3.2.4 Samanubhāsanāsamuṭṭhāna

261.

1111 Bhedānuvattadubbaca-

dūsaduṭṭhulladiṭṭhi ca;

Chandaṃ ujjagghikā dve ca,

dve ca saddā na byāhare.

1112 Chamā nīcāsane ṭhānaṃ,

pacchato uppathena ca;

Vajjānuvattigahaṇā,

osāre paccācikkhanā.

1113 Kismiṃ saṃsaṭṭhā dve vadhi,

Visibbe dukkhitāya ca;

Puna saṃsaṭṭhā na vūpasame,

Ārāmañca pavāraṇā.

1114 Anvaddhaṃ saha jīviniṃ dve,

Cīvaraṃ anubandhanā;

Sattatiṃsa ime dhammā,

Kāyavācāya cittato;

Sabbe ekasamuṭṭhānā,

Samanubhāsanā yathā.

1115 Samanubhāsanāsamuṭṭhānaṃ niṭṭhitaṃ.