Niddesa
Nikkhepakaṇḍa
Tikanikkhepa
Upādinnattika
994. 1659 Katame dhammā upādinnupādāniyā? Sāsavā kusalākusalānaṁ dhammānaṁ vipākā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho; yañca rūpaṁ kammassa katattā— ime dhammā upādinnupādāniyā.
995. 1660 Katame dhammā anupādinnupādāniyā? Sāsavā kusalākusalā dhammā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho; ye ca dhammā kiriyā neva kusalā nākusalā na ca kammavipākā; yañca rūpaṁ na kammassa katattā— ime dhammā anupādinnupādāniyā.
996. 1661 Katame dhammā anupādinnaanupādāniyā? Apariyāpannā maggā ca, maggaphalāni ca, asaṅkhatā ca dhātu— ime dhammā anupādinnaanupādāniyā.