Yuganaddhavagga
Suññakathā
Yuganaddhavagga
Suññakathā
Yuganaddhavagga
Suññakathā
46. 1699 Evaṁ me sutaṁ— ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme. Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca—
1700 [292] “‘Suñño loko, suñño loko’ti, bhante, vuccati. Kittāvatā nu kho, bhante, ‘suñño loko’ti vuccatī”ti? “Yasmā kho, ānanda, suññaṁ attena vā attaniyena vā, tasmā ‘suñño loko’ti vuccati. Kiñcānanda[293], suññaṁ attena vā attaniyena vā? Cakkhu kho, ānanda, suññaṁ attena vā attaniyena vā. Rūpā suññā attena vā attaniyena vā. Cakkhuviññāṇaṁ suññaṁ attena vā attaniyena vā. Cakkhusamphasso suñño attena vā attaniyena vā. Yampidaṁ[294] cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi suññaṁ attena vā attaniyena vā.
1701 Sotaṁ suññaṁ…pe… saddā suññā… ghānaṁ suññaṁ… gandhā suññā… jivhā suññā… rasā suññā… kāyo suñño… phoṭṭhabbā suññā… mano suñño attena vā attaniyena vā. Dhammā suññā attena vā attaniyena vā. Manoviññāṇaṁ suññaṁ attena vā attaniyena vā. Manosamphasso suñño attena vā attaniyena vā. Yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi suññaṁ attena vā attaniyena vā. Yasmā kho, ānanda, suññaṁ attena vā attaniyena vā tasmā ‘suñño loko’ti vuccatī”ti.
- 13S4.85/1; 25Cn.2.88/1 (Cross Reference) ↩
- Kiñcānanda: kiñca ānanda (pā1) (Word Variant) ↩
- Yampidaṁ: yadidaṁ (ka-ma) (Word Variant) ↩