Mahāvibhaṅga
Nissaggiyakaṇḍa
Kosiyavagga
Eḷakalomasikkhāpada
571. 2176 Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena aññatarassa bhikkhuno kosalesu janapade sāvatthiṁ gacchantassa antarāmagge eḷakalomāni uppajjiṁsu. Atha kho so bhikkhu tāni eḷakalomāni uttarāsaṅgena bhaṇḍikaṁ bandhitvā agamāsi. Manussā taṁ bhikkhuṁ passitvā uppaṇḍesuṁ— “kittakena te, bhante, kītāni? Kittako udayo bhavissatī”ti? So bhikkhu tehi manussehi uppaṇḍiyamāno maṅku ahosi. Atha kho so bhikkhu sāvatthiṁ gantvā tāni eḷakalomāni ṭhitakova āsumbhi. Bhikkhū taṁ bhikkhuṁ etadavocuṁ— “kissa tvaṁ, āvuso, imāni eḷakalomāni ṭhitakova āsumbhasī”ti? “Tathā hi panāhaṁ, āvuso, imesaṁ eḷakalomānaṁ kāraṇā manussehi uppaṇḍito”ti. “Kīva dūrato pana tvaṁ, āvuso, imāni eḷakalomāni āharī”ti? “Atirekatiyojanaṁ, āvuso”ti. Ye te bhikkhū appicchā…pe… te ujjhāyanti khiyyanti vipācenti— “kathañhi nāma bhikkhu atirekatiyojanaṁ eḷakalomāni āharissatī”ti.
2177 Atha kho te bhikkhū taṁ bhikkhuṁ anekapariyāyena vigarahitvā bhagavato etamatthaṁ ārocesuṁ…pe… “saccaṁ kira tvaṁ, bhikkhu, atirekatiyojanaṁ eḷakalomāni āharī”ti? “Saccaṁ, bhagavā”ti. Vigarahi buddho bhagavā…pe… kathañhi nāma tvaṁ, moghapurisa, atirekatiyojanaṁ eḷakalomāni āharissasi. Netaṁ moghapurisa, appasannānaṁ vā pasādāya…pe… evañca pana, bhikkhave, imaṁ sikkhāpadaṁ uddiseyyātha—
572. 2178 “Bhikkhuno paneva addhānamaggappaṭipannassa[324] eḷakalomāni uppajjeyyuṁ. Ākaṅkhamānena bhikkhunā paṭiggahetabbāni. Paṭiggahetvā tiyojanaparamaṁ sahatthā haritabbāni[325], asante hārake. Tato ce uttari[326] hareyya, asantepi hārake, nissaggiyaṁ pācittiyan”ti. (16:35)
573. 2179 Bhikkhuno paneva addhānamaggappaṭipannassāti panthaṁ gacchantassa.
2180 Eḷakalomāni uppajjeyyunti uppajjeyyuṁ saṁghato vā gaṇato vā ñātito vā mittato vā paṁsukūlaṁ vā attano vā dhanena.
2181 Ākaṅkhamānenāti icchamānena paṭiggahetabbāni.
2182 Paṭiggahetvā tiyojanaparamaṁ sahatthā haritabbānīti tiyojanaparamatā sahatthā haritabbāni.
2183 Asante hāraketi nāñño koci hārako hoti itthī vā puriso vā gahaṭṭho vā pabbajito vā.
2184 Tato ce uttari hareyya, asantepi hāraketi paṭhamaṁ pādaṁ tiyojanaṁ atikkāmeti, āpatti dukkaṭassa. Dutiyaṁ pādaṁ atikkāmeti, nissaggiyaṁ pācittiyaṁ[327]. Antotiyojane ṭhito bahitiyojanaṁ pāteti, nissaggiyaṁ pācittiyaṁ[328]. Aññassa yāne vā bhaṇḍe vā ajānantassa pakkhipitvā tiyojanaṁ atikkāmeti, nissaggiyāni honti. Nissajjitabbāni saṁghassa vā gaṇassa vā puggalassa vā. Evañca pana, bhikkhave, nissajjitabbāni…pe… “imāni me, bhante, eḷakalomāni tiyojanaṁ atikkāmitāni nissaggiyāni. Imānāhaṁ saṁghassa nissajjāmī”ti…pe… dadeyyāti…pe… dadeyyunti…pe… āyasmato dammīti.
574. 2185 Atirekatiyojane atirekasaññī atikkāmeti[329], nissaggiyaṁ pācittiyaṁ. Atirekatiyojane vematiko atikkāmeti[330], nissaggiyaṁ pācittiyaṁ. Atirekatiyojane ūnakasaññī atikkāmeti[331], nissaggiyaṁ pācittiyaṁ.
2186 Ūnakatiyojane atirekasaññī, āpatti dukkaṭassa. Ūnakatiyojane vematiko, āpatti dukkaṭassa. Ūnakatiyojane ūnakasaññī, anāpatti.
575. 2187 Anāpatti— tiyojanaṁ harati, ūnakatiyojanaṁ harati, tiyojanaṁ haratipi, paccāharatipi, tiyojanaṁ vāsādhippāyo gantvā tato paraṁ harati, acchinnaṁ paṭilabhitvā harati, nissaṭṭhaṁ paṭilabhitvā harati, aññaṁ harāpeti katabhaṇḍaṁ, ummattakassa, ādikammikassāti.
2188 Eḷakalomasikkhāpadaṁ niṭṭhitaṁ chaṭṭhaṁ.
- addhānamaggappaṭipannassa: ... maggapaṭipannassa (syā1-3, pā1) (Word Variant) ↩
- haritabbāni: hāretabbāni (ka-sī, syā1-3, pā1, ka-ma) (Word Variant) ↩
- uttari: uttariṁ (sī, syā1-3, pā1) (Word Variant) ↩
- pācittiyaṁ: nissaggiyāni honti (syā1-3) (Word Variant) ↩
- pācittiyaṁ: nissaggiyāni honti (syā1-3) (Word Variant) ↩
- atikkāmeti: tiyojanaṁ atikkāmeti (syā1-3) (Word Variant) ↩
- atikkāmeti: tiyojanaṁ atikkāmeti (syā1-3) (Word Variant) ↩
- atikkāmeti: tiyojanaṁ atikkāmeti (syā1-3) (Word Variant) ↩