Navakanipāta
Gijjhavagga
Padakusalamāṇavajātaka
49. 1834 “Bahussutaṁ cittakathiṁ[1059],
gaṅgā vahati pāṭaliṁ[1060];
Vuyhamānaka bhaddante,
ekaṁ me dehi[1061] gāthakaṁ[1062]”.
50. 1835 “Yena siñcanti dukkhitaṁ,
yena siñcanti āturaṁ;
Tassa majjhe marissāmi,
jātaṁ saraṇato bhayaṁ”.
51. 1836 “Yattha bījāni rūhanti,
sattā yattha patiṭṭhitā;
Sā me sīsaṁ nipīḷeti,
jātaṁ saraṇato bhayaṁ”.
52. 1837 “Yena bhattāni paccanti,
sītaṁ yena vihaññati;
So maṁ ḍahati[1063] gattāni,
jātaṁ saraṇato bhayaṁ”.
53. 1838 “Yena bhuttena[1064] yāpenti,
puthū brāhmaṇakhattiyā;
So maṁ bhutto byāpādeti,
jātaṁ saraṇato bhayaṁ”.
54. 1839 “Gimhānaṁ pacchime māse,
vātamicchanti paṇḍitā;
So maṁ[1065] bhañjati gattāni,
jātaṁ saraṇato bhayaṁ”.
55. 1840 “Yaṁ nissitā jagatiruhaṁ,
svāyaṁ aggiṁ pamuñcati;
Disā bhajatha vakkaṅgā,
jātaṁ saraṇato bhayaṁ”.
56. 1841 “Yamānayiṁ somanassaṁ,
māliniṁ candanussadaṁ;
Sā maṁ gharā nicchubhati[1066],
jātaṁ saraṇato bhayaṁ”.
57. 1842 “Yena jātena nandissaṁ,
yassa ca bhavamicchisaṁ;
So maṁ gharā nicchubhati[1067],
jātaṁ saraṇato bhayaṁ”.
58. 1843 “Suṇantu me jānapadā,
negamā ca samāgatā;
Yatodakaṁ tadādittaṁ,
yato khemaṁ tato bhayaṁ.
59. 1844 Rājā vilumpate raṭṭhaṁ,
brāhmaṇo ca purohito;
Attaguttā viharatha,
jātaṁ saraṇato bhayan”ti.
1845 Padakusalamāṇavajātakaṁ[1068] chaṭṭhaṁ.
- cittakathiṁ: cittakathaṁ (syā2, syā3, ka-ma) (Word Variant) ↩
- pāṭaliṁ: pāṭalaṁ (sī, pā1) (Word Variant) ↩
- dehi: gāhi (pā1) (Word Variant) ↩
- gāthakaṁ: gītakaṁ ([Ma-aka]) (Word Variant) ↩
- ḍahati: dayhati (ka-ma) (Word Variant) ↩
- bhuttena: bhattena (syā2, syā3, ka-ma) (Word Variant) ↩
- maṁ: so me (sī, pā1) (Word Variant) ↩
- nicchubhati: nīharati (sī, syā2, syā3) (Word Variant) ↩
- nicchubhati: nīharati (syā2, syā3) (Word Variant) ↩
- Padakusalamāṇavajātakaṁ: padamāṇavakajātakaṁ (sī) (Word Variant) ↩