Opammakathāpañha
Upacikāvagga
Gorūpaṅgapañha
262. 1866 “Bhante nāgasena, ‘gorūpassa cattāri aṅgāni gahetabbānī’ti yaṁ vadesi, katamāni tāni cattāri aṅgāni gahetabbānī”ti? “Yathā, mahārāja, gorūpo sakaṁ gehaṁ na vijahati; evameva kho, mahārāja, yoginā yogāvacarena sako kāyo na vijahitabbo ‘aniccucchādanaparimaddanabhedanavikiraṇaviddhaṁsanadhammo ayaṁ kāyo’ti. Idaṁ, mahārāja, gorūpassa paṭhamaṁ aṅgaṁ gahetabbaṁ.
1867 Puna caparaṁ, mahārāja, gorūpo ādinnadhuro sukhadukkhena dhuraṁ vahati; evameva kho, mahārāja, yoginā yogāvacarena ādinnabrahmacariyena sukhadukkhena yāva jīvitapariyādānā āpāṇakoṭikaṁ brahmacariyaṁ caritabbaṁ. Idaṁ, mahārāja, gorūpassa dutiyaṁ aṅgaṁ gahetabbaṁ.
1868 Puna caparaṁ, mahārāja, gorūpo chandena ghāyamāno pānīyaṁ pivati; evameva kho, mahārāja, yoginā yogāvacarena ācariyupajjhāyānaṁ anusiṭṭhi chandena pemena pasādena ghāyamānena paṭiggahetabbā. Idaṁ, mahārāja, gorūpassa tatiyaṁ aṅgaṁ gahetabbaṁ.
1869 Puna caparaṁ, mahārāja, gorūpo yena kenaci vāhiyamāno vahati; evameva kho, mahārāja, yoginā yogāvacarena theranavamajjhimabhikkhūnampi gihiupāsakassāpi ovādānusāsanī sirasā sampaṭicchitabbā. Idaṁ, mahārāja, gorūpassa catutthaṁ aṅgaṁ gahetabbaṁ. Bhāsitampetaṁ, mahārāja, therena sāriputtena dhammasenāpatinā—
1870 ‘Tadahu pabbajito santo,
jātiyā sattavassiko;
Sopi maṁ anusāseyya,
sampaṭicchāmi matthake[654].
1871 Tibbaṁ chandañca pemañca,
tasmiṁ disvā upaṭṭhape;
Ṭhapeyyācariyaṭṭhāne,
sakkacca naṁ punappunan’”ti.
1872 Gorūpaṅgapañho aṭṭhamo.
- matthake: muddhanā (sī) (Word Variant) ↩