19.2 Desanāgāminiyādiāpatti

Dutiyagāthāsaṅgaṇika

Desanāgāminiyādiāpatti

475. 2242 Kati desanāgāminiyo,
Kati sappaṭikammā katā;
Katettha appaṭikammā vuttā,
Buddhenādiccabandhunā.

2243 Pañca desanāgāminiyo,
Cha sappaṭikammā katā;
Ekettha appaṭikammā vuttā,
Buddhenādiccabandhunā.

2244 Vinayagarukā kati vuttā,
Kāyavācasikāni ca;
Kati vikāle dhaññaraso,
Kati ñatticatutthena sammuti.

2245 Vinayagarukā dve vuttā,
Kāyavācasikāni ca;
Eko vikāle dhaññaraso,
Ekā ñatticatutthena sammuti.

2246 Pārājikā kāyikā kati,
kati saṁvāsakabhūmiyo;
Katinaṁ ratticchedo,
paññattā dvaṅgulā kati. ^[359]

2247 Pārājikā kāyikā dve,
dve saṁvāsakabhūmiyo;
Dvinnaṁ ratticchedo,
paññattā dvaṅgulā duve.

2248 Katattānaṁ vadhitvāna,
katihi saṁgho bhijjati;
Katettha paṭhamāpattikā,
ñattiyā karaṇā kati.

2249 Dve attānaṁ vadhitvāna,
dvīhi saṁgho bhijjati;
Dvettha paṭhamāpattikā,
ñattiyā karaṇā duve.

2250 Pāṇātipāte kati āpattiyo,
Vācā pārājikā kati;
Obhāsanā kati vuttā,
Sañcarittena vā kati.

2251 Pāṇātipāte tisso āpattiyo,
Vācā pārājikā tayo;
Obhāsanā tayo vuttā,
Sañcarittena vā tayo.

2252 Kati puggalā na upasampādetabbā,
Kati kammānaṁ saṅgahā;
Nāsitakā kati vuttā,
Katinaṁ ekavācikā.

2253 Tayo puggalā na upasampādetabbā,
Tayo kammānaṁ saṅgahā;
Nāsitakā tayo vuttā,
Tiṇṇannaṁ ekavācikā.

2254 Adinnādāne kati āpattiyo,
Kati methunapaccayā;
Chindantassa kati āpattiyo,
Kati chaḍḍitapaccayā.

2255 Adinnādāne tisso āpattiyo,
Catasso methunapaccayā;
Chindantassa tisso āpattiyo,
Pañca chaḍḍitapaccayā.

2256 Bhikkhunovādakavaggasmiṁ,
pācittiyena dukkaṭā;
Katettha navakā vuttā,
katinaṁ cīvarena ca.

2257 Bhikkhunovādakavaggasmiṁ,
Pācittiyena dukkaṭā katā;
Caturettha navakā vuttā,
Dvinnaṁ cīvarena ca.

2258 Bhikkhunīnañca akkhātā,
Pāṭidesaniyā kati;
Bhuñjantāmakadhaññena,
Pācittiyena dukkaṭā kati.

2259 Bhikkhunīnañca akkhātā,
Aṭṭha pāṭidesanīyā katā;
Bhuñjantāmakadhaññena,
Pācittiyena dukkaṭā katā.

2260 Gacchantassa kati āpattiyo,
Ṭhitassa cāpi kittakā;
Nisinnassa kati āpattiyo,
Nipannassāpi kittakā.

2261 Gacchantassa catasso āpattiyo,
Ṭhitassa cāpi tattakā;
Nisinnassa catasso āpattiyo,
Nipannassāpi tattakā.