Upālipañcaka
Dutiyasaṃghabhedakavagga
460. 2151 [355] “Katihi nu kho, bhante, aṅgehi samannāgato saṁghabhedako na āpāyiko na nerayiko na kappaṭṭho na atekiccho”ti?
2152 “Pañcahupāli, aṅgehi samannāgato saṁghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṁ dhammoti dīpeti, dhammaṁ adhammoti dīpeti, avinayaṁ vinayoti dīpeti, vinayaṁ avinayoti dīpeti, avinidhāya diṭṭhiṁ kammena— imehi kho, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho.
2153 Aparehipi, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṁ dhammoti dīpeti, dhammaṁ adhammoti dīpeti, avinayaṁ vinayoti dīpeti, vinayaṁ avinayoti dīpeti, avinidhāya diṭṭhiṁ uddesena— imehi kho, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho.
2154 Aparehipi, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṁ dhammoti dīpeti, dhammaṁ adhammoti dīpeti, avinayaṁ vinayoti dīpeti, vinayaṁ avinayoti dīpeti, avinidhāya diṭṭhiṁ voharanto. Imehi kho, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho.
2155 Aparehipi, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṁ dhammoti dīpeti, dhammaṁ adhammoti dīpeti, avinayaṁ vinayoti dīpeti, vinayaṁ avinayoti dīpeti, avinidhāya diṭṭhiṁ anussāvanena— imehi kho, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho.
2156 Aparehipi, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṁ dhammoti dīpeti, dhammaṁ adhammoti dīpeti, avinayaṁ vinayoti dīpeti, vinayaṁ avinayoti dīpeti, avinidhāya diṭṭhiṁ salākaggāhena— imehi kho, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho.
2157 Aparehipi, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṁ dhammoti dīpeti, dhammaṁ adhammoti dīpeti, avinayaṁ vinayoti dīpeti, vinayaṁ avinayoti dīpeti, avinidhāya khantiṁ kammena…pe… avinidhāya khantiṁ uddesena…pe… avinidhāya khantiṁ voharanto…pe… avinidhāya khantiṁ anussāvanena…pe… avinidhāya khantiṁ salākaggāhena— imehi kho, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho.
2158 Aparehipi, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṁ dhammoti dīpeti, dhammaṁ adhammoti dīpeti, avinayaṁ vinayoti dīpeti, vinayaṁ avinayoti dīpeti, avinidhāya ruciṁ kammena…pe… avinidhāya ruciṁ uddesena…pe… avinidhāya ruciṁ voharanto…pe… avinidhāya ruciṁ anussāvanena…pe… avinidhāya ruciṁ salākaggāhena— imehi kho, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho.
2159 Aparehipi, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṁ dhammoti dīpeti, dhammaṁ adhammoti dīpeti, avinayaṁ vinayoti dīpeti, vinayaṁ avinayoti dīpeti, avinidhāya saññaṁ kammena…pe… avinidhāya saññaṁ uddesena…pe… avinidhāya saññaṁ voharanto…pe… avinidhāya saññaṁ anussāvanena…pe… avinidhāya saññaṁ salākaggāhena— imehi kho, upāli, pañcahaṅgehi samannāgato saṁghabhedako na āpāyiko na nerayiko na kappaṭṭho na atekiccho”ti.
2160 Dutiyasaṁghabhedakavaggo niṭṭhito dvādasamo.
2161
2162 Avinidhāya diṭṭhiṁ kammena,
Uddese voharena ca;
Anussāvane salākena,
Pañcete diṭṭhinissitā;
Khantiṁ ruciñca saññañca,
Tayo te pañcadhā nayā.
2163 Heṭṭhime kaṇhapakkhamhi,
samavīsati vidhī yathā;
Tatheva sukkapakkhamhi,
samavīsati jānathāti.