Mahāvibhaṅga
Nissaggiyakaṇḍa
Pattavagga
Pariṇatasikkhāpada
657. 2421 [369] Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena sāvatthiyaṁ aññatarassa pūgassa saṁghassa sacīvarabhattaṁ paṭiyattaṁ hoti— “bhojetvā cīvarena acchādessāmā”ti. Atha kho chabbaggiyā bhikkhū yena so pūgo tenupasaṅkamiṁsu; upasaṅkamitvā taṁ pūgaṁ etadavocuṁ— “dethāvuso, amhākaṁ imāni cīvarānī”ti. “Na mayaṁ, bhante, dassāma. Amhākaṁ saṁghassa anuvassaṁ sacīvarabhikkhā paññattā”ti. “Bahū, āvuso, saṁghassa dāyakā, bahū saṁghassa bhattā[370]. Mayaṁ tumhe nissāya tumhe sampassantā idha viharāma. Tumhe ce amhākaṁ na dassatha, atha ko carahi amhākaṁ dassati? Dethāvuso, amhākaṁ imāni cīvarānī”ti. Atha kho so pūgo chabbaggiyehi bhikkhūhi nippīḷiyamāno yathāpaṭiyattaṁ cīvaraṁ chabbaggiyānaṁ bhikkhūnaṁ datvā saṁghaṁ bhattena parivisi. Ye te bhikkhū jānanti saṁghassa sacīvarabhattaṁ paṭiyattaṁ, na ca jānanti chabbaggiyānaṁ bhikkhūnaṁ dinnanti, te evamāhaṁsu— “oṇojethāvuso, saṁghassa cīvaran”ti. “Natthi, bhante. Yathāpaṭiyattaṁ cīvaraṁ ayyā chabbaggiyā attano pariṇāmesun”ti. Ye te bhikkhū appicchā…pe… te ujjhāyanti khiyyanti vipācenti— “kathañhi nāma chabbaggiyā bhikkhū jānaṁ saṁghikaṁ lābhaṁ pariṇataṁ attano pariṇāmessantī”ti.
2422 Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṁ ārocesuṁ…pe… “saccaṁ kira tumhe, bhikkhave, jānaṁ saṁghikaṁ lābhaṁ pariṇataṁ attano pariṇāmethā”ti? “Saccaṁ, bhagavā”ti. Vigarahi buddho bhagavā…pe… kathañhi nāma tumhe, moghapurisā, jānaṁ saṁghikaṁ lābhaṁ pariṇataṁ attano pariṇāmessatha. Netaṁ, moghapurisā, appasannānaṁ vā pasādāya…pe… evañca pana, bhikkhave, imaṁ sikkhāpadaṁ uddiseyyātha—
658. 2423 “Yo pana bhikkhu jānaṁ saṁghikaṁ lābhaṁ pariṇataṁ attano pariṇāmeyya, nissaggiyaṁ pācittiyan”ti. (30:49)
659. 2424 Yo panāti yo yādiso…pe… bhikkhūti…pe… ayaṁ imasmiṁ atthe adhippeto bhikkhūti.
2425 [371] Jānāti nāma sāmaṁ vā jānāti aññe vā tassa ārocenti so vā āroceti.
2426 [372] Saṁghikaṁ nāma saṁghassa dinnaṁ hoti pariccattaṁ.
2427 [373] Lābho nāma cīvarapiṇḍapātasenāsanagilānappaccayabhesajjaparikkhārā. Antamaso cuṇṇapiṇḍopi, dantakaṭṭhampi, dasikasuttampi.
2428 [374] Pariṇataṁ nāma dassāma karissāmāti vācā bhinnā hoti.
2429 Attano pariṇāmeti, payoge dukkaṭaṁ. Paṭilābhena nissaggiyaṁ hoti. Nissajjitabbaṁ saṁghassa vā gaṇassa vā puggalassa vā. Evañca pana, bhikkhave, nissajjitabbaṁ…pe… “idaṁ me, bhante, jānaṁ saṁghikaṁ lābhaṁ pariṇataṁ attano pariṇāmitaṁ nissaggiyaṁ. Imāhaṁ saṁghassa nissajjāmī”ti…pe… dadeyyāti…pe… dadeyyunti…pe… āyasmato dammīti.
660. 2430 Pariṇate pariṇatasaññī attano pariṇāmeti, nissaggiyaṁ pācittiyaṁ.
2431 Pariṇate vematiko attano pariṇāmeti, āpatti dukkaṭassa. Pariṇate apariṇatasaññī attano pariṇāmeti, anāpatti. Saṁghassa pariṇataṁ aññasaṁghassa vā cetiyassa vā pariṇāmeti, āpatti dukkaṭassa. Cetiyassa pariṇataṁ aññacetiyassa vā saṁghassa vā puggalassa vā pariṇāmeti, āpatti dukkaṭassa. Puggalassa pariṇataṁ aññapuggalassa vā saṁghassa vā cetiyassa vā pariṇāmeti, āpatti dukkaṭassa. Apariṇate pariṇatasaññī, āpatti dukkaṭassa. Apariṇate vematiko, āpatti dukkaṭassa. Apariṇate apariṇatasaññī, anāpatti.
661. 2432 Anāpatti— kattha demāti pucchiyamāno yattha tumhākaṁ deyyadhammo paribhogaṁ vā labheyya paṭisaṅkhāraṁ vā labheyya ciraṭṭhitiko vā assa yattha vā pana tumhākaṁ cittaṁ pasīdati tattha dethāti bhaṇati, ummattakassa, ādikammikassāti.
2433 Pariṇatasikkhāpadaṁ niṭṭhitaṁ dasamaṁ.
Pattavaggo tatiyo.
2434
2435 Dve ca pattāni bhesajjaṁ,
vassikā dānapañcamaṁ;
Sāmaṁ vāyāpanacceko,
sāsaṅkaṁ saṁghikena cāti.
662. 2436 “Uddiṭṭhā kho, āyasmanto, tiṁsa nissaggiyā pācittiyā dhammā. Tatthāyasmante pucchāmi— ‘kaccittha parisuddhā’? Dutiyampi pucchāmi— ‘kaccittha parisuddhā’? Tatiyampi pucchāmi— ‘kaccittha parisuddhā’? Parisuddhetthāyasmanto, tasmā tuṇhī, evametaṁ dhārayāmī”ti.
2437 Nissaggiyakaṇḍaṁ niṭṭhitaṁ.
2438 Pārājikapāḷi niṭṭhitā.