Upālipañcaka
Musāvādavagga
444. 2069 “Kati nu kho, bhante, musāvādā”ti? “Pañcime, upāli, musāvādā. Katame pañca? Atthi musāvādo pārājikagāmī, atthi musāvādo saṁghādisesagāmī, atthi musāvādo thullaccayagāmī, atthi musāvādo pācittiyagāmī, atthi musāvādo dukkaṭagāmī— ime kho, upāli, pañca musāvādā”ti.
445. 2070 “Katihi nu kho, bhante, aṅgehi samannāgatassa bhikkhuno saṁghamajjhe uposathaṁ vā pavāraṇaṁ vā ṭhapentassa— ‘alaṁ, bhikkhu, mā bhaṇḍanaṁ, mā kalahaṁ, mā viggahaṁ, mā vivādan’ti omadditvā saṁghena uposatho vā pavāraṇā vā kātabbā”ti?
2071 “Pañcahupāli, aṅgehi samannāgatassa bhikkhuno saṁghamajjhe uposathaṁ vā pavāraṇaṁ vā ṭhapentassa— ‘alaṁ, bhikkhu, mā bhaṇḍanaṁ, mā kalahaṁ, mā viggahaṁ, mā vivādan’ti omadditvā saṁghena uposatho vā pavāraṇā vā kātabbā. Katamehi pañcahi? Alajjī ca hoti, bālo ca, apakatatto ca, cāvanādhippāyo vattā hoti, no vuṭṭhānādhippāyo— imehi kho, upāli, pañcahaṅgehi samannāgatassa bhikkhuno saṁghamajjhe uposathaṁ vā pavāraṇaṁ vā ṭhapentassa— ‘alaṁ, bhikkhu, mā bhaṇḍanaṁ, mā kalahaṁ, mā viggahaṁ, mā vivādan’ti omadditvā saṁghena uposatho vā pavāraṇā vā kātabbā.
2072 Aparehipi, upāli, pañcahaṅgehi samannāgatassa bhikkhuno saṁghamajjhe uposathaṁ vā pavāraṇaṁ vā ṭhapentassa— ‘alaṁ, bhikkhu, mā bhaṇḍanaṁ, mā kalahaṁ, mā viggahaṁ, mā vivādan’ti omadditvā saṁghena uposatho vā pavāraṇā vā kātabbā. Katamehi pañcahi? Aparisuddhakāyasamācāro hoti, aparisuddhavacīsamācāro hoti, aparisuddhājīvo hoti, bālo hoti abyatto, bhaṇḍanakārako hoti kalahakārako— imehi kho, upāli, pañcahaṅgehi samannāgatassa bhikkhuno saṁghamajjhe uposathaṁ vā pavāraṇaṁ vā ṭhapentassa— ‘alaṁ, bhikkhu, mā bhaṇḍanaṁ, mā kalahaṁ, mā viggahaṁ, mā vivādan’ti omadditvā saṁghena uposatho vā pavāraṇā vā kātabbā”ti.
446. 2073 “Katihi nu kho, bhante, aṅgehi samannāgatassa bhikkhuno anuyogo na dātabbo”ti?
2074 “Pañcahupāli, aṅgehi samannāgatassa bhikkhuno anuyogo na dātabbo. Katamehi pañcahi? Āpattānāpattiṁ na jānāti, lahukagarukaṁ āpattiṁ na jānāti, sāvasesānavasesaṁ āpattiṁ na jānāti, duṭṭhullāduṭṭhullaṁ āpattiṁ na jānāti, sappaṭikammāpaṭikammaṁ āpattiṁ na jānāti— imehi kho, upāli, pañcahaṅgehi samannāgatassa bhikkhuno anuyogo na dātabbo.
2075 Pañcahupāli, aṅgehi samannāgatassa bhikkhuno anuyogo dātabbo. Katamehi pañcahi? Āpattānāpattiṁ jānāti, lahukagarukaṁ āpattiṁ jānāti, sāvasesānavasesaṁ āpattiṁ jānāti, duṭṭhullāduṭṭhullaṁ āpattiṁ jānāti, sappaṭikammāpaṭikammaṁ āpattiṁ jānāti— imehi kho, upāli, pañcahaṅgehi samannāgatassa bhikkhuno anuyogo dātabbo”ti.
447. 2076 “Katihi nu kho, bhante, ākārehi bhikkhu āpattiṁ āpajjatī”ti? “Pañcahupāli, ākārehi bhikkhu āpattiṁ āpajjati. Katamehi pañcahi? Alajjitā, aññāṇatā, kukkuccapakatatā, akappiye kappiyasaññitā, kappiye akappiyasaññitā— imehi kho, upāli, pañcahākārehi bhikkhu āpattiṁ āpajjati.
2077 Aparehipi, upāli, pañcahākārehi bhikkhu āpattiṁ āpajjati. Katamehi pañcahi? Adassanena, assavanena, pasuttakatā, tathāsaññī, satisammosā— imehi kho, upāli, pañcahākārehi bhikkhu āpattiṁ āpajjatī”ti.
448. 2078 “Kati nu kho, bhante, verā”ti? “Pañcime, upāli, verā. Katame pañca? Pāṇātipāto, adinnādānaṁ, kāmesumicchācāro, musāvādo, surāmerayamajjappamādaṭṭhānaṁ— ime kho, upāli, pañca verā”ti.
2079 “Kati nu kho, bhante, veramaṇiyo”ti? “Pañcimā, upāli, veramaṇiyo. Katamā pañca? Pāṇātipātā veramaṇī[348], adinnādānā veramaṇī, kāmesumicchācārā veramaṇī, musāvādā veramaṇī, surāmerayamajjappamādaṭṭhānā veramaṇī— imā kho, upāli, pañca veramaṇiyo”ti.
449. 2080 [349] “Kati nu kho, bhante, byasanānī”ti? “Pañcimāni, upāli, byasanāni. Katamāni pañca? Ñātibyasanaṁ, bhogabyasanaṁ, rogabyasanaṁ, sīlabyasanaṁ, diṭṭhibyasanaṁ— imāni kho, upāli, pañca byasanānī”ti.
2081 [350] “Kati nu kho, bhante, sampadā”ti? “Pañcimā, upāli, sampadā. Katamā pañca? Ñātisampadā, bhogasampadā, ārogyasampadā, sīlasampadā, diṭṭhisampadā— imā kho, upāli, pañca sampadā”ti.
2082 Musāvādavaggo niṭṭhito sattamo.
2083
2084 Musāvādo ca omaddi,
aparehi anuyogo;
Āpattiñca aparehi,
verā veramaṇīpi ca;
Byasanaṁ sampadā ceva,
sattamo vaggasaṅgahoti.