Tikanipāta
Padumavagga
Ārāmadūsakajātaka
52. 740 “Yo ve sabbasametānaṁ,
ahuvā seṭṭhasammato;
Tassāyaṁ edisī paññā,
kimeva itarā pajā”.
53. 741 “Evameva tuvaṁ brahme,
anaññāya vinindasi;
Kathaṁ mūlaṁ adisvāna[397],
rukkhaṁ jaññā patiṭṭhitaṁ”.
54. 742 “Nāhaṁ tumhe vinindāmi,
ye caññe vānarā vane;
Vissasenova gārayho,
yassatthā rukkharopakā”ti.
743 Ārāmadūsakajātakaṁ aṭṭhamaṁ.
- adisvāna: kathaṁ hi mūlaṁ adisvā (syā2, syā3, pā1) (Word Variant) ↩