Antarapeyyāla
Vipattipaccayavāra
284. 1215 Sīlavipattipaccayā kati āpattiyo āpajjati? Sīlavipattipaccayā catasso āpattiyo āpajjati— bhikkhunī jānaṁ pārājikaṁ dhammaṁ paṭicchādeti, āpatti pārājikassa; vematikā paṭicchādeti, āpatti thullaccayassa; bhikkhu saṁghādisesaṁ paṭicchādeti, āpatti pācittiyassa; attano duṭṭhullaṁ āpattiṁ paṭicchādeti, āpatti dukkaṭassa— sīlavipattipaccayā imā catasso āpattiyo āpajjati.
1216 Tā āpattiyo catunnaṁ vipattīnaṁ kati vipattiyo bhajanti…pe… sattannaṁ samathānaṁ katihi samathehi sammanti? Tā āpattiyo catunnaṁ vipattīnaṁ dve vipattiyo bhajanti— siyā sīlavipattiṁ, siyā ācāravipattiṁ. Sattannaṁ āpattikkhandhānaṁ catūhi āpattikkhandhehi saṅgahitā— siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṁ āpattisamuṭṭhānānaṁ ekena samuṭṭhānena samuṭṭhanti— kāyato ca vācato ca cittato ca samuṭṭhanti. Catunnaṁ adhikaraṇānaṁ, āpattādhikaraṇaṁ. Sattannaṁ samathānaṁ tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca. (1)
285. 1217 Ācāravipattipaccayā kati āpattiyo āpajjati? Ācāravipattipaccayā ekaṁ āpattiṁ āpajjati. Ācāravipattiṁ paṭicchādeti, āpatti dukkaṭassa— ācāravipattipaccayā imaṁ ekaṁ āpattiṁ āpajjati.
1218 Sā āpatti catunnaṁ vipattīnaṁ kati vipattiyo bhajati…pe… sattannaṁ samathānaṁ katihi samathehi sammati? Sā āpatti catunnaṁ vipattīnaṁ ekaṁ vipattiṁ bhajati— ācāravipattiṁ. Sattannaṁ āpattikkhandhānaṁ ekena āpattikkhandhena saṅgahitā— dukkaṭāpattikkhandhena. Channaṁ āpattisamuṭṭhānānaṁ ekena samuṭṭhānena samuṭṭhāti— kāyato ca vācato ca cittato ca samuṭṭhāti. Catunnaṁ adhikaraṇānaṁ āpattādhikaraṇaṁ. Sattannaṁ samathānaṁ tīhi samathehi sammati— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca. (2)
286. 1219 Diṭṭhivipattipaccayā kati āpattiyo āpajjati? Diṭṭhivipattipaccayā dve āpattiyo āpajjati. Pāpikāya diṭṭhiyā yāvatatiyaṁ samanubhāsanāya na paṭinissajjati, ñattiyā dukkaṭaṁ[147]; kammavācāpariyosāne āpatti pācittiyassa— diṭṭhivipattipaccayā imā dve āpattiyo āpajjati.
1220 Tā āpattiyo catunnaṁ vipattīnaṁ kati vipattiyo bhajanti…pe… sattannaṁ samathānaṁ katihi samathehi sammanti? Tā āpattiyo catunnaṁ vipattīnaṁ ekaṁ vipattiṁ bhajanti— ācāravipattiṁ. Sattannaṁ āpattikkhandhānaṁ dvīhi āpattikkhandhehi saṅgahitā— siyā pācittiyāpattikkhandhena, siyā dukkaṭāpattikkhandhena. Channaṁ āpattisamuṭṭhānānaṁ ekena samuṭṭhānena samuṭṭhanti— kāyato ca vācato ca cittato ca samuṭṭhanti. Catunnaṁ adhikaraṇānaṁ, āpattādhikaraṇaṁ. Sattannaṁ samathānaṁ tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca. (3)
287. 1221 Ājīvavipattipaccayā kati āpattiyo āpajjati? Ājīvavipattipaccayā cha āpattiyo āpajjati— ājīvahetu ājīvakāraṇā pāpiccho icchāpakato asantaṁ abhūtaṁ uttarimanussadhammaṁ ullapati, āpatti pārājikassa; ājīvahetu ājīvakāraṇā sañcarittaṁ samāpajjati, āpatti saṁghādisesassa; ājīvahetu ājīvakāraṇā “yo te vihāre vasati, so bhikkhu arahā”ti bhaṇati, paṭivijānantassa āpatti thullaccayassa; ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati, āpatti pācittiyassa; ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati, āpatti pāṭidesanīyassa; ājīvahetu ājīvakāraṇā sūpaṁ vā odanaṁ vā agilāno attano atthāya viññāpetvā bhuñjati, āpatti dukkaṭassa— ājīvavipattipaccayā imā cha āpattiyo āpajjati.
1222 Tā āpattiyo catunnaṁ vipattīnaṁ kati vipattiyo bhajanti…pe… sattannaṁ samathānaṁ katihi samathehi sammanti. Tā āpattiyo catunnaṁ vipattīnaṁ dve vipattiyo bhajanti— siyā sīlavipattiṁ, siyā ācāravipattiṁ. Sattannaṁ āpattikkhandhānaṁ chahi āpattikkhandhehi saṅgahitā— siyā pārājikāpattikkhandhena, siyā saṁghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā pāṭidesanīyāpattikkhandhena, siyā dukkaṭāpattikkhandhena. Channaṁ āpattisamuṭṭhānānaṁ chahi samuṭṭhānehi samuṭṭhanti— siyā kāyato samuṭṭhanti, na vācato na cittato; siyā vācato samuṭṭhanti, na kāyato na cittato; siyā kāyato ca vācato ca samuṭṭhanti, na cittato; siyā kāyato ca cittato ca samuṭṭhanti, na vācato; siyā vācato ca cittato ca samuṭṭhanti, na kāyato; siyā kāyato ca vācato ca cittato ca samuṭṭhanti. Catunnaṁ adhikaraṇānaṁ, āpattādhikaraṇaṁ. Sattannaṁ samathānaṁ tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca. (4)
1223 Vipattipaccayavāro niṭṭhito catuttho.
- dukkaṭaṁ: ñattiyā dukkaṭaṁ, dvīhi kammavācāhi dukkaṭā (syā1-3, ka-ma) (Word Variant) ↩