Tipitaka2500 tipitaka2500.github.io

1.4.1.7 Tatuttarisikkhāpada

1.5.1.7. ตตุต์ตริสิก์ขาปท

Mahāvibhaṅga

Nissaggiyakaṇḍa

Cīvaravagga

Tatuttarisikkhāpada

522. 1998 Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena chabbaggiyā bhikkhū acchinnacīvarake bhikkhū upasaṅkamitvā evaṁ vadanti— “bhagavatā, āvuso, anuññātaṁ— ‘acchinnacīvarassa vā naṭṭhacīvarassa vā aññātakaṁ gahapatiṁ vā gahapatāniṁ vā cīvaraṁ viññāpetuṁ’; viññāpetha, āvuso, cīvaran”ti. “Alaṁ, āvuso, laddhaṁ amhehi cīvaran”ti. “Mayaṁ āyasmantānaṁ viññāpemā”ti. “Viññāpetha, āvuso”ti. Atha kho chabbaggiyā bhikkhū gahapatike upasaṅkamitvā etadavocuṁ— “acchinnacīvarakā, āvuso, bhikkhū āgatā. Detha nesaṁ cīvarānī”ti, bahuṁ cīvaraṁ viññāpesuṁ.

1999 Tena kho pana samayena aññataro puriso sabhāyaṁ nisinno aññataraṁ purisaṁ etadavoca— “acchinnacīvarakā ayyo bhikkhū āgatā. Tesaṁ mayā cīvaraṁ dinnan”ti. Sopi evamāha— “mayāpi dinnan”ti. Aparopi evamāha— “mayāpi dinnan”ti. Te ujjhāyanti khiyyanti vipācenti— “kathañhi nāma samaṇā sakyaputtiyā na mattaṁ jānitvā bahuṁ cīvaraṁ viññāpessanti, dussavāṇijjaṁ vā samaṇā sakyaputtiyā karissanti, paggāhikasālaṁ[305] vā pasāressantī”ti.

2000 Assosuṁ kho bhikkhū tesaṁ manussānaṁ ujjhāyantānaṁ khiyyantānaṁ vipācentānaṁ. Ye te bhikkhū appicchā…pe… te ujjhāyanti khiyyanti vipācenti— “kathañhi nāma chabbaggiyā bhikkhū na mattaṁ jānitvā bahuṁ cīvaraṁ viññāpessantī”ti.

2001 Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṁ ārocesuṁ…pe… “saccaṁ kira tumhe, bhikkhave, na mattaṁ jānitvā bahuṁ cīvaraṁ viññāpethā”ti? “Saccaṁ, bhagavā”ti. Vigarahi buddho bhagavā…pe… kathañhi nāma tumhe, moghapurisā, na mattaṁ jānitvā bahuṁ cīvaraṁ viññāpessatha. Netaṁ, moghapurisā, appasannānaṁ vā pasādāya…pe… evañca pana, bhikkhave, imaṁ sikkhāpadaṁ uddiseyyātha—

523. 2002 “Tañce aññātako gahapati vā gahapatānī vā bahūhi cīvarehi abhihaṭṭhuṁ pavāreyya santaruttaraparamaṁ tena[306] bhikkhunā tato cīvaraṁ sāditabbaṁ. Tato ce uttari[307] sādiyeyya, nissaggiyaṁ pācittiyan”ti. (7:26)

524. 2003 Tañceti acchinnacīvarakaṁ bhikkhuṁ.

2004 Aññātako nāma mātito vā pitito vā yāva sattamā pitāmahayugā asambaddho.

2005 Gahapati nāma yo koci agāraṁ ajjhāvasati.

2006 Gahapatānī nāma yā kāci agāraṁ ajjhāvasati.

2007 Bahūhi cīvarehīti bahukehi cīvarehi.

2008 Abhihaṭṭhuṁ pavāreyyāti yāvatakaṁ icchasi tāvatakaṁ gaṇhāhīti.

2009 Santaruttaraparamaṁ tena bhikkhunā tato cīvaraṁ sāditabbanti sace tīṇi naṭṭhāni honti dve sāditabbāni, dve naṭṭhāni ekaṁ sāditabbaṁ, ekaṁ naṭṭhaṁ na kiñci sāditabbaṁ.

2010 Tato ce uttari sādiyeyyāti tatuttari viññāpeti, payoge dukkaṭaṁ. Paṭilābhena nissaggiyaṁ hoti. Nissajjitabbaṁ saṁghassa vā gaṇassa vā puggalassa vā. Evañca pana, bhikkhave, nissajjitabbaṁ…pe… “idaṁ me, bhante, cīvaraṁ aññātakaṁ gahapatikaṁ upasaṅkamitvā tatuttari viññāpitaṁ nissaggiyaṁ. Imāhaṁ saṁghassa nissajjāmī”ti…pe… dadeyyāti…pe… dadeyyunti…pe… āyasmato dammīti.

525. 2011 Aññātake aññātakasaññī tatuttari cīvaraṁ viññāpeti, nissaggiyaṁ pācittiyaṁ. Aññātake vematiko tatuttari cīvaraṁ viññāpeti, nissaggiyaṁ pācittiyaṁ. Aññātake ñātakasaññī tatuttari cīvaraṁ viññāpeti, nissaggiyaṁ pācittiyaṁ.

2012 Ñātake aññātakasaññī, āpatti dukkaṭassa. Ñātake vematiko, āpatti dukkaṭassa. Ñātake ñātakasaññī, anāpatti.

526. 2013 Anāpatti— “sesakaṁ āharissāmī”ti haranto gacchati, “sesakaṁ tuyheva hotū”ti denti, na acchinnakāraṇā denti, na naṭṭhakāraṇā denti, ñātakānaṁ, pavāritānaṁ, attano dhanena, ummattakassa, ādikammikassāti.

2014 Tatuttarisikkhāpadaṁ niṭṭhitaṁ sattamaṁ.

  1. paggāhikasālaṁ: paṭaggāhikasālaṁ (?) (Word Variant) ↩
  2. tena: ... paramantena (syā1-3, pā1) (Word Variant) ↩
  3. uttari: uttariṁ (sī, syā1-3, pā1) (Word Variant) ↩