13.3 Codakassaattajhāpana

Codanākaṇḍa

Codakassaattajhāpana

1803 Kodhano upanāhī ca,
Caṇḍo ca paribhāsako;
Anāpattiyā āpattīti ropeti,
Tādiso codako jhāpeti attānaṁ.

1804 Upakaṇṇakaṁ jappati jimhaṁ pekkhati,
Vītiharati kummaggaṁ paṭisevati;
Anāpattiyā āpattīti ropeti,
Tādiso codako jhāpeti attānaṁ.

1805 Akālena codeti abhūtena,
Pharusena anatthasaṁhitena;
Dosantaro codeti no mettācitto,
Anāpattiyā āpattīti ropeti;
Tādiso codako jhāpeti attānaṁ.

1806 Dhammādhammaṁ na jānāti,
Dhammādhammassa akovido;
Anāpattiyā āpattīti ropeti,
Tādiso codako jhāpeti attānaṁ.

1807 Vinayāvinayaṁ na jānāti,
Vinayāvinayassa akovido;
Anāpattiyā āpattīti ropeti,
Tādiso codako jhāpeti attānaṁ.

1808 Bhāsitābhāsitaṁ na jānāti,
Bhāsitābhāsitassa akovido;
Anāpattiyā āpattīti ropeti,
Tādiso codako jhāpeti attānaṁ.

1809 Āciṇṇānāciṇṇaṁ na jānāti,
Āciṇṇānāciṇṇassa akovido;
Anāpattiyā āpattīti ropeti,
Tādiso codako jhāpeti attānaṁ.

1810 Paññattāpaññattaṁ na jānāti,
Paññattāpaññattassa akovido;
Anāpattiyā āpattīti ropeti,
Tādiso codako jhāpeti attānaṁ.

1811 Āpattānāpattiṁ na jānāti,
Āpattānāpattiyā akovido;
Anāpattiyā āpattīti ropeti,
Tādiso codako jhāpeti attānaṁ.

1812 Lahukagarukaṁ na jānāti,
Lahukagarukassa akovido;
Anāpattiyā āpattīti ropeti,
Tādiso codako jhāpeti attānaṁ.

1813 Sāvasesānavasesaṁ na jānāti,
Sāvasesānavasesassa akovido;
Anāpattiyā āpattīti ropeti,
Tādiso codako jhāpeti attānaṁ.

1814 Duṭṭhullāduṭṭhullaṁ na jānāti,
Duṭṭhullāduṭṭhullassa akovido;
Anāpattiyā āpattīti ropeti,
Tādiso codako jhāpeti attānaṁ.

1815 Pubbāparaṁ na jānāti,
Pubbāparassa akovido;
Anāpattiyā āpattīti ropeti,
Tādiso codako jhāpeti attānaṁ.

1816 Anusandhivacanapathaṁ na jānāti,
Anusandhivacanapathassa akovido;
Anāpattiyā āpattīti ropeti,
Tādiso codako jhāpeti attānanti.

1817 Codanākaṇḍaṁ niṭṭhitaṁ.

1818

1819 Codanā anuvijjā ca,
ādi mūlenuposatho;
Gati codanakaṇḍamhi,
sāsanaṁ patiṭṭhāpayanti^[300].