16.3 Pubbakaraṇanidānādivibhāga

Kathinabheda

Pubbakaraṇanidānādivibhāga

405. 1889 Pubbakaraṇaṁ kiṁnidānaṁ, kiṁsamudayaṁ, kiṁjātikaṁ, kiṁpabhavaṁ, kiṁsambhāraṁ, kiṁsamuṭṭhānaṁ? Paccuddhāro kiṁnidāno, kiṁsamudayo, kiṁjātiko, kiṁpabhavo, kiṁsambhāro, kiṁsamuṭṭhāno? Adhiṭṭhānaṁ kiṁnidānaṁ, kiṁsamudayaṁ, kiṁjātikaṁ, kiṁpabhavaṁ, kiṁsambhāraṁ, kiṁsamuṭṭhānaṁ? Atthāro kiṁnidāno, kiṁsamudayo, kiṁjātiko, kiṁpabhavo, kiṁsambhāro, kiṁsamuṭṭhāno? Mātikā ca palibodhā ca kiṁnidānā, kiṁsamudayā, kiṁjātikā, kiṁpabhavā, kiṁsambhārā kiṁsamuṭṭhānā? Āsā ca anāsā ca kiṁnidānā, kiṁsamudayā, kiṁjātikā, kiṁpabhavā, kiṁsambhārā, kiṁsamuṭṭhānā?

1890 Pubbakaraṇaṁ payoganidānaṁ, payogasamudayaṁ, payogajātikaṁ, payogapabhavaṁ, payogasambhāraṁ, payogasamuṭṭhānaṁ. Paccuddhāro pubbakaraṇanidāno, pubbakaraṇasamudayo, pubbakaraṇajātiko, pubbakaraṇapabhavo, pubbakaraṇasambhāro, pubbakaraṇasamuṭṭhāno. Adhiṭṭhānaṁ paccuddhāranidānaṁ, paccuddhārasamudayaṁ, paccuddhārajātikaṁ, paccuddhārapabhavaṁ, paccuddhārasambhāraṁ, paccuddhārasamuṭṭhānaṁ. Atthāro adhiṭṭhānanidāno, adhiṭṭhānasamudayo, adhiṭṭhānajātiko, adhiṭṭhānapabhavo, adhiṭṭhānasambhāro, adhiṭṭhānasamuṭṭhāno. Mātikā ca palibodhā ca atthāranidānā, atthārasamudayā, atthārajātikā, atthārapabhavā, atthārasambhārā, atthārasamuṭṭhānā. Āsā ca anāsā ca vatthunidānā, vatthusamudayā, vatthujātikā, vatthupabhavā, vatthusambhārā, vatthusamuṭṭhānā.

406. 1891 Payogo kiṁnidāno, kiṁsamudayo, kiṁjātiko, kiṁpabhavo, kiṁsambhāro, kiṁsamuṭṭhāno, pubbakaraṇaṁ…pe… paccuddhāro… adhiṭṭhānaṁ… atthāro… mātikā ca palibodhā ca… vatthu… āsā ca anāsā ca kiṁnidānā, kiṁsamudayā, kiṁjātikā, kiṁpabhavā, kiṁsambhārā, kiṁsamuṭṭhānā?

1892 Payogo hetunidāno, hetusamudayo, hetujātiko, hetupabhavo, hetusambhāro, hetusamuṭṭhāno. Pubbakaraṇaṁ…pe… paccuddhāro… adhiṭṭhānaṁ… atthāro… mātikā ca palibodhā ca… vatthu… āsā ca anāsā ca hetunidānā, hetusamudayā, hetujātikā, hetupabhavā, hetusambhārā, hetusamuṭṭhānā.

407. 1893 Payogo kiṁnidāno, kiṁsamudayo, kiṁjātiko, kiṁpabhavo, kiṁsambhāro, kiṁsamuṭṭhāno? Pubbakaraṇaṁ…pe… paccuddhāro… adhiṭṭhānaṁ… atthāro… mātikā ca palibodhā ca… vatthu… āsā ca anāsā ca kiṁnidānā, kiṁsamudayā, kiṁjātikā, kiṁpabhavā, kiṁsambhārā, kiṁsamuṭṭhānā?

1894 Payogo paccayanidāno, paccayasamudayo, paccayajātiko, paccayapabhavo, paccayasambhāro, paccayasamuṭṭhāno. Pubbakaraṇaṁ…pe… paccuddhāro… adhiṭṭhānaṁ… atthāro… mātikā ca palibodhā ca… vatthu… āsā ca anāsā ca paccayanidānā, paccayasamudayā, paccayajātikā, paccayapabhavā, paccayasambhārā, paccayasamuṭṭhānā.

408. 1895 Pubbakaraṇaṁ katihi dhammehi saṅgahitaṁ? Pubbakaraṇaṁ sattahi dhammehi saṅgahitaṁ. Dhovanena, vicāraṇena, chedanena, bandhanena, sibbanena, rajanena, kappakaraṇena— pubbakaraṇaṁ imehi sattahi dhammehi saṅgahitaṁ.

1896 Paccuddhāro katihi dhammehi saṅgahito? Paccuddhāro tīhi dhammehi saṅgahito— saṅghāṭiyā, uttarāsaṅgena, antaravāsakena.

1897 Adhiṭṭhānaṁ katihi dhammehi saṅgahitaṁ? Adhiṭṭhānaṁ tīhi dhammehi saṅgahitaṁ— saṅghāṭiyā, uttarāsaṅgena, antaravāsakena.

1898 Atthāro katihi dhammehi saṅgahito? Atthāro ekena dhammena saṅgahito— vacībhedena.

1899 Kathinassa kati mūlāni, kati vatthūni, kati bhūmiyo? Kathinassa ekaṁ mūlaṁ— saṁgho; tīṇi vatthūni— saṅghāṭi, uttarāsaṅgo, antaravāsako, cha bhūmiyo— khomaṁ, kappāsikaṁ, koseyyaṁ, kambalaṁ, sāṇaṁ, bhaṅgaṁ.

1900 Kathinassa ko ādi, kiṁ majjhe, kiṁ pariyosānaṁ? Kathinassa pubbakaraṇaṁ ādi, kriyā majjhe, atthāro pariyosānaṁ.

409. 1901 Katihaṅgehi samannāgato puggalo abhabbo kathinaṁ attharituṁ? Katihaṅgehi samannāgato puggalo bhabbo kathinaṁ attharituṁ? Aṭṭhahaṅgehi samannāgato puggalo abhabbo kathinaṁ attharituṁ. Aṭṭhahaṅgehi samannāgato puggalo bhabbo kathinaṁ attharituṁ. Katamehi aṭṭhahaṅgehi samannāgato puggalo abhabbo kathinaṁ attharituṁ? Pubbakaraṇaṁ na jānāti, paccuddhāraṁ na jānāti, adhiṭṭhānaṁ na jānāti, atthāraṁ na jānāti, mātikaṁ na jānāti, palibodhaṁ na jānāti, uddhāraṁ na jānāti, ānisaṁsaṁ na jānāti— imehi aṭṭhahaṅgehi samannāgato puggalo abhabbo kathinaṁ attharituṁ. Katamehi aṭṭhahaṅgehi samannāgato puggalo bhabbo kathinaṁ attharituṁ? Pubbakaraṇaṁ jānāti, paccuddhāraṁ jānāti, adhiṭṭhānaṁ jānāti, atthāraṁ jānāti, mātikaṁ jānāti, palibodhaṁ jānāti, uddhāraṁ jānāti, ānisaṁsaṁ jānāti— imehi aṭṭhahaṅgehi samannāgato puggalo bhabbo kathinaṁ attharituṁ.

410. 1902 Katinaṁ^[322] puggalānaṁ kathinatthārā na ruhanti? Katinaṁ puggalānaṁ kathinatthārā ruhanti? Tiṇṇaṁ puggalānaṁ kathinatthārā na ruhanti. Tiṇṇaṁ puggalānaṁ kathinatthārā ruhanti. Katamesaṁ tiṇṇaṁ puggalānaṁ kathinatthārā na ruhanti? Nissīmaṭṭho anumodati, anumodento na vācaṁ bhindati, vācaṁ bhindanto na paraṁ viññāpeti— imesaṁ tiṇṇaṁ puggalānaṁ kathinatthārā na ruhanti. Katamesaṁ tiṇṇaṁ puggalānaṁ kathinatthārā ruhanti? Sīmaṭṭho anumodati, anumodento vācaṁ bhindati, vācaṁ bhindanto paraṁ viññāpeti— imesaṁ tiṇṇaṁ puggalānaṁ kathinatthārā ruhanti.

411. 1903 Kati kathinatthārā na ruhanti? Kati kathinatthārā ruhanti? Tayo kathinatthārā na ruhanti. Tayo kathinatthārā ruhanti. Katame tayo kathinatthārā na ruhanti? Vatthuvipannañceva hoti, kālavipannañca, karaṇavipannañca— ime tayo kathinatthārā na ruhanti. Katame tayo kathinatthārā ruhanti? Vatthusampannañceva hoti, kālasampannañca, karaṇasampannañca— ime tayo kathinatthārā ruhanti.