7.2 Dukavāra

Ekuttarikanaya

Dukavāra

322. 1446 ^[174] Atthāpatti saññā vimokkhā, atthāpatti no saññāvimokkhā. Atthāpatti laddhasamāpattikassa, atthāpatti na laddhasamāpattikassa. Atthāpatti saddhammapaṭisaññuttā, atthāpatti asaddhammapaṭisaññuttā. Atthāpatti saparikkhārapaṭisaññuttā, atthāpatti paraparikkhārapaṭisaññuttā. Atthāpatti sapuggalapaṭisaññuttā, atthāpatti parapuggalapaṭisaññuttā. Atthi saccaṁ bhaṇanto garukaṁ āpattiṁ āpajjati^[175], musā bhaṇanto lahukaṁ. Atthi musā bhaṇanto garukaṁ āpattiṁ āpajjati, saccaṁ bhaṇanto lahukaṁ. Atthāpatti bhūmigato āpajjati, no vehāsagato. Atthāpatti vehāsagato āpajjati, no bhūmigato. Atthāpatti nikkhamanto āpajjati, no pavisanto. Atthāpatti pavisanto āpajjati, no nikkhamanto. Atthāpatti ādiyanto āpajjati, atthāpatti anādiyanto āpajjati. Atthāpatti samādiyanto āpajjati, atthāpatti na samādiyanto āpajjati. Atthāpatti karonto āpajjati, atthāpatti na karonto āpajjati. Atthāpatti dento āpajjati, atthāpatti na dento āpajjati. Atthāpatti desento āpajjati, atthāpatti na desento āpajjati. Atthāpatti paṭiggaṇhanto āpajjati, atthāpatti na paṭiggaṇhanto āpajjati. Atthāpatti paribhogena āpajjati, atthāpatti na paribhogena āpajjati. Atthāpatti rattiṁ āpajjati, no divā. Atthāpatti divā āpajjati, no rattiṁ. Atthāpatti aruṇugge āpajjati, atthāpatti na aruṇugge āpajjati. Atthāpatti chindanto āpajjati, atthāpatti na chindanto āpajjati. Atthāpatti chādento āpajjati, atthāpatti na chādento āpajjati. Atthāpatti dhārento āpajjati, atthāpatti na dhārento āpajjati.

1447 Dve uposathā— cātuddasiko ca pannarasiko ca. Dve pavāraṇā— cātuddasikā ca pannarasikā ca. Dve kammāni— apalokanakammaṁ, ñattikammaṁ. Aparānipi dve kammāni— ñattidutiyakammaṁ, ñatticatutthakammaṁ. Dve kammavatthūni— apalokanakammassa vatthu, ñattikammassa vatthu. Aparānipi dve kammavatthūni— ñattidutiyakammassa vatthu, ñatticatutthakammassa vatthu. Dve kammadosā— apalokanakammassa doso, ñattikammassa doso. Aparepi dve kammadosā— ñattidutiyakammassa doso, ñatticatutthakammassa doso. Dve kammasampattiyo— apalokanakammassa sampatti, ñattikammassa sampatti. Aparāpi dve kammasampattiyo— ñattidutiyakammassa sampatti, ñatticatutthakammassa sampatti. Dve nānāsaṁvāsakabhūmiyo— attanā vā attānaṁ nānāsaṁvāsakaṁ karoti, samaggo vā naṁ saṁgho ukkhipati adassane vā appaṭikamme vā appaṭinissagge vā. Dve samānasaṁvāsakabhūmiyo— attanā vā attānaṁ samānasaṁvāsakaṁ karoti, samaggo vā naṁ saṁgho ukkhittaṁ osāreti dassane vā paṭikamme vā paṭinissagge vā. Dve pārājikā— bhikkhūnañca bhikkhunīnañca. Dve saṁghādisesā, dve thullaccayā, dve pācittiyā, dve pāṭidesanīyā, dve dukkaṭā, dve dubbhāsitā— bhikkhūnañca bhikkhunīnañca. Satta āpattiyo, satta āpattikkhandhā. Dvīhākārehi saṁgho bhijjati— kammena vā salākaggāhena vā.

1448 Dve puggalā na upasampādetabbā— addhānahīno, aṅgahīno. Aparepi dve puggalā na upasampādetabbā— vatthuvipanno, karaṇadukkaṭako. Aparepi dve puggalā na upasampādetabbā— aparipūro paripūro no ca yācati. Dvinnaṁ puggalānaṁ nissāya na vatthabbaṁ— alajjissa ca bālassa ca. Dvinnaṁ puggalānaṁ nissayo na dātabbo— alajjissa ca lajjino ca na yācati. Dvinnaṁ puggalānaṁ nissayo dātabbo— bālassa ca lajjissa ca yācati. Dve puggalā abhabbā āpattiṁ āpajjituṁ— buddhā ca paccekabuddhā ca. Dve puggalā bhabbā, āpattiṁ āpajjituṁ— bhikkhū ca bhikkhuniyo ca. Dve puggalā abhabbā sañcicca āpattiṁ āpajjituṁ— bhikkhū ca bhikkhuniyo ca ariyapuggalā. Dve puggalā bhabbā sañcicca āpattiṁ āpajjituṁ— bhikkhū ca bhikkhuniyo ca puthujjanā. Dve puggalā abhabbā sañcicca sātisāraṁ vatthuṁ ajjhācarituṁ— bhikkhū ca bhikkhuniyo ca ariyapuggalā. Dve puggalā bhabbā sañcicca sātisāraṁ vatthuṁ ajjhācarituṁ— bhikkhū ca bhikkhuniyo ca puthujjanā.

1449 Dve paṭikkosā— kāyena vā paṭikkosati vācāya vā paṭikkosati. Dve nissāraṇā— atthi puggalo appatto nissāraṇaṁ tañce saṁgho nissāreti ekacco sunissārito, ekacco dunnissārito. Dve osāraṇā— atthi puggalo appatto osāraṇaṁ tañce saṁgho osāreti ekacco sosārito, ekacco dosārito. Dve paṭiññā— kāyena vā paṭijānāti vācāya vā paṭijānāti. Dve paṭiggahā— kāyena vā paṭiggaṇhāti kāyapaṭibaddhena vā paṭiggaṇhāti. Dve paṭikkhepā— kāyena vā paṭikkhipati vācāya vā paṭikkhipati. Dve upaghātikā— sikkhūpaghātikā ca bhogūpaghātikā ca. Dve codanā— kāyena vā codeti vācāya vā codeti. Dve kathinassa palibodhā— āvāsapalibodho ca cīvarapalibodho ca. Dve kathinassa apalibodhā— āvāsaapalibodho ca cīvaraapalibodho ca. Dve cīvarāni— gahapatikañca paṁsukūlañca. Dve pattā— ayopatto mattikāpatto. Dve maṇḍalāni— tipumayaṁ, sīsamayaṁ. Dve pattassa adhiṭṭhānā— kāyena vā adhiṭṭheti vācāya vā adhiṭṭheti. Dve cīvarassa adhiṭṭhānā— kāyena vā adhiṭṭheti vācāya vā adhiṭṭheti. Dve vikappanā— sammukhāvikappanā ca parammukhāvikappanā ca. Dve vinayā— bhikkhūnañca bhikkhunīnañca. Dve venayikā— paññattañca paññattānulomañca. Dve vinayassa sallekhā— akappiye setughāto, kappiye mattakāritā. Dvīhākārehi āpattiṁ āpajjati— kāyena vā āpajjati vācāya vā āpajjati. Dvīhākārehi āpattiyā vuṭṭhāti— kāyena vā vuṭṭhāti vācāya vā vuṭṭhāti. Dve parivāsā— paṭicchannaparivāso, appaṭicchannaparivāso. Aparepi dve parivāsā— suddhantaparivāso samodhānaparivāso. Dve mānattā— paṭicchannamānattaṁ, appaṭicchannamānattaṁ. Aparepi dve mānattā— pakkhamānattaṁ, samodhānamānattaṁ. Dvinnaṁ puggalānaṁ ratticchedo— pārivāsikassa ca mānattacārikassa ca. Dve anādariyāni— puggalānādariyañca dhammānādariyañca. Dve loṇāni— jātimañca kārimañca^[176]. Aparānipi dve loṇāni— sāmuddaṁ kāḷaloṇaṁ. Aparānipi dve loṇāni— sindhavaṁ, ubbhidaṁ^[177]. Aparānipi dve loṇāni— romakaṁ, pakkālakaṁ. Dve paribhogā— abbhantaraparibhogo ca bāhiraparibhogo ca. Dve akkosā— hīno ca akkoso ukkaṭṭho ca akkoso. Dvīhākārehi pesuññaṁ hoti— piyakamyassa vā bhedādhippāyassa vā. Dvīhākārehi gaṇabhojanaṁ pasavati— nimantanato vā viññattito vā. Dve vassūpanāyikā— purimikā, pacchimikā. Dve adhammikāni pātimokkhaṭṭhapanāni. Dve dhammikāni pātimokkhaṭṭhapanāni.

1450 ^[178] Dve puggalā bālā— yo ca anāgataṁ bhāraṁ vahati, yo ca āgataṁ bhāraṁ na vahati. Dve puggalā paṇḍitā— yo ca anāgataṁ bhāraṁ na vahati, yo ca āgataṁ bhāraṁ vahati. Aparepi dve puggalā bālā— yo ca akappiye kappiyasaññī, yo ca kappiye akappiyasaññī. Dve puggalā paṇḍitā— yo ca akappiye akappiyasaññī, yo ca kappiye kappiyasaññī. Aparepi dve puggalā bālā— yo ca anāpattiyā āpattisaññī, yo ca āpattiyā anāpattisaññī. Dve puggalā paṇḍitā— yo ca āpattiyā āpattisaññī, yo ca anāpattiyā anāpattisaññī. Aparepi dve puggalā bālā— yo ca adhamme dhammasaññī, yo ca dhamme adhammasaññī. Dve puggalā paṇḍitā— yo ca adhamme adhammasaññī, yo ca dhamme dhammasaññī. Aparepi dve puggalā bālā— yo ca avinaye vinayasaññī, yo ca vinaye avinayasaññī. Dve puggalā paṇḍitā— yo ca avinaye avinayasaññī, yo ca vinaye vinayasaññī.

1451 ^[179] Dvinnaṁ puggalānaṁ āsavā vaḍḍhanti— yo ca na kukkuccāyitabbaṁ kukkuccāyati, yo ca kukkuccāyitabbaṁ na kukkuccāyati. Dvinnaṁ puggalānaṁ āsavā na vaḍḍhanti— yo ca na kukkuccāyitabbaṁ na kukkuccāyati, yo ca kukkuccāyitabbaṁ kukkuccāyati. Aparesampi dvinnaṁ puggalānaṁ āsavā vaḍḍhanti— yo ca akappiye kappiyasaññī, yo ca kappiye akappiyasaññī. Dvinnaṁ puggalānaṁ āsavā na vaḍḍhanti— yo ca akappiye akappiyasaññī, yo ca kappiye kappiyasaññī. Aparesampi dvinnaṁ puggalānaṁ āsavā vaḍḍhanti— yo ca anāpattiyā āpattisaññī, yo ca āpattiyā anāpattisaññī. Dvinnaṁ puggalānaṁ āsavā na vaḍḍhanti— yo ca anāpattiyā anāpattisaññī, yo ca āpattiyā āpattisaññī. Aparesampi dvinnaṁ puggalānaṁ āsavā vaḍḍhanti— yo ca adhamme dhammasaññī, yo ca dhamme adhammasaññī. Dvinnaṁ puggalānaṁ āsavā na vaḍḍhanti— yo ca adhamme adhammasaññī, yo ca dhamme dhammasaññī. Aparesampi dvinnaṁ puggalānaṁ āsavā vaḍḍhanti— yo ca avinaye vinayasaññī, yo ca vinaye avinayasaññī. Dvinnaṁ puggalānaṁ āsavā na vaḍḍhanti— yo ca avinaye avinayasaññī, yo ca vinaye vinayasaññī.

1452 Dukā niṭṭhitā.

1453

1454 Saññā laddhā ca saddhammā,
parikkhārā ca puggalā;
Saccaṁ bhūmi nikkhamanto,
ādiyanto samādiyaṁ.

1455 Karonto dento gaṇhanto,
paribhogena ratti ca;
Aruṇāchindaṁ chādento,
dhārento ca uposathā.

1456 Pavāraṇā kammāparā,
vatthu aparā dosā ca;
Aparā dve ca sampatti,
nānā samānameva ca.

1457 Pārājisaṁghathullaccaya,
pācitti pāṭidesanā;
Dukkaṭā dubbhāsitā ceva^[181],
satta āpattikkhandhā ca. ^[180]

1458 Bhijjati upasampadā,
tatheva apare duve;
Na vatthabbaṁ na dātabbaṁ,
abhabbābhabbameva ca.

1459 Sañcicca sātisārā ca,
paṭikkosā nissāraṇā;
Osāraṇā paṭiññā ca,
paṭiggahā paṭikkhipā.

1460 Upaghāti codanā ca,
kathinā ca duve tathā;
Cīvarā pattamaṇḍalā,
adhiṭṭhānā tatheva dve.

1461 Vikappanā ca vinayā,
venayikā ca sallekhā;
Āpajjati ca vuṭṭhāti,
parivāsāpare duve.

1462 Dve mānattā apare ca,
ratticchedo anādari;
Dve loṇā tayo apare,
paribhogakkosena ca.

1463 Pesuñño ca gaṇāvassa,
ṭhapanā bhārakappiyaṁ;
Anāpatti adhammadhammā,
vinaye āsave tathāti.