Niddesa
Nikkhepakaṇḍa
Tikanikkhepa
Vitakkattika
1000. 1665 Katame dhammā savitakkasavicārā? Savitakkasavicārabhūmiyaṁ kāmāvacare, rūpāvacare, apariyāpanne, vitakkavicāre ṭhapetvā; taṁsampayutto vedanākkhandho…pe… viññāṇakkhandho— ime dhammā savitakkasavicārā.
1001. 1666 Katame dhammā avitakkavicāramattā? Avitakkavicāramattabhūmiyaṁ rūpāvacare, apariyāpanne, vicāraṁ ṭhapetvā; taṁsampayutto vedanākkhandho…pe… viññāṇakkhandho— ime dhammā avitakkavicāramattā.
1002. 1667 Katame dhammā avitakkaavicārā? Avitakkaavicārabhūmiyaṁ kāmāvacare, rūpāvacare, arūpāvacare, apariyāpanne; vedanākkhandho…pe… viññāṇakkhandho; sabbañca rūpaṁ, asaṅkhatā ca dhātu— ime dhammā avitakkaavicārā.