Opammakathāpañha
Upacikāvagga
Migaṅgapañha
261. 1859 “Bhante nāgasena, ‘migassa tīṇi aṅgāni gahetabbānī’ti yaṁ vadesi, katamāni tāni tīṇi aṅgāni gahetabbānī”ti? “Yathā, mahārāja, migo divā araññe carati, rattiṁ abbhokāse; evameva kho, mahārāja, yoginā yogāvacarena divā araññe viharitabbaṁ, rattiṁ abbhokāse. Idaṁ, mahārāja, migassa paṭhamaṁ aṅgaṁ gahetabbaṁ.
1860 Bhāsitampetaṁ, mahārāja, bhagavatā devātidevena lomahaṁsanapariyāye—
1861 [648] ‘So kho ahaṁ, sāriputta, yā tā rattiyo sītā hemantikā antaraṭṭhakā himapātasamayā[649], tathārūpāsu rattīsu rattiṁ abbhokāse viharāmi, divā vanasaṇḍe. Gimhānaṁ pacchime māse divā abbhokāse viharāmi, rattiṁ vanasaṇḍe’ti.
1862 Puna caparaṁ, mahārāja, migo sattimhi vā sare vā opatante vañceti[650] palāyati, na kāyamupaneti; evameva kho, mahārāja, yoginā yogāvacarena kilesesu opatantesu vañcayitabbaṁ[651] palāyitabbaṁ, na cittamupanetabbaṁ. Idaṁ, mahārāja, migassa dutiyaṁ aṅgaṁ gahetabbaṁ.
1863 Puna caparaṁ, mahārāja, migo manusse disvā yena vā tena vā palāyati ‘mā maṁ te addasaṁsū’ti; evameva kho, mahārāja, yoginā yogāvacarena bhaṇḍanakalahaviggahavivādasīle dussīle kusīte saṅgaṇikārāme disvā yena vā tena vā palāyitabbaṁ ‘mā maṁ te addasaṁsu, ahañca te mā addasan’ti. Idaṁ, mahārāja, migassa tatiyaṁ aṅgaṁ gahetabbaṁ. Bhāsitampetaṁ, mahārāja, therena sāriputtena dhammasenāpatinā—
1864 [652] ‘Mā me kadāci pāpiccho,
kusīto hīnavīriyo;
Appassuto anācāro,
sammato ahu katthacī’”ti. [653]
1865 Migaṅgapañho sattamo.
- 9M.157/1 (Cross Reference) ↩
- himapātasamayā: antaraṭṭhake himapātasamaye (sī, pā1, ka-ma), antaraṭṭhakā himapātasamaye (maku) (Word Variant) ↩
- vañceti: vajjeti (ka-ma) (Word Variant) ↩
- vañcayitabbaṁ: vajjayitabbaṁ (ka-ma) (Word Variant) ↩
- 19Th1.987/1 (Cross Reference) ↩
- katthacī'"ti: sameto katthacī ahūti (sī, maku, pā1) (Word Variant) ↩