Opammakathāpañha
Kumbhavagga
Kumbhaṅgapañha
285. 1986 “Bhante nāgasena, ‘kumbhassa ekaṁ aṅgaṁ gahetabban’ti yaṁ vadesi, katamaṁ taṁ ekaṁ aṅgaṁ gahetabban”ti? “Yathā, mahārāja, kumbho sampuṇṇo na saṇati; evameva kho, mahārāja, yoginā yogāvacarena āgame adhigame pariyattiyaṁ sāmaññe pāramiṁ patvā na saṇitabbaṁ, na tena māno karaṇīyo, na dabbo[685] dassetabbo, nihatamānena nihatadabbena bhavitabbaṁ, ujukena amukharena avikatthinā. Idaṁ, mahārāja, kumbhassa ekaṁ aṅgaṁ gahetabbaṁ. Bhāsitampetaṁ, mahārāja, bhagavatā devātidevena suttanipāte—
1987 [686] ‘Yadūnakaṁ taṁ saṇati,
Yaṁ pūraṁ santameva taṁ;
Aḍḍhakumbhūpamo bālo,
Rahado pūrova paṇḍito’”ti. [687]
1988 Kumbhaṅgapañho paṭhamo.
- dabbo: dappo (sī, maku, pā1) (Word Variant) ↩
- 18Sn.727/1 (Cross Reference) ↩
- Aḍḍhakumbhūpamo: rittakumbhūpamo (sī, pā1) (Word Variant) ↩