Opammakathāpañha
Makkaṭakavagga
Pavanaṅgapañha
278. 1944 “Bhante nāgasena, ‘pavanassa pañca aṅgāni gahetabbānī’ti yaṁ vadesi, katamāni tāni pañca aṅgāni gahetabbānī”ti? “Yathā, mahārāja, pavanaṁ nāma asucijanaṁ paṭicchādeti; evameva kho, mahārāja, yoginā yogāvacarena paresaṁ aparaddhaṁ khalitaṁ paṭicchādetabbaṁ na vivaritabbaṁ. Idaṁ, mahārāja, pavanassa paṭhamaṁ aṅgaṁ gahetabbaṁ.
1945 Puna caparaṁ, mahārāja, pavanaṁ suññaṁ pacurajanehi; evameva kho, mahārāja, yoginā yogāvacarena rāgadosamohamānadiṭṭhijālehi sabbehi ca kilesehi suññena bhavitabbaṁ. Idaṁ, mahārāja, pavanassa dutiyaṁ aṅgaṁ gahetabbaṁ.
1946 Puna caparaṁ, mahārāja, pavanaṁ vivittaṁ janasambādharahitaṁ; evameva kho, mahārāja, yoginā yogāvacarena pāpakehi akusalehi dhammehi anariyehi pavivittena bhavitabbaṁ. Idaṁ, mahārāja, pavanassa tatiyaṁ aṅgaṁ gahetabbaṁ.
1947 Puna caparaṁ, mahārāja, pavanaṁ santaṁ parisuddhaṁ; evameva kho, mahārāja, yoginā yogāvacarena santena parisuddhena bhavitabbaṁ, nibbutena pahīnamānena pahīnamakkhena bhavitabbaṁ. Idaṁ, mahārāja, pavanassa catutthaṁ aṅgaṁ gahetabbaṁ.
1948 Puna caparaṁ, mahārāja, pavanaṁ ariyajanasaṁsevitaṁ; evameva kho, mahārāja, yoginā yogāvacarena ariyajanasaṁsevitena bhavitabbaṁ. Idaṁ, mahārāja, pavanassa pañcamaṁ aṅgaṁ gahetabbaṁ. Bhāsitampetaṁ, mahārāja, bhagavatā devātidevena saṁyuttanikāyavare—
1949 [680] ‘Pavivittehi ariyehi,
pahitattehi jhāyibhi;
Niccaṁ āraddhavīriyehi,
paṇḍitehi sahāvase’”ti.
1950 Pavanaṅgapañho catuttho.
- 12S2.100/1; 18It.78/1; 19Th1.148/1; 19Th1.266/1 (Cross Reference) ↩