Opammakathāpañha
Makkaṭakavagga
Rukkhaṅgapañha
279. 1951 “Bhante nāgasena, ‘rukkhassa tīṇi aṅgāni gahetabbānī’ti yaṁ vadesi, katamāni tāni tīṇi aṅgāni gahetabbānī”ti? “Yathā, mahārāja, rukkho nāma pupphaphaladharo; evameva kho, mahārāja, yoginā yogāvacarena vimuttipupphasāmaññaphaladhārinā bhavitabbaṁ. Idaṁ, mahārāja, rukkhassa paṭhamaṁ aṅgaṁ gahetabbaṁ.
1952 Puna caparaṁ, mahārāja, rukkho upagatānamanuppaviṭṭhānaṁ janānaṁ chāyaṁ deti; evameva kho, mahārāja, yoginā yogāvacarena upagatānamanuppaviṭṭhānaṁ puggalānaṁ āmisappaṭisandhārena vā dhammappaṭisanthārena vā paṭisantharitabbaṁ. Idaṁ, mahārāja, rukkhassa dutiyaṁ aṅgaṁ gahetabbaṁ.
1953 Puna caparaṁ, mahārāja, rukkho chāyāvemattaṁ na karoti; evameva kho, mahārāja, yoginā yogāvacarena sabbasattesu vemattatā na kātabbā, coravadhakapaccatthikesupi attanipi samasamā mettābhāvanā kātabbā, ‘kinti ime sattā averā abyāpajjā[681] anīghā sukhī attānaṁ parihareyyun’ti. Idaṁ, mahārāja, rukkhassa tatiyaṁ aṅgaṁ gahetabbaṁ. Bhāsitampetaṁ, mahārāja, therena sāriputtena dhammasenāpatinā—
1954 ‘Vadhake devadattamhi,
core aṅgulimālake;
Dhanapāle rāhule ca,
sabbattha samako munī’”ti.
1955 Rukkhaṅgapañho pañcamo.
- abyāpajjā: abyāpajjhā (sī, maku, pā1) (Word Variant) ↩