1.1.2.5.2 Bhūtagāmavagga

Bhikkhuvibhaṅga

Paṭhamabhāga

Katāpattivāra

Pācittiyakaṇḍa

Bhūtagāmavagga

166. 396 Bhūtagāmaṁ pātento dve āpattiyo āpajjati. Pāteti, payoge dukkaṭaṁ; pahāre pahāre āpatti pācittiyassa. (1)

397 Aññenaññaṁ paṭicaranto dve āpattiyo āpajjati. Anāropite aññavādake aññenaññaṁ paṭicarati, āpatti dukkaṭassa; āropite aññavādake aññenaññaṁ paṭicarati, āpatti pācittiyassa. (2)

398 Bhikkhuṁ ujjhāpento dve āpattiyo āpajjati. Ujjhāpeti, payoge dukkaṭaṁ; ujjhāpite āpatti pācittiyassa. (3)

399 Saṁghikaṁ mañcaṁ vā pīṭhaṁ vā bhisiṁ vā kocchaṁ vā ajjhokāse santharitvā anuddharitvā anāpucchā pakkamanto dve āpattiyo āpajjati. Paṭhamaṁ pādaṁ leḍḍupātaṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa. (4)

400 Saṁghike vihāre seyyaṁ santharitvā anuddharitvā anāpucchā pakkamanto dve āpattiyo āpajjati. Paṭhamaṁ pādaṁ parikkhepaṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa. (5)

401 Saṁghike vihāre jānaṁ pubbupagataṁ bhikkhuṁ anupakhajja seyyaṁ kappento dve āpattiyo āpajjati. Nipajjati, payoge dukkaṭaṁ; nipanne āpatti pācittiyassa. (6)

402 Bhikkhuṁ kupito anattamano saṁghikā vihārā nikkaḍḍhento dve āpattiyo āpajjati. Nikkaḍḍhati, payoge dukkaṭaṁ; nikkaḍḍhite āpatti pācittiyassa. (7)

403 Saṁghike vihāre uparivehāsakuṭiyā āhaccapādakaṁ mañcaṁ vā pīṭhaṁ vā abhinisīdanto dve āpattiyo āpajjati. Abhinisīdati, payoge dukkaṭaṁ; abhinisinne āpatti pācittiyassa. (8)

404 Dvattipariyāye adhiṭṭhahitvā tatuttari^[67] adhiṭṭhahanto dve āpattiyo āpajjati. Adhiṭṭheti, payoge dukkaṭaṁ; adhiṭṭhite āpatti pācittiyassa. (9)

405 Jānaṁ sappāṇakaṁ udakaṁ tiṇaṁ vā mattikaṁ vā siñcanto dve āpattiyo āpajjati. Siñcati, payoge dukkaṭaṁ; siñcite āpatti pācittiyassa. (10)

406 Bhūtagāmavaggo dutiyo.