Mahāvibhaṅga

Saṃghādisesakaṇḍa

Sukkavissaṭṭhisikkhāpada

Vinītavatthu

263. 945 Tena kho pana samayena aññatarassa bhikkhuno supinantena asuci mucci. Tassa kukkuccaṃ ahosi—  “bhagavatā sikkhāpadaṃ paññattaṃ, kacci nu kho ahaṃ saṃghādisesaṃ āpattiṃ āpanno”ti? Bhagavato etamatthaṃ ārocesi. “Anāpatti, bhikkhu, supinantenā”ti. (1)

946 Tena kho pana samayena aññatarassa bhikkhuno uccāraṃ karontassa asuci mucci. Tassa kukkuccaṃ ahosi…pe…  “kiṃcitto tvaṃ, bhikkhū”ti? “Nāhaṃ, bhagavā, mocanādhippāyo”ti. “Anāpatti, bhikkhu, namocanādhippāyassā”ti. (2)

947 Tena kho pana samayena aññatarassa bhikkhuno passāvaṃ karontassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (3)

948 Tena kho pana samayena aññatarassa bhikkhuno kāmavitakkaṃ vitakkentassa asuci mucci. Tassa kukkuccaṃ ahosi…pe…  “anāpatti, bhikkhu, vitakkentassā”ti. (4)

949 Tena kho pana samayena aññatarassa bhikkhuno uṇhodakena nhāyantassa asuci mucci. Tassa kukkuccaṃ ahosi…pe…  “kiṃcitto tvaṃ, bhikkhū”ti? “Nāhaṃ, bhagavā, mocanādhippāyo”ti. “Anāpatti, bhikkhu, namocanādhippāyassā”ti. (5)

950 Tena kho pana samayena aññatarassa bhikkhuno mocanādhippāyassa uṇhodakena nhāyantassa asuci mucci. Tassa kukkuccaṃ ahosi…pe…  “āpattiṃ tvaṃ, bhikkhu, āpanno saṃghādisesan”ti. (6)

951 Tena kho pana samayena aññatarassa bhikkhuno mocanādhippāyassa uṇhodakena nhāyantassa asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (7)

952 Tena kho pana samayena aññatarassa bhikkhuno aṅgajāte vaṇo hoti. Bhesajjena ālimpentassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (8)

953 Tena kho pana samayena aññatarassa bhikkhuno aṅgajāte vaṇo hoti. Mocanādhippāyassa bhesajjena ālimpentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (9--10)

954 Tena kho pana samayena aññatarassa bhikkhuno aṇḍaṃ kaṇḍuvantassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (11)

955 Tena kho pana samayena aññatarassa bhikkhuno mocanādhippāyassa aṇḍaṃ kaṇḍuvantassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (12--13)

264. 956 Tena kho pana samayena aññatarassa bhikkhuno maggaṃ gacchantassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (14)

957 Tena kho pana samayena aññatarassa bhikkhuno mocanādhippāyassa maggaṃ gacchantassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (15--16)

958 Tena kho pana samayena aññatarassa bhikkhuno vatthiṃ gahetvā passāvaṃ karontassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (17)

959 Tena kho pana samayena aññatarassa bhikkhuno mocanādhippāyassa vatthiṃ gahetvā passāvaṃ karontassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (18--19)

960 Tena kho pana samayena aññatarassa bhikkhuno jantāghare udaravaṭṭiṃ tāpentassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (20)

961 Tena kho pana samayena aññatarassa bhikkhuno mocanādhippāyassa jantāghare udaravaṭṭiṃ tāpentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (21--22)

962 Tena kho pana samayena aññatarassa bhikkhuno jantāghare upajjhāyassa piṭṭhiparikammaṃ karontassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (23)

963 Tena kho pana samayena aññatarassa bhikkhuno mocanādhippāyassa jantāghare upajjhāyassa piṭṭhiparikammaṃ karontassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (24--25)

265. 964 Tena kho pana samayena aññatarassa bhikkhuno ūruṃ ghaṭṭāpentassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (26)

965 Tena kho pana samayena aññatarassa bhikkhuno mocanādhippāyassa ūruṃ ghaṭṭāpentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (27--28)

966 Tena kho pana samayena aññataro bhikkhu mocanādhippāyo aññataraṃ sāmaṇeraṃ etadavoca—  “ehi me tvaṃ, āvuso sāmaṇera, aṅgajātaṃ gaṇhāhī”ti. So tassa aṅgajātaṃ aggahesi. Tasseva asuci mucci. Tassa kukkuccaṃ ahosi…pe…  “āpattiṃ tvaṃ, bhikkhu, āpanno saṃghādisesan”ti. (29)

967 Tena kho pana samayena aññataro bhikkhu suttassa sāmaṇerassa aṅgajātaṃ aggahesi. Tasseva asuci mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti dukkaṭassā”ti. (30)

266. 968 Tena kho pana samayena aññatarassa bhikkhuno mocanādhippāyassa ūrūhi aṅgajātaṃ pīḷentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (31--32)

969 Tena kho pana samayena aññatarassa bhikkhuno mocanādhippāyassa muṭṭhinā aṅgajātaṃ pīḷentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (33--34)

970 Tena kho pana samayena aññatarassa bhikkhuno mocanādhippāyassa ākāse kaṭiṃ kampentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (35--36)

971 Tena kho pana samayena aññatarassa bhikkhuno kāyaṃ thambhentassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (37)

972 Tena kho pana samayena aññatarassa bhikkhuno mocanādhippāyassa kāyaṃ thambhentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (38--39)

973 Tena kho pana samayena aññataro bhikkhu sāratto mātugāmassa aṅgajātaṃ upanijjhāyi. Tassa asuci mucci. Tassa kukkuccaṃ ahosi…pe…  “anāpatti, bhikkhu, saṃghādisesassa. Na ca, bhikkhave, sārattena mātugāmassa aṅgajātaṃ upanijjhāyitabbaṃ. Yo upanijjhāyeyya, āpatti dukkaṭassā”ti. (40)

267. 974 Tena kho pana samayena aññatarassa bhikkhuno mocanādhippāyassa tāḷacchiddaṃ aṅgajātaṃ pavesentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (41--42)

975 Tena kho pana samayena aññatarassa bhikkhuno mocanādhippāyassa kaṭṭhena aṅgajātaṃ ghaṭṭentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (43--44)

976 Tena kho pana samayena aññatarassa bhikkhuno paṭisote nhāyantassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (45)

977 Tena kho pana samayena aññatarassa bhikkhuno mocanādhippāyassa paṭisote nhāyantassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (46--47)

978 Tena kho pana samayena aññatarassa bhikkhuno udañjalaṃ kīḷantassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (48)

979 Tena kho pana samayena aññatarassa bhikkhuno mocanādhippāyassa udañjalaṃ kīḷantassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (49--50)

980 Tena kho pana samayena aññatarassa bhikkhuno udake dhāvantassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (51)

981 Tena kho pana samayena aññatarassa bhikkhuno mocanādhippāyassa udake dhāvantassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (52--53)

982 Tena kho pana samayena aññatarassa bhikkhuno pupphāvaliyaṃ kīḷantassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (54)

983 Tena kho pana samayena aññatarassa bhikkhuno mocanādhippāyassa pupphāvaliyaṃ kīḷantassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (55--56)

268. 984 Tena kho pana samayena aññatarassa bhikkhuno pokkharavane dhāvantassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (57)

985 Tena kho pana samayena aññatarassa bhikkhuno mocanādhippāyassa pokkharavane dhāvantassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (58--59)

986 Tena kho pana samayena aññatarassa bhikkhuno mocanādhippāyassa vālikaṃ aṅgajātaṃ pavesentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (60--61)

987 Tena kho pana samayena aññatarassa bhikkhuno mocanādhippāyassa kaddamaṃ aṅgajātaṃ pavesentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (62--63)

988 Tena kho pana samayena aññatarassa bhikkhuno udakena aṅgajātaṃ osiñcantassa asuci mucci. Tassa kukkuccaṃ ahosi…pe…  “anāpatti, bhikkhu, namocanādhippāyassā”ti. (64)

989 Tena kho pana samayena aññatarassa bhikkhuno mocanādhippāyassa udakena aṅgajātaṃ osiñcantassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (65--66)

990 Tena kho pana samayena aññatarassa bhikkhuno mocanādhippāyassa sayane aṅgajātaṃ ghaṭṭentassa asuci mucci…pe…  asuci na mucci. Tassa kukkuccaṃ ahosi…pe…  “anāpatti, bhikkhu, saṃghādisesassa; āpatti thullaccayassā”ti. (67--68)

991 Tena kho pana samayena aññatarassa bhikkhuno mocanādhippāyassa aṅguṭṭhena aṅgajātaṃ ghaṭṭentassa asuci mucci…pe…  asuci na mucci. Tassa kukkuccaṃ ahosi—  “bhagavatā sikkhāpadaṃ paññattaṃ, kacci nu kho ahaṃ saṃghādisesaṃ āpattiṃ āpanno”ti? Bhagavato etamatthaṃ ārocesi. “Anāpatti, bhikkhu, saṃghādisesassa; āpatti thullaccayassā”ti. (69--70)

992 Sukkavissaṭṭhisikkhāpadaṃ niṭṭhitaṃ paṭhamaṃ.