Opammakathāpañha
Gadrabhavagga
Cāpaṅgapañha
232. 1693 “Bhante nāgasena, ‘cāpassa ekaṁ aṅgaṁ gahetabban’ti yaṁ vadesi, katamaṁ taṁ ekaṁ aṅgaṁ gahetabban”ti? “Yathā, mahārāja, cāpo sutacchito namito[584] yāvaggamūlaṁ samakameva anunamati nappaṭitthambhati; evameva kho, mahārāja, yoginā yogāvacarena theranavamajjhimasamakesu anunamitabbaṁ nappaṭipharitabbaṁ. Idaṁ, mahārāja, cāpassa ekaṁ aṅgaṁ gahetabbaṁ. Bhāsitampetaṁ, mahārāja, bhagavatā devātidevena vidhura (puṇṇaka) jātake—
1694 [585] ‘Cāpovūnudaro dhīro,
vaṁso vāpi pakampaye[586];
Paṭilomaṁ na vatteyya,
sa rājavasatiṁ vase’”ti.
1695 Cāpaṅgapañho aṭṭhamo.
- namito: mito (sī, maku, pā1, ka-ma) (Word Variant) ↩
- 23J.22.1493/1 (Cross Reference) ↩
- pakampaye: cāpe vānuname dhīro, vaṁsova anulomayaṁ (sī), cāpo vā nuna me dhīro, vaṁsova anulomayaṁ (maku, pā1, ka-ma) (Word Variant) ↩