Codanākaṇḍa
Anuvijjakaanuyoga
360. 1792 Anuvijjakena codako pucchitabbo— “yaṁ kho tvaṁ, āvuso, imaṁ bhikkhuṁ codesi, kimhi naṁ codesi, sīlavipattiyā vā codesi, ācāravipattiyā vā codesi, diṭṭhivipattiyā vā codesī”ti? So ce evaṁ vadeyya— “sīlavipattiyā vā codemi, ācāravipattiyā vā codemi, diṭṭhivipattiyā vā codemī”ti, so evamassa vacanīyo— “jānāsi panāyasmā sīlavipattiṁ, jānāsi ācāravipattiṁ, jānāsi diṭṭhivipattin”ti? So ce evaṁ vadeyya— “jānāmi kho ahaṁ, āvuso, sīlavipattiṁ, jānāmi ācāravipattiṁ, jānāmi diṭṭhivipattin”ti, so evamassa vacanīyo— “katamā panāvuso, sīlavipatti? Katamā ācāravipatti? Katamā diṭṭhivipattī”ti? So ce evaṁ vadeyya— “cattāri ca pārājikāni, terasa ca saṁghādisesā— ayaṁ sīlavipatti. Thullaccayaṁ, pācittiyaṁ, pāṭidesanīyaṁ, dukkaṭaṁ, dubbhāsitaṁ, ayaṁ ācāravipatti. Micchādiṭṭhi, antaggāhikā diṭṭhi— ayaṁ diṭṭhivipattī”ti, so evamassa vacanīyo— “yaṁ kho tvaṁ, āvuso, imaṁ bhikkhuṁ codesi, diṭṭhena vā codesi sutena vā codesi parisaṅkāya vā codesī”ti? So ce evaṁ vadeyya— “diṭṭhena vā codemi sutena vā codemi parisaṅkāya vā codemī”ti, so evamassa vacanīyo— “yaṁ kho tvaṁ, āvuso, imaṁ bhikkhuṁ diṭṭhena codesi, kiṁ te diṭṭhaṁ kinti te diṭṭhaṁ, kadā te diṭṭhaṁ, kattha te diṭṭhaṁ pārājikaṁ ajjhāpajjanto diṭṭho, saṁghādisesaṁ ajjhāpajjanto diṭṭho, thullaccayaṁ… pācittiyaṁ… pāṭidesanīyaṁ… dukkaṭaṁ… dubbhāsitaṁ ajjhāpajjanto diṭṭho, kattha ca tvaṁ ahosi, kattha cāyaṁ bhikkhu ahosi, kiñca tvaṁ karosi, kiṁ cāyaṁ bhikkhu karotī”ti? So ce evaṁ vadeyya— “na kho ahaṁ, āvuso, imaṁ bhikkhuṁ diṭṭhena codemi, api ca sutena codemī”ti, so evamassa vacanīyo— “yaṁ kho tvaṁ, āvuso, imaṁ bhikkhuṁ sutena codesi, kiṁ te sutaṁ, kinti te sutaṁ, kadā te sutaṁ, kattha te sutaṁ, pārājikaṁ ajjhāpannoti sutaṁ, saṁghādisesaṁ… thullaccayaṁ… pācittiyaṁ… pāṭidesanīyaṁ… dukkaṭaṁ… dubbhāsitaṁ ajjhāpannoti sutaṁ, bhikkhussa sutaṁ, bhikkhuniyā sutaṁ, sikkhamānāya sutaṁ, sāmaṇerassa sutaṁ, sāmaṇeriyā sutaṁ, upāsakassa sutaṁ, upāsikāya sutaṁ, rājūnaṁ sutaṁ, rājamahāmattānaṁ sutaṁ, titthiyānaṁ sutaṁ, titthiyasāvakānaṁ sutan”ti? So ce evaṁ vadeyya— “na kho ahaṁ, āvuso, imaṁ bhikkhuṁ sutena codemi, api ca parisaṅkāya codemī”ti, so evamassa vacanīyo— “yaṁ kho tvaṁ, āvuso, imaṁ bhikkhuṁ parisaṅkāya codesi, kiṁ parisaṅkasi, kinti parisaṅkasi, kadā parisaṅkasi, kattha parisaṅkasi, pārājikaṁ ajjhāpannoti parisaṅkasi, saṁghādisesaṁ ajjhāpannoti parisaṅkasi, thullaccayaṁ… pācittiyaṁ… pāṭidesanīyaṁ… dukkaṭaṁ… dubbhāsitaṁ ajjhāpannoti parisaṅkasi, bhikkhussa sutvā parisaṅkasi, bhikkhuniyā sutvā parisaṅkasi, sikkhamānāya sutvā parisaṅkasi, sāmaṇerassa sutvā parisaṅkasi, sāmaṇeriyā sutvā parisaṅkasi, upāsakassa sutvā parisaṅkasi, upāsikāya sutvā parisaṅkasi, rājūnaṁ sutvā parisaṅkasi, rājamahāmattānaṁ sutvā parisaṅkasi, titthiyānaṁ sutvā parisaṅkasi, titthiyasāvakānaṁ sutvā parisaṅkasī”ti?
361. 1793 Diṭṭhaṁ diṭṭhena sameti,
diṭṭhena saṁsandate diṭṭhaṁ;
Diṭṭhaṁ paṭicca na upeti,
asuddhaparisaṅkito;
So puggalo paṭiññāya,
kātabbo tenuposatho.
1794 Sutaṁ sutena sameti,
sutena saṁsandate sutaṁ;
Sutaṁ paṭicca na upeti,
asuddhaparisaṅkito;
So puggalo paṭiññāya,
kātabbo tenuposatho.
1795 Mutaṁ mutena sameti,
mutena saṁsandate mutaṁ;
Mutaṁ paṭicca na upeti,
asuddhaparisaṅkito;
So puggalo paṭiññāya,
kātabbo tenuposatho.
362. 1796 Codanāya ko ādi, kiṁ majjhe, kiṁ pariyosānaṁ? Codanāya okāsakammaṁ ādi, kiriyā majjhe, samatho pariyosānaṁ. Codanāya kati mūlāni, kati vatthūni, kati bhūmiyo, katihākārehi codeti? Codanāya dve mūlāni, tīṇi vatthūni, pañca bhūmiyo, dvīhākārehi codeti. Codanāya katamāni dve mūlāni? Samūlikā vā amūlikā vā— codanāya imāni dve mūlāni. Codanāya katamāni tīṇi vatthūni? Diṭṭhena sutena parisaṅkāya— codanāya imāni tīṇi vatthūni. Codanāya katamā pañca bhūmiyo? Kālena vakkhāmi no akālena, bhūtena vakkhāmi no abhūtena, saṇhena vakkhāmi no pharusena, atthasaṁhitena vakkhāmi no anatthasaṁhitena, mettācitto vakkhāmi no dosantaroti— codanāya imā pañca bhūmiyo.
1797 Katamehi dvīhākārehi codeti? Kāyena vā codeti vācāya vā codeti— imehi dvīhākārehi codeti.