Opammakathāpañha
Sīhavagga
Peṇāhikaṅgapañha
267. 1901 “Bhante nāgasena, ‘peṇāhikāya dve aṅgāni gahetabbānī’ti yaṁ vadesi, katamāni tāni dve aṅgāni gahetabbānī”ti? “Yathā, mahārāja, peṇāhikā sakapatimhi usūyāya chāpake na posayati; evameva kho, mahārāja, yoginā yogāvacarena sakamane[663] kilese uppanne usūyāyitabbaṁ, satipaṭṭhānena sammāsaṁvarasusire pakkhipitvā manodvāre kāyagatāsati bhāvetabbā. Idaṁ, mahārāja, peṇāhikāya paṭhamaṁ aṅgaṁ gahetabbaṁ.
1902 Puna caparaṁ, mahārāja, peṇāhikā pavane divasaṁ gocaraṁ caritvā sāyaṁ pakkhigaṇaṁ upeti attano guttiyā; evameva kho, mahārāja, yoginā yogāvacarena ekakena pavivekaṁ sevitabbaṁ saṁyojanaparimuttiyā, tatra ratiṁ alabhamānena upavādabhayaparirakkhaṇāya saṁghaṁ osaritvā saṁgharakkhitena vasitabbaṁ. Idaṁ, mahārāja, peṇāhikāya dutiyaṁ aṅgaṁ gahetabbaṁ. Bhāsitampetaṁ, mahārāja, brahmunā sahampatinā bhagavato santike—
1903 [664] ‘Sevetha pantāni senāsanāni,
Careyya saṁyojanavippamokkhā;
Sace ratiṁ nādhigaccheyya tattha,
Saṁghe vase rakkhitatto satīmā’”ti.
1904 Peṇāhikaṅgapañho tatiyo.
- sakamane: sakamano (ka-ma) (Word Variant) ↩
- 12S1.184/1; 19Th1.142/1 (Cross Reference) ↩