Siṅgālasutta
Ālasyassa cha ādīnavā
253. 591 Cha khome, gahapatiputta, ādīnavā ālasyānuyoge. Atisītanti kammaṁ na karoti, atiuṇhanti kammaṁ na karoti, atisāyanti kammaṁ na karoti, atipātoti kammaṁ na karoti, atichātosmīti kammaṁ na karoti, atidhātosmīti kammaṁ na karoti. Tassa evaṁ kiccāpadesabahulassa viharato anuppannā ceva bhogā nuppajjanti, uppannā ca bhogā parikkhayaṁ gacchanti. Ime kho, gahapatiputta, cha ādīnavā ālasyānuyoge”ti.
592 Idamavoca bhagavā. Idaṁ vatvāna sugato athāparaṁ etadavoca satthā—
593 “Hoti pānasakhā nāma,
hoti sammiyasammiyo;
Yo ca atthesu jātesu,
sahāyo hoti so sakhā.
594 Ussūraseyyā paradārasevanā,
Verappasavo ca anatthatā ca;
Pāpā ca mittā sukadariyatā ca,
Ete cha ṭhānā purisaṁ dhaṁsayanti. [344]
595 Pāpamitto pāpasakho,
pāpaācāragocaro;
Asmā lokā paramhā ca,
ubhayā dhaṁsate naro.
596 Akkhitthiyo vāruṇī naccagītaṁ,
Divā soppaṁ pāricariyā akāle;
Pāpā ca mittā sukadariyatā ca,
Ete cha ṭhānā purisaṁ dhaṁsayanti.
597 Akkhehi dibbanti suraṁ pivanti,
Yantitthiyo pāṇasamā paresaṁ;
Nihīnasevī na ca vuddhasevī[345],
Nihīyate kāḷapakkheva cando.
598 Yo vāruṇī addhano akiñcano,
Pipāso pivaṁ papāgato[346];
Udakamiva iṇaṁ vigāhati,
Akulaṁ kāhiti khippamattano. [347]
599 Na divā soppasīlena,
rattimuṭṭhānadessinā;
Niccaṁ mattena soṇḍena,
sakkā āvasituṁ gharaṁ. [348]
600 Atisītaṁ atiuṇhaṁ,
atisāyamidaṁ ahu;
Iti vissaṭṭhakammante,
atthā accenti māṇave.
601 Yodha sītañca uṇhañca,
tiṇā bhiyyo na maññati;
Karaṁ purisakiccāni,
so sukhaṁ[349] na vihāyatī”ti.
- Verappasavo: verappasaṅgo (sī, syā1-3, pā1) (Word Variant) ↩
- vuddhasevī: vuddhisevī (syā1-3), buddhisevī (ka-ma) (Word Variant) ↩
- papāgato: pipāsosi atthapāgato (syā1-3), pipāso pibam papāgato (pā1), pipāsopi samappapāgato (ka-ma) (Word Variant) ↩
- Akulaṁ: ākulaṁ (syā1-3, ka-ma) (Word Variant) ↩
- rattimuṭṭhānadessinā: rattinuṭṭhānadessinā (syā1-3), rattinuṭṭhānadassinā (pā1), rattimuṭṭhānasīlinā (?) (Word Variant) ↩
- sukhaṁ: sukhā (sabbattha) aṭṭhakathā (Word Variant) ↩