Kathinabheda
Kathinādijānitabbavibhāga
412. 1904 Kathinaṁ jānitabbaṁ, kathinatthāro jānitabbo, kathinassa atthāramāso jānitabbo, kathinassa atthāravipatti jānitabbā, kathinassa atthārasampatti jānitabbā, nimittakammaṁ jānitabbaṁ, parikathā jānitabbā, kukkukataṁ jānitabbaṁ, sannidhi jānitabbā, nissaggiyaṁ jānitabbaṁ.
1905 Kathinaṁ jānitabbanti tesaññeva dhammānaṁ saṅgaho samavāyo nāmaṁ nāmakammaṁ nāmadheyyaṁ nirutti byañjanaṁ abhilāpo yadidaṁ kathinanti.
1906 Kathinassa atthāramāso jānitabboti vassānassa pacchimo māso jānitabbo.
1907 Kathinassa atthāravipatti jānitabbāti catuvīsatiyā ākārehi kathinassa atthāravipatti jānitabbā.
1908 Kathinassa atthārasampatti jānitabbāti sattarasahi ākārehi kathinassa atthārasampatti jānitabbā.
1909 Nimittakammaṁ jānitabbanti nimittaṁ karoti iminā dussena kathinaṁ attharissāmīti.
1910 Parikathā jānitabbāti parikathaṁ karoti imāya parikathāya kathinadussaṁ nibbattessāmīti.
1911 Kukkukataṁ jānitabbanti anādiyadānaṁ jānitabbaṁ.
1912 Sannidhi jānitabbāti dve sannidhiyo jānitabbā— karaṇasannidhi vā nicayasannidhi vā.
1913 Nissaggiyaṁ jānitabbanti kariyamāne aruṇaṁ uṭṭhahati[323].
1914 Kathinatthāro jānitabboti sace saṁghassa kathinadussaṁ uppannaṁ hoti, saṁghena kathaṁ paṭipajjitabbaṁ, atthārakena kathaṁ paṭipajjitabbaṁ, anumodakena kathaṁ paṭipajjitabbaṁ.
413. 1915 Saṁghena ñattidutiyena kammena kathinatthārakassa bhikkhuno dātabbaṁ, tena kathinatthārakena bhikkhunā tadaheva dhovitvā vimajjitvā vicāretvā chinditvā sibbetvā rajitvā kappaṁ katvā kathinaṁ attharitabbaṁ. Sace saṅghāṭiyā kathinaṁ attharitukāmo hoti, porāṇikā saṅghāṭi paccuddharitabbā, navā saṅghāṭi adhiṭṭhātabbā. Imāya saṅghāṭiyā kathinaṁ attharāmīti vācā bhinditabbā. Sace uttarāsaṅgena kathinaṁ attharitukāmo hoti, porāṇako uttarāsaṅgo paccuddharitabbo, navo uttarāsaṅgo adhiṭṭhātabbo. Iminā uttarāsaṅgena kathinaṁ attharāmīti vācā bhinditabbā. Sace antaravāsakena kathinaṁ attharitukāmo hoti, porāṇako antaravāsako paccuddharitabbo, navo antaravāsako adhiṭṭhātabbo. Iminā antaravāsakena kathinaṁ attharāmīti vācā bhinditabbā. Tena kathinatthārakena bhikkhunā saṁghaṁ upasaṅkamitvā ekaṁsaṁ uttarāsaṅgaṁ karitvā añjaliṁ paggahetvā evamassa vacanīyo— “atthataṁ, bhante, saṁghassa kathinaṁ, dhammiko kathinatthāro, anumodathā”ti. Tehi anumodakehi bhikkhūhi ekaṁsaṁ uttarāsaṅgaṁ karitvā añjaliṁ paggahetvā evamassa vacanīyo— “atthataṁ, āvuso, saṁghassa kathinaṁ, dhammiko kathinatthāro, anumodāmā”ti. Tena kathinatthārakena bhikkhunā sambahule bhikkhū upasaṅkamitvā ekaṁsaṁ uttarāsaṅgaṁ karitvā añjaliṁ paggahetvā evamassu vacanīyā— “atthataṁ, bhante, saṁghassa kathinaṁ, dhammiko kathinatthāro, anumodathā”ti. Tehi anumodakehi bhikkhūhi ekaṁsaṁ uttarāsaṅgaṁ karitvā añjaliṁ paggahetvā evamassa vacanīyo— “atthataṁ, āvuso, saṁghassa kathinaṁ, dhammiko kathinatthāro anumodāmā”ti. Tena kathinatthārakena bhikkhunā ekaṁ bhikkhuṁ upasaṅkamitvā ekaṁsaṁ uttarāsaṅgaṁ karitvā añjaliṁ paggahetvā evamassa vacanīyo— “atthataṁ, āvuso, saṁghassa kathinaṁ, dhammiko kathinatthāro, anumodāhī”ti. Tena anumodakena bhikkhunā ekaṁsaṁ uttarāsaṅgaṁ karitvā añjaliṁ paggahetvā evamassa vacanīyo— “atthataṁ, āvuso, saṁghassa kathinaṁ, dhammiko kathinatthāro, anumodāmī”ti.
- uṭṭhahati: udrīyati (sī), udriyati (syā1-3, pā1) (Word Variant) ↩