Bhikkhuvibhaṅga
Paṭhamabhāga
Katāpattivāra
Pācittiyakaṇḍa
Musāvādavagga
165. 385 Sampajānamusāvādaṁ bhāsanto kati āpattiyo āpajjati? Sampajānamusāvādaṁ bhāsanto pañca āpattiyo āpajjati. Pāpiccho icchāpakato asantaṁ abhūtaṁ uttarimanussadhammaṁ ullapati, āpatti pārājikassa; bhikkhuṁ amūlakena pārājikena dhammena anuddhaṁseti, āpatti saṁghādisesassa; “yo te vihāre vasati, so bhikkhu arahā”ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa; sampajānamusāvāde pācittiyaṁ— sampajānamusāvādaṁ bhāsanto imā pañca āpattiyo āpajjati. (1)
386 Omasanto dve āpattiyo āpajjati. Upasampannaṁ omasati, āpatti pācittiyassa; anupasampannaṁ omasati, āpatti dukkaṭassa. (2)
387 Pesuññaṁ upasaṁharanto dve āpattiyo āpajjati. Upasampannassa pesuññaṁ upasaṁharati, āpatti pācittiyassa; anupasampannassa pesuññaṁ upasaṁharati, āpatti dukkaṭassa. (3)
388 Anupasampannaṁ padaso dhammaṁ vācento dve āpattiyo āpajjati. Vāceti, payoge dukkaṭaṁ; pade pade āpatti pācittiyassa. (4)
389 Anupasampannena uttaridirattatirattaṁ sahaseyyaṁ kappento dve āpattiyo āpajjati. Nipajjati, payoge dukkaṭaṁ; nipanne āpatti pācittiyassa. (5)
390 Mātugāmena sahaseyyaṁ kappento dve āpattiyo āpajjati. Nipajjati, payoge dukkaṭaṁ; nipanne āpatti pācittiyassa. (6)
391 Mātugāmassa uttarichappañcavācāhi dhammaṁ desento dve āpattiyo āpajjati. Deseti, payoge dukkaṭaṁ; pade pade āpatti pācittiyassa. (7)
392 Anupasampannassa uttarimanussadhammaṁ bhūtaṁ ārocento dve āpattiyo āpajjati. Āroceti, payoge dukkaṭaṁ; ārocite āpatti pācittiyassa. (8)
393 Bhikkhussa duṭṭhullaṁ āpattiṁ anupasampannassa ārocento dve āpattiyo āpajjati. Āroceti, payoge dukkaṭaṁ; ārocite āpatti pācittiyassa. (9)
394 Pathaviṁ khaṇanto dve āpattiyo āpajjati. Khaṇati, payoge dukkaṭaṁ; pahāre pahāre āpatti pācittiyassa. (10)
395 Musāvādavaggo paṭhamo.