṁ paṭipajjitabbaṁ. Anuvijjakena kathaṁ paṭipajjitabbanti? Anuvijjakena yena dhammena yena vinayena yena satthusāsanena taṁ adhikaraṇaṁ vūpasammati tathā taṁ adhikaraṇaṁ vūpasametabbaṁ. Anuvijjakena evaṁ paṭipajjitabbaṁ.
364. 1799 Uposatho kimatthāya,
Pavāraṇā kissa kāraṇā;
Parivāso kimatthāya,
Mūlāyapaṭikassanā kissa kāraṇā;
Mānattaṁ kimatthāya,
Abbhānaṁ kissa kāraṇā.
1800 Uposatho sāmaggatthāya,
Visuddhatthāya pavāraṇā;
Parivāso mānattatthāya,
Mūlāyapaṭikassanā niggahatthāya;
Mānattaṁ abbhānatthāya,
Visuddhatthāya abbhānaṁ.
1801 Chandā dosā bhayā mohā,
there ca paribhāsati;
Kāyassa bhedā duppañño,
khato upahatindriyo;
Nirayaṁ gacchati dummedho,
na ca sikkhāya gāravo.
1802 Na ca āmisaṁ nissāya,
na ca nissāya puggalaṁ;
Ubho ete vivajjetvā,
yathādhammo tathā kare.