Niddesa
Cittuppādakaṇḍa
Rūpāvacarakusala
591 Catasso paṭipadā
176. 592 Katame dhammā kusalā? Yasmiṁ samaye rūpūpapattiyā maggaṁ bhāveti vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ[49] dandhābhiññaṁ pathavīkasiṇaṁ, tasmiṁ samaye phasso hoti…pe… avikkhepo hoti…pe… ime dhammā kusalā.
177. 593 Katame dhammā kusalā? Yasmiṁ samaye rūpūpapattiyā maggaṁ bhāveti vivicceva kāmehi…pe… paṭhamaṁ jhānaṁ upasampajja viharati dukkhapaṭipadaṁ khippābhiññaṁ pathavīkasiṇaṁ, tasmiṁ samaye phasso hoti…pe… avikkhepo hoti…pe… ime dhammā kusalā.
178. 594 Katame dhammā kusalā? Yasmiṁ samaye rūpūpapattiyā maggaṁ bhāveti vivicceva kāmehi…pe… paṭhamaṁ jhānaṁ upasampajja viharati sukhapaṭipadaṁ[50] dandhābhiññaṁ pathavīkasiṇaṁ, tasmiṁ samaye phasso hoti…pe… avikkhepo hoti…pe… ime dhammā kusalā.
179. 595 Katame dhammā kusalā? Yasmiṁ samaye rūpūpapattiyā maggaṁ bhāveti vivicceva kāmehi…pe… paṭhamaṁ jhānaṁ upasampajja viharati sukhapaṭipadaṁ khippābhiññaṁ pathavīkasiṇaṁ, tasmiṁ samaye phasso hoti…pe… avikkhepo hoti…pe… ime dhammā kusalā…pe… .
180. 596 Katame dhammā kusalā? Yasmiṁ samaye rūpūpapattiyā maggaṁ bhāveti vitakkavicārānaṁ vūpasamā…pe… dutiyaṁ jhānaṁ…pe… tatiyaṁ jhānaṁ…pe… catutthaṁ jhānaṁ…pe… paṭhamaṁ jhānaṁ…pe… pañcamaṁ jhānaṁ upasampajja viharati dukkhapaṭipadaṁ dandhābhiññaṁ pathavīkasiṇaṁ…pe… dukkhapaṭipadaṁ khippābhiññaṁ pathavīkasiṇaṁ…pe… sukhapaṭipadaṁ dandhābhiññaṁ pathavīkasiṇaṁ…pe… sukhapaṭipadaṁ khippābhiññaṁ pathavīkasiṇaṁ— tasmiṁ samaye phasso hoti…pe… avikkhepo hoti…pe… ime dhammā kusalā.
597 Catasso paṭipadā.