Niddesa
Cittuppādakaṇḍa
Lokuttaravipāka-paṭhamamaggavipāka
Suññatapaṭipadā
514. 1002 Katame dhammā abyākatā? Yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, tasmiṁ samaye phasso hoti…pe… avikkhepo hoti…pe… ime dhammā kusalā. Tasseva lokuttarassa kusalassa jhānassa katattā bhāvitattā vipākaṁ vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, tasmiṁ samaye phasso hoti…pe… avikkhepo hoti…pe… ime dhammā abyākatā.
515. 1003 Katame dhammā abyākatā? Yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, tasmiṁ samaye phasso hoti…pe… avikkhepo hoti…pe… ime dhammā kusalā. Tasseva lokuttarassa kusalassa jhānassa katattā bhāvitattā vipākaṁ vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ animittaṁ, tasmiṁ samaye phasso hoti…pe… avikkhepo hoti…pe… ime dhammā abyākatā.
516. 1004 Katame dhammā abyākatā? Yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, tasmiṁ samaye phasso hoti…pe… avikkhepo hoti…pe… ime dhammā kusalā. Tasseva lokuttarassa kusalassa jhānassa katattā bhāvitattā vipākaṁ vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ appaṇihitaṁ, tasmiṁ samaye phasso hoti…pe… avikkhepo hoti…pe… ime dhammā abyākatā.
517. 1005 Katame dhammā abyākatā? Yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vitakkavicārānaṁ vūpasamā…pe… dutiyaṁ jhānaṁ…pe… tatiyaṁ jhānaṁ…pe… catutthaṁ jhānaṁ…pe… paṭhamaṁ jhānaṁ…pe… pañcamaṁ jhānaṁ upasampajja viharati dukkhapaṭipadaṁ dandhābhiññaṁ suññatanti kusalaṁ…pe… dukkhapaṭipadaṁ dandhābhiññaṁ suññatanti vipāko…pe… dukkhapaṭipadaṁ dandhābhiññaṁ suññatanti kusalaṁ…pe… dukkhapaṭipadaṁ dandhābhiññaṁ animittanti vipāko…pe… dukkhapaṭipadaṁ dandhābhiññaṁ suññatanti kusalaṁ…pe… dukkhapaṭipadaṁ dandhābhiññaṁ appaṇihitanti vipāko, tasmiṁ samaye phasso hoti…pe… avikkhepo hoti…pe… ime dhammā abyākatā.
518. 1006 Katame dhammā abyākatā? Yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ khippābhiññaṁ suññataṁ…pe… sukhapaṭipadaṁ dandhābhiññaṁ suññataṁ…pe… sukhapaṭipadaṁ khippābhiññaṁ suññataṁ…pe… dutiyaṁ jhānaṁ…pe… tatiyaṁ jhānaṁ…pe… catutthaṁ jhānaṁ…pe… paṭhamaṁ jhānaṁ…pe… pañcamaṁ jhānaṁ upasampajja viharati sukhapaṭipadaṁ khippābhiññaṁ suññatanti kusalaṁ…pe… sukhapaṭipadaṁ khippābhiññaṁ suññatanti vipāko…pe… sukhapaṭipadaṁ khippābhiññaṁ suññatanti kusalaṁ…pe… sukhapaṭipadaṁ khippābhiññaṁ animittanti vipāko…pe… sukhapaṭipadaṁ khippābhiññaṁ suññatanti kusalaṁ…pe… sukhapaṭipadaṁ khippābhiññaṁ appaṇihitanti vipāko, tasmiṁ samaye phasso hoti…pe… avikkhepo hoti…pe… ime dhammā abyākatā.
1007 Suññatapaṭipadā.