Atthavasapakaraṇa
334. 1604 [260] Dasa atthavase paṭicca tathāgatena sāvakānaṁ sikkhāpadaṁ paññattaṁ— saṁghasuṭṭhutāya, saṁghaphāsutāya, dummaṅkūnaṁ puggalānaṁ niggahāya, pesalānaṁ bhikkhūnaṁ phāsuvihārāya, diṭṭhadhammikānaṁ āsavānaṁ saṁvarāya, samparāyikānaṁ āsavānaṁ paṭighātāya, appasannānaṁ pasādāya, pasannānaṁ bhiyyobhāvāya, saddhammaṭṭhitiyā vinayānuggahāya.
1605 Yaṁ saṁghasuṭṭhu taṁ saṁghaphāsu. Yaṁ saṁghaphāsu taṁ dummaṅkūnaṁ puggalānaṁ niggahāya. Yaṁ dummaṅkūnaṁ puggalānaṁ niggahāya taṁ pesalānaṁ bhikkhūnaṁ phāsuvihārāya. Yaṁ pesalānaṁ bhikkhūnaṁ phāsuvihārāya taṁ diṭṭhadhammikānaṁ āsavānaṁ saṁvarāya. Yaṁ diṭṭhadhammikānaṁ āsavānaṁ saṁvarāya taṁ samparāyikānaṁ āsavānaṁ paṭighātāya. Yaṁ samparāyikānaṁ āsavānaṁ paṭighātāya taṁ appasannānaṁ pasādāya. Yaṁ appasannānaṁ pasādāya taṁ pasannānaṁ bhiyyobhāvāya. Yaṁ pasannānaṁ bhiyyobhāvāya taṁ saddhammaṭṭhitiyā. Yaṁ saddhammaṭṭhitiyā taṁ vinayānuggahāya.
1606 Yaṁ saṁghasuṭṭhu taṁ saṁghaphāsu. Yaṁ saṁghasuṭṭhu taṁ dummaṅkūnaṁ puggalānaṁ niggahāya. Yaṁ saṁghasuṭṭhu taṁ pesalānaṁ bhikkhūnaṁ phāsuvihārāya. Yaṁ saṁghasuṭṭhu taṁ diṭṭhadhammikānaṁ āsavānaṁ saṁvarāya. Yaṁ saṁghasuṭṭhu taṁ samparāyikānaṁ āsavānaṁ paṭighātāya. Yaṁ saṁghasuṭṭhu taṁ appasannānaṁ pasādāya. Yaṁ saṁghasuṭṭhu taṁ pasannānaṁ bhiyyobhāvāya. Yaṁ saṁghasuṭṭhu taṁ saddhammaṭṭhitiyā. Yaṁ saṁghasuṭṭhu taṁ vinayānuggahāya.
1607 Yaṁ saṁghaphāsu taṁ dummaṅkūnaṁ puggalānaṁ niggahāya. Yaṁ saṁghaphāsu taṁ pesalānaṁ bhikkhūnaṁ phāsuvihārāya. Yaṁ saṁghaphāsu taṁ diṭṭhadhammikānaṁ āsavānaṁ saṁvarāya. Yaṁ saṁghaphāsu taṁ samparāyikānaṁ āsavānaṁ paṭighātāya. Yaṁ saṁghaphāsu taṁ appasannānaṁ pasādāya. Yaṁ saṁghaphāsu taṁ pasannānaṁ bhiyyobhāvāya. Yaṁ saṁghaphāsu taṁ saddhammaṭṭhitiyā. Yaṁ saṁghaphāsu taṁ vinayānuggahāya. Yaṁ saṁghaphāsu taṁ saṁghasuṭṭhu.
1608 Yaṁ dummaṅkūnaṁ puggalānaṁ niggahāya…pe… yaṁ pesalānaṁ bhikkhūnaṁ phāsuvihārāya… yaṁ diṭṭhadhammikānaṁ āsavānaṁ saṁvarāya… yaṁ samparāyikānaṁ āsavānaṁ paṭighātāya… yaṁ appasannānaṁ pasādāya… yaṁ pasannānaṁ bhiyyobhāvāya… yaṁ saddhammaṭṭhitiyā… yaṁ vinayānuggahāya taṁ saṁghasuṭṭhu. Yaṁ vinayānuggahāya taṁ saṁghaphāsu. Yaṁ vinayānuggahāya taṁ dummaṅkūnaṁ puggalānaṁ niggahāya. Yaṁ vinayānuggahāya taṁ pesalānaṁ bhikkhūnaṁ phāsuvihārāya. Yaṁ vinayānuggahāya taṁ diṭṭhadhammikānaṁ āsavānaṁ saṁvarāya. Yaṁ vinayānuggahāya taṁ samparāyikānaṁ āsavānaṁ paṭighātāya. Yaṁ vinayānuggahāya taṁ appasannānaṁ pasādāya. Yaṁ vinayānuggahāya taṁ pasannānaṁ bhiyyobhāvāya. Yaṁ vinayānuggahāya taṁ saddhammaṭṭhitiyāti.
1609 Atthasataṁ dhammasataṁ,
dve ca niruttisatāni;
Cattāri ñāṇasatāni,
atthavase pakaraṇeti.
1610 Atthavasapakaraṇaṁ niṭṭhitaṁ.
Mahāvaggo niṭṭhito.
1611
1612 Paṭhamaṁ aṭṭhapucchāyaṁ,
paccayesu punaṭṭha ca;
Bhikkhūnaṁ soḷasa ete,
bhikkhunīnañca soḷasa.
1613 Peyyālaantarā bhedā,
ekuttarikameva ca;
Pavāraṇatthavasikā,
mahāvaggassa saṅgahoti.
1614 Atthavasapakaraṇaṁ niṭṭhitaṁ.