Adhikaraṇabheda
Ukkoṭanabhedādi
340. 1699 [282] Cattāri adhikaraṇāni. Vivādādhikaraṇaṁ, anuvādādhikaraṇaṁ, āpattādhikaraṇaṁ, kiccādhikaraṇaṁ— imāni cattāri adhikaraṇāni.
1700 Imesaṁ catunnaṁ adhikaraṇānaṁ kati ukkoṭā? Imesaṁ catunnaṁ adhikaraṇānaṁ dasa ukkoṭā. Vivādādhikaraṇassa dve ukkoṭā, anuvādādhikaraṇassa cattāro ukkoṭā, āpattādhikaraṇassa tayo ukkoṭā, kiccādhikaraṇassa eko ukkoṭo— imesaṁ catunnaṁ adhikaraṇānaṁ ime dasa ukkoṭā.
1701 Vivādādhikaraṇaṁ ukkoṭento kati samathe ukkoṭeti? Anuvādādhikaraṇaṁ ukkoṭento kati samathe ukkoṭeti? Āpattādhikaraṇaṁ ukkoṭento kati samathe ukkoṭeti? Kiccādhikaraṇaṁ ukkoṭento kati samathe ukkoṭeti?
1702 Vivādādhikaraṇaṁ ukkoṭento dve samathe ukkoṭeti. Anuvādādhikaraṇaṁ ukkoṭento cattāro samathe ukkoṭeti. Āpattādhikaraṇaṁ ukkoṭento tayo samathe ukkoṭeti. Kiccādhikaraṇaṁ ukkoṭento ekaṁ samathaṁ ukkoṭeti.
341. 1703 Kati ukkoṭā? Katihākārehi ukkoṭanaṁ pasavati? Katihaṅgehi samannāgato puggalo adhikaraṇaṁ ukkoṭeti? Kati puggalā adhikaraṇaṁ ukkoṭentā āpattiṁ āpajjanti?
1704 Dvādasa ukkoṭā. Dasahākārehi ukkoṭanaṁ pasavati. Catūhaṅgehi samannāgato puggalo adhikaraṇaṁ ukkoṭeti. Cattāro puggalā adhikaraṇaṁ ukkoṭentā āpattiṁ āpajjanti?
1705 Katame dvādasa ukkoṭā? Akataṁ kammaṁ, dukkaṭaṁ kammaṁ, puna kātabbaṁ kammaṁ, anihataṁ, dunnihataṁ, puna nihanitabbaṁ, avinicchitaṁ, duvinicchitaṁ, puna vinicchitabbaṁ, avūpasantaṁ, duvūpasantaṁ, puna vūpasametabbanti— ime dvādasa ukkoṭā.
1706 Katamehi dasahākārehi ukkoṭanaṁ pasavati? Tattha jātakaṁ adhikaraṇaṁ ukkoṭeti, tattha jātakaṁ vūpasantaṁ adhikaraṇaṁ ukkoṭeti, antarāmagge adhikaraṇaṁ ukkoṭeti, antarāmagge vūpasantaṁ adhikaraṇaṁ ukkoṭeti, tattha gataṁ adhikaraṇaṁ ukkoṭeti, tattha gataṁ vūpasantaṁ adhikaraṇaṁ ukkoṭeti, sativinayaṁ ukkoṭeti, amūḷhavinayaṁ ukkoṭeti, tassapāpiyasikaṁ ukkoṭeti, tiṇavatthārakaṁ ukkoṭeti— imehi dasahākārehi ukkoṭanaṁ pasavati.
1707 Katamehi catūhaṅgehi samannāgato puggalo adhikaraṇaṁ ukkoṭeti? Chandāgatiṁ gacchanto adhikaraṇaṁ ukkoṭeti, dosāgatiṁ gacchanto adhikaraṇaṁ ukkoṭeti, mohāgatiṁ gacchanto adhikaraṇaṁ ukkoṭeti, bhayāgatiṁ gacchanto adhikaraṇaṁ ukkoṭeti— imehi catūhaṅgehi samannāgato puggalo adhikaraṇaṁ ukkoṭeti.
1708 Katame cattāro puggalā adhikaraṇaṁ ukkoṭentā āpattiṁ āpajjanti? Tadahupasampanno ukkoṭeti ukkoṭanakaṁ pācittiyaṁ, āgantuko ukkoṭeti ukkoṭanakaṁ pācittiyaṁ, kārako ukkoṭeti ukkoṭanakaṁ pācittiyaṁ, chandadāyako ukkoṭeti ukkoṭanakaṁ pācittiyaṁ— ime cattāro puggalā adhikaraṇaṁ ukkoṭentā āpattiṁ āpajjanti.