Niddesa
Rūpakaṇḍa
Mātikā
Tika
585. 1144 Tividhena rūpasaṅgaho—
1145 Yaṁ taṁ rūpaṁ ajjhattikaṁ, taṁ upādā. Yaṁ taṁ rūpaṁ bāhiraṁ, taṁ atthi upādā, atthi no upādā.
1146 Yaṁ taṁ rūpaṁ ajjhattikaṁ, taṁ upādinnaṁ. Yaṁ taṁ rūpaṁ bāhiraṁ, taṁ atthi upādinnaṁ, atthi anupādinnaṁ.
1147 Yaṁ taṁ rūpaṁ ajjhattikaṁ, taṁ upādinnupādāniyaṁ. Yaṁ taṁ rūpaṁ bāhiraṁ, taṁ atthi upādinnupādāniyaṁ, atthi anupādinnupādāniyaṁ.
1148 Yaṁ taṁ rūpaṁ ajjhattikaṁ, taṁ anidassanaṁ. Yaṁ taṁ rūpaṁ bāhiraṁ, taṁ atthi sanidassanaṁ, atthi anidassanaṁ.
1149 Yaṁ taṁ rūpaṁ ajjhattikaṁ, taṁ sappaṭighaṁ. Yaṁ taṁ rūpaṁ bāhiraṁ, taṁ atthi sappaṭighaṁ, atthi appaṭighaṁ.
1150 Yaṁ taṁ rūpaṁ ajjhattikaṁ, taṁ indriyaṁ. Yaṁ taṁ rūpaṁ bāhiraṁ, taṁ atthi indriyaṁ, atthi na indriyaṁ.
1151 Yaṁ taṁ rūpaṁ ajjhattikaṁ, taṁ na mahābhūtaṁ. Yaṁ taṁ rūpaṁ bāhiraṁ, taṁ atthi mahābhūtaṁ, atthi na mahābhūtaṁ.
1152 Yaṁ taṁ rūpaṁ ajjhattikaṁ, taṁ na viññatti. Yaṁ taṁ rūpaṁ bāhiraṁ, taṁ atthi viññatti, atthi na viññatti.
1153 Yaṁ taṁ rūpaṁ ajjhattikaṁ, taṁ na cittasamuṭṭhānaṁ. Yaṁ taṁ rūpaṁ bāhiraṁ, taṁ atthi cittasamuṭṭhānaṁ, atthi na cittasamuṭṭhānaṁ.
1154 Yaṁ taṁ rūpaṁ ajjhattikaṁ, taṁ na cittasahabhu. Yaṁ taṁ rūpaṁ bāhiraṁ, taṁ atthi cittasahabhu, atthi na cittasahabhu.
1155 Yaṁ taṁ rūpaṁ ajjhattikaṁ, taṁ na cittānuparivatti. Yaṁ taṁ rūpaṁ bāhiraṁ, taṁ atthi cittānuparivatti, atthi na cittānuparivatti.
1156 Yaṁ taṁ rūpaṁ ajjhattikaṁ, taṁ oḷārikaṁ. Yaṁ taṁ rūpaṁ bāhiraṁ, taṁ atthi oḷārikaṁ, atthi sukhumaṁ.
1157 Yaṁ taṁ rūpaṁ ajjhattikaṁ, taṁ santike. Yaṁ taṁ rūpaṁ bāhiraṁ, taṁ atthi dūre, atthi santike. [13]
1158 Pakiṇṇakatikaṁ.
1159 Yaṁ taṁ rūpaṁ bāhiraṁ, taṁ cakkhusamphassassa na vatthu. Yaṁ taṁ rūpaṁ ajjhattikaṁ, taṁ atthi cakkhusamphassassa vatthu, atthi cakkhusamphassassa na vatthu.
1160 Yaṁ taṁ rūpaṁ bāhiraṁ, taṁ cakkhusamphassajāya vedanāya…pe… saññāya…pe… cetanāya…pe… cakkhuviññāṇassa na vatthu. Yaṁ taṁ rūpaṁ ajjhattikaṁ, taṁ atthi cakkhuviññāṇassa vatthu, atthi cakkhuviññāṇassa na vatthu.
1161 Yaṁ taṁ rūpaṁ bāhiraṁ, taṁ sotasamphassassa…pe… ghānasamphassassa…pe… jivhāsamphassassa…pe… kāyasamphassassa na vatthu. Yaṁ taṁ rūpaṁ ajjhattikaṁ, taṁ atthi kāyasamphassassa vatthu, atthi kāyasamphassassa na vatthu. Yaṁ taṁ rūpaṁ bāhiraṁ, taṁ kāyasamphassajāya vedanāya…pe… saññāya…pe… cetanāya…pe… kāyaviññāṇassa na vatthu. Yaṁ taṁ rūpaṁ ajjhattikaṁ, taṁ atthi kāyaviññāṇassa vatthu, atthi kāyaviññāṇassa na vatthu. [25]
1162 Vatthutikaṁ.
1163 Yaṁ taṁ rūpaṁ ajjhattikaṁ, taṁ cakkhusamphassassa nārammaṇaṁ. Yaṁ taṁ rūpaṁ bāhiraṁ, taṁ atthi cakkhusamphassassa ārammaṇaṁ, atthi cakkhusamphassassa nārammaṇaṁ. Yaṁ taṁ rūpaṁ ajjhattikaṁ, taṁ cakkhusamphassajāya vedanāya…pe… saññāya…pe… cetanāya…pe… cakkhuviññāṇassa nārammaṇaṁ. Yaṁ taṁ rūpaṁ bāhiraṁ, taṁ atthi cakkhuviññāṇassa ārammaṇaṁ, atthi cakkhuviññāṇassa nārammaṇaṁ.
1164 Yaṁ taṁ rūpaṁ ajjhattikaṁ, taṁ sotasamphassassa…pe… ghānasamphassassa…pe… jivhāsamphassassa…pe… kāyasamphassassa nārammaṇaṁ. Yaṁ taṁ rūpaṁ bāhiraṁ, taṁ atthi kāyasamphassassa ārammaṇaṁ, atthi kāyasamphassassa nārammaṇaṁ. Yaṁ taṁ rūpaṁ ajjhattikaṁ, taṁ kāyasamphassajāya vedanāya…pe… saññāya…pe… cetanāya…pe… kāyaviññāṇassa nārammaṇaṁ. Yaṁ taṁ rūpaṁ bāhiraṁ, taṁ atthi kāyaviññāṇassa ārammaṇaṁ, atthi kāyaviññāṇassa nārammaṇaṁ. [25]
1165 Ārammaṇatikaṁ.
1166 Yaṁ taṁ rūpaṁ bāhiraṁ, taṁ na cakkhāyatanaṁ. Yaṁ taṁ rūpaṁ ajjhattikaṁ, taṁ atthi cakkhāyatanaṁ, atthi na cakkhāyatanaṁ. Yaṁ taṁ rūpaṁ bāhiraṁ, taṁ na sotāyatanaṁ…pe… na ghānāyatanaṁ…pe… na jivhāyatanaṁ…pe… na kāyāyatanaṁ. Yaṁ taṁ rūpaṁ ajjhattikaṁ, taṁ atthi kāyāyatanaṁ, atthi na kāyāyatanaṁ.
1167 Yaṁ taṁ rūpaṁ ajjhattikaṁ, taṁ na rūpāyatanaṁ. Yaṁ taṁ rūpaṁ bāhiraṁ, taṁ atthi rūpāyatanaṁ, atthi na rūpāyatanaṁ. Yaṁ taṁ rūpaṁ ajjhattikaṁ, taṁ na saddāyatanaṁ…pe… na gandhāyatanaṁ…pe… na rasāyatanaṁ…pe… na phoṭṭhabbāyatanaṁ. Yaṁ taṁ rūpaṁ bāhiraṁ, taṁ atthi phoṭṭhabbāyatanaṁ, atthi na phoṭṭhabbāyatanaṁ. [10]
1168 Āyatanatikaṁ.
1169 Yaṁ taṁ rūpaṁ bāhiraṁ, taṁ na cakkhudhātu. Yaṁ taṁ rūpaṁ ajjhattikaṁ, taṁ atthi cakkhudhātu, atthi na cakkhudhātu. Yaṁ taṁ rūpaṁ bāhiraṁ, taṁ na sotadhātu…pe… na ghānadhātu…pe… na jivhādhātu…pe… na kāyadhātu. Yaṁ taṁ rūpaṁ ajjhattikaṁ, taṁ atthi kāyadhātu, atthi na kāyadhātu.
1170 Yaṁ taṁ rūpaṁ ajjhattikaṁ, taṁ na rūpadhātu. Yaṁ taṁ rūpaṁ bāhiraṁ, taṁ atthi rūpadhātu, atthi na rūpadhātu. Yaṁ taṁ rūpaṁ ajjhattikaṁ, taṁ na saddadhātu…pe… na gandhadhātu…pe… na rasadhātu…pe… na phoṭṭhabbadhātu. Yaṁ taṁ rūpaṁ bāhiraṁ, taṁ atthi phoṭṭhabbadhātu, atthi na phoṭṭhabbadhātu. [10]
1171 Dhātutikaṁ.
1172 Yaṁ taṁ rūpaṁ bāhiraṁ, taṁ na cakkhundriyaṁ. Yaṁ taṁ rūpaṁ ajjhattikaṁ, taṁ atthi cakkhundriyaṁ, atthi na cakkhundriyaṁ. Yaṁ taṁ rūpaṁ bāhiraṁ, taṁ na sotindriyaṁ…pe… na ghānindriyaṁ…pe… na jivhindriyaṁ…pe… na kāyindriyaṁ. Yaṁ taṁ rūpaṁ ajjhattikaṁ, taṁ atthi kāyindriyaṁ, atthi na kāyindriyaṁ.
1173 Yaṁ taṁ rūpaṁ ajjhattikaṁ, taṁ na itthindriyaṁ. Yaṁ taṁ rūpaṁ bāhiraṁ, taṁ atthi itthindriyaṁ, atthi na itthindriyaṁ.
1174 Yaṁ taṁ rūpaṁ ajjhattikaṁ, taṁ na purisindriyaṁ. Yaṁ taṁ rūpaṁ bāhiraṁ, taṁ atthi purisindriyaṁ, atthi na purisindriyaṁ.
1175 Yaṁ taṁ rūpaṁ ajjhattikaṁ, taṁ na jīvitindriyaṁ. Yaṁ taṁ rūpaṁ bāhiraṁ, taṁ atthi jīvitindriyaṁ, atthi na jīvitindriyaṁ. [8]
1176 Indriyatikaṁ.
1177 Yaṁ taṁ rūpaṁ ajjhattikaṁ, taṁ na kāyaviññatti. Yaṁ taṁ rūpaṁ bāhiraṁ, taṁ atthi kāyaviññatti, atthi na kāyaviññatti.
1178 Yaṁ taṁ rūpaṁ ajjhattikaṁ, taṁ na vacīviññatti. Yaṁ taṁ rūpaṁ bāhiraṁ, taṁ atthi vacīviññatti, atthi na vacīviññatti.
1179 Yaṁ taṁ rūpaṁ ajjhattikaṁ, taṁ na ākāsadhātu. Yaṁ taṁ rūpaṁ bāhiraṁ, taṁ atthi ākāsadhātu, atthi na ākāsadhātu.
1180 Yaṁ taṁ rūpaṁ ajjhattikaṁ, taṁ na āpodhātu. Yaṁ taṁ rūpaṁ bāhiraṁ, taṁ atthi āpodhātu, atthi na āpodhātu.
1181 Yaṁ taṁ rūpaṁ ajjhattikaṁ, taṁ rūpassa na lahutā. Yaṁ taṁ rūpaṁ bāhiraṁ, taṁ atthi rūpassa lahutā, atthi rūpassa na lahutā.
1182 Yaṁ taṁ rūpaṁ ajjhattikaṁ, taṁ rūpassa na mudutā. Yaṁ taṁ rūpaṁ bāhiraṁ, taṁ atthi rūpassa mudutā, atthi rūpassa na mudutā.
1183 Yaṁ taṁ rūpaṁ ajjhattikaṁ, taṁ rūpassa na kammaññatā. Yaṁ taṁ rūpaṁ bāhiraṁ, taṁ atthi rūpassa kammaññatā, atthi rūpassa na kammaññatā.
1184 Yaṁ taṁ rūpaṁ ajjhattikaṁ, taṁ rūpassa na upacayo. Yaṁ taṁ rūpaṁ bāhiraṁ, taṁ atthi rūpassa upacayo, atthi rūpassa na upacayo.
1185 Yaṁ taṁ rūpaṁ ajjhattikaṁ, taṁ rūpassa na santati. Yaṁ taṁ rūpaṁ bāhiraṁ, taṁ atthi rūpassa santati, atthi rūpassa na santati.
1186 Yaṁ taṁ rūpaṁ ajjhattikaṁ, taṁ rūpassa na jaratā. Yaṁ taṁ rūpaṁ bāhiraṁ, taṁ atthi rūpassa jaratā, atthi rūpassa na jaratā.
1187 Yaṁ taṁ rūpaṁ ajjhattikaṁ, taṁ rūpassa na aniccatā. Yaṁ taṁ rūpaṁ bāhiraṁ, taṁ atthi rūpassa aniccatā, atthi rūpassa na aniccatā.
1188 Yaṁ taṁ rūpaṁ ajjhattikaṁ, taṁ na kabaḷīkāro āhāro. Yaṁ taṁ rūpaṁ bāhiraṁ, taṁ atthi kabaḷīkāro āhāro, atthi na kabaḷīkāro āhāro. [12]
1189 Evaṁ tividhena rūpasaṅgaho.
Sukhumarūpatikaṁ.
Tikaṁ.