Niddesa
Rūpakaṇḍa
Mātikā
Duka
1098 Duvidhena rūpasaṅgaho—
1099 Atthi rūpaṁ upādā, atthi rūpaṁ no upādā.
1100 Atthi rūpaṁ upādinnaṁ, atthi rūpaṁ anupādinnaṁ.
1101 Atthi rūpaṁ upādinnupādāniyaṁ, atthi rūpaṁ anupādinnupādāniyaṁ.
1102 Atthi rūpaṁ sanidassanaṁ, atthi rūpaṁ anidassanaṁ.
1103 Atthi rūpaṁ sappaṭighaṁ, atthi rūpaṁ appaṭighaṁ.
1104 Atthi rūpaṁ indriyaṁ, atthi rūpaṁ na indriyaṁ.
1105 Atthi rūpaṁ mahābhūtaṁ, atthi rūpaṁ na mahābhūtaṁ.
1106 Atthi rūpaṁ viññatti, atthi rūpaṁ na viññatti.
1107 Atthi rūpaṁ cittasamuṭṭhānaṁ, atthi rūpaṁ na cittasamuṭṭhānaṁ.
1108 Atthi rūpaṁ cittasahabhu, atthi rūpaṁ na cittasahabhu.
1109 Atthi rūpaṁ cittānuparivatti, atthi rūpaṁ na cittānuparivatti.
1110 Atthi rūpaṁ ajjhattikaṁ, atthi rūpaṁ bāhiraṁ.
1111 Atthi rūpaṁ oḷārikaṁ, atthi rūpaṁ sukhumaṁ.
1112 Atthi rūpaṁ dūre, atthi rūpaṁ santike. [14]
1113 Pakiṇṇakadukaṁ.
1114 Atthi rūpaṁ cakkhusamphassassa vatthu, atthi rūpaṁ cakkhusamphassassa na vatthu. Atthi rūpaṁ cakkhusamphassajāya vedanāya…pe… saññāya…pe… cetanāya…pe… cakkhuviññāṇassa vatthu, atthi rūpaṁ cakkhuviññāṇassa na vatthu.
1115 Atthi rūpaṁ sotasamphassassa…pe… ghānasamphassassa…pe… jivhāsamphassassa…pe… kāyasamphassassa vatthu, atthi rūpaṁ kāyasamphassassa na vatthu. Atthi rūpaṁ kāyasamphassajāya vedanāya…pe… saññāya…pe… cetanāya…pe… kāyaviññāṇassa vatthu, atthi rūpaṁ kāyaviññāṇassa na vatthu. [25]
1116 Vatthudukaṁ.
1117 Atthi rūpaṁ cakkhusamphassassa ārammaṇaṁ, atthi rūpaṁ cakkhusamphassassa nārammaṇaṁ. Atthi rūpaṁ cakkhusamphassajāya vedanāya…pe… saññāya…pe… cetanāya…pe… cakkhuviññāṇassa ārammaṇaṁ, atthi rūpaṁ cakkhuviññāṇassa nārammaṇaṁ.
1118 Atthi rūpaṁ sotasamphassassa…pe… ghānasamphassassa…pe… jivhāsamphassassa…pe… kāyasamphassassa ārammaṇaṁ, atthi rūpaṁ kāyasamphassassa nārammaṇaṁ. Atthi rūpaṁ kāyasamphassajāya vedanāya…pe… saññāya…pe… cetanāya…pe… kāyaviññāṇassa ārammaṇaṁ, atthi rūpaṁ kāyaviññāṇassa nārammaṇaṁ. [25]
1119 Ārammaṇadukaṁ.
1120 Atthi rūpaṁ cakkhāyatanaṁ, atthi rūpaṁ na cakkhāyatanaṁ. Atthi rūpaṁ sotāyatanaṁ…pe… ghānāyatanaṁ…pe… jivhāyatanaṁ…pe… kāyāyatanaṁ, atthi rūpaṁ na kāyāyatanaṁ.
1121 Atthi rūpaṁ rūpāyatanaṁ, atthi rūpaṁ na rūpāyatanaṁ. Atthi rūpaṁ saddāyatanaṁ…pe… gandhāyatanaṁ…pe… rasāyatanaṁ…pe… phoṭṭhabbāyatanaṁ, atthi rūpaṁ na phoṭṭhabbāyatanaṁ. [10]
1122 Āyatanadukaṁ.
1123 Atthi rūpaṁ cakkhudhātu, atthi rūpaṁ na cakkhudhātu. Atthi rūpaṁ sotadhātu…pe… ghānadhātu…pe… jivhādhātu…pe… kāyadhātu, atthi rūpaṁ na kāyadhātu.
1124 Atthi rūpaṁ rūpadhātu, atthi rūpaṁ na rūpadhātu. Atthi rūpaṁ saddadhātu…pe… gandhadhātu…pe… rasadhātu…pe… phoṭṭhabbadhātu, atthi rūpaṁ na phoṭṭhabbadhātu. [10]
1125 Dhātudukaṁ.
1126 Atthi rūpaṁ cakkhundriyaṁ, atthi rūpaṁ na cakkhundriyaṁ. Atthi rūpaṁ sotindriyaṁ…pe… ghānindriyaṁ…pe… jivhindriyaṁ…pe… kāyindriyaṁ, atthi rūpaṁ na kāyindriyaṁ.
1127 Atthi rūpaṁ itthindriyaṁ, atthi rūpaṁ na itthindriyaṁ.
1128 Atthi rūpaṁ purisindriyaṁ, atthi rūpaṁ na purisindriyaṁ.
1129 Atthi rūpaṁ jīvitindriyaṁ, atthi rūpaṁ na jīvitindriyaṁ. [8]
1130 Indriyadukaṁ.
1131 Atthi rūpaṁ kāyaviññatti, atthi rūpaṁ na kāyaviññatti.
1132 Atthi rūpaṁ vacīviññatti, atthi rūpaṁ na vacīviññatti.
1133 Atthi rūpaṁ ākāsadhātu, atthi rūpaṁ na ākāsadhātu.
1134 Atthi rūpaṁ āpodhātu, atthi rūpaṁ na āpodhātu.
1135 Atthi rūpaṁ rūpassa lahutā, atthi rūpaṁ rūpassa na lahutā.
1136 Atthi rūpaṁ rūpassa mudutā, atthi rūpaṁ rūpassa na mudutā.
1137 Atthi rūpaṁ rūpassa kammaññatā, atthi rūpaṁ rūpassa na kammaññatā.
1138 Atthi rūpaṁ rūpassa upacayo, atthi rūpaṁ rūpassa na upacayo.
1139 Atthi rūpaṁ rūpassa santati, atthi rūpaṁ rūpassa na santati.
1140 Atthi rūpaṁ rūpassa jaratā, atthi rūpaṁ rūpassa na jaratā.
1141 Atthi rūpaṁ rūpassa aniccatā, atthi rūpaṁ rūpassa na aniccatā.
1142 Atthi rūpaṁ kabaḷīkāro āhāro, atthi rūpaṁ na kabaḷīkāro āhāro. [12]
1143 Evaṁ duvidhena rūpasaṅgaho.
Sukhumarūpadukaṁ.
Dukaṁ.