Lakkhaṇasutta
448 Ussaṅkhapāda-uddhaggalomatālakkhaṇāni
212. 449 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno[275] atthūpasaṁhitaṁ dhammūpasaṁhitaṁ vācaṁ bhāsitā ahosi, bahujanaṁ nidaṁsesi, pāṇīnaṁ hitasukhāvaho dhammayāgī. So tassa kammassa kaṭattā…pe… so tato cuto itthattaṁ āgato samāno imāni dve mahāpurisalakkhaṇāni paṭilabhati. Ussaṅkhapādo ca hoti, uddhaggalomo ca.
450 So tehi lakkhaṇehi samannāgato, sace agāraṁ ajjhāvasati, rājā hoti cakkavattī…pe… rājā samāno kiṁ labhati? Aggo ca hoti seṭṭho ca pāmokkho ca uttamo ca pavaro ca kāmabhogīnaṁ. Rājā samāno idaṁ labhati…pe… buddho samāno kiṁ labhati? Aggo ca hoti seṭṭho ca pāmokkho ca uttamo ca pavaro ca sabbasattānaṁ. Buddho samāno idaṁ labhati”. Etamatthaṁ bhagavā avoca.
213. 451 Tatthetaṁ vuccati—
452 “Atthadhammasahitaṁ pure giraṁ,
Erayaṁ bahujanaṁ nidaṁsayi;
Pāṇinaṁ hitasukhāvaho ahu,
Dhammayāgamayajī amaccharī. [276] [277]
453 Tena so sucaritena kammunā,
Suggatiṁ vajati tattha modati;
Lakkhaṇāni ca duve idhāgato,
Uttamappamukhatāya vindati[279]. [278]
454 Ubbhamuppatitalomavā saso,
Pādagaṇṭhirahu sādhusaṇṭhitā;
Maṁsalohitācitā tacotthatā,
Uparicaraṇasobhanā ahu. [280]
455 Gehamāvasati ce tathāvidho,
Aggataṁ vajati kāmabhoginaṁ;
Tena uttaritaro na vijjati,
Jambudīpamabhibhuyya iriyati.
456 Pabbajampi ca anomanikkamo,
Aggataṁ vajati sabbapāṇinaṁ;
Tena uttaritaro na vijjati,
Sabbalokamabhibhuyya viharatī”ti.
- samāno: samāno bahuno janassa (sī, pā1) (Word Variant) ↩
- "Atthadhammasahitaṁ: atthadhammasaṁhitaṁ (sī), atthadhammaṁ saṅgahitaṁ (syā1-3), atthadhammupasaṁhitaṁ (ka-ma) (Word Variant) ↩
- Dhammayāgamayajī: dhammayāgaṁ assajji (syā1-3), dhammayāgaṁ assaji (pā1, ka-ma) (Word Variant) ↩
- Uttamappamukhatāya: uttamasamukhatāya (syā1), uttamasukhatāya (syā2, syā3), uttamasukhāni (pā1), uttamapamukkhatāya (ka-ma) (Word Variant) ↩
- vindati: saṁvindati (pā1) (Word Variant) ↩
- Uparicaraṇasobhanā: uparicaraṇā ca sobhanā (sī), uparijānu sobhanā (syā1-3), upari ca pana sobhaṇā (pā1) (Word Variant) ↩