Lakkhaṇasutta
506 Rasaggasaggitālakkhaṇaṁ
226. 507 [309] “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno sattānaṁ aviheṭhakajātiko ahosi pāṇinā vā leḍḍunā vā daṇḍena vā satthena vā. So tassa kammassa kaṭattā upacitattā…pe… so tato cuto itthattaṁ āgato samāno imaṁ mahāpurisalakkhaṇaṁ paṭilabhati, rasaggasaggī hoti, uddhaggāssa rasaharaṇīyo gīvāya jātā honti samābhivāhiniyo[310].
508 So tena lakkhaṇena samannāgato sace agāraṁ ajjhāvasati, rājā hoti cakkavattī…pe… rājā samāno kiṁ labhati? Appābādho hoti appātaṅko, samavepākiniyā gahaṇiyā samannāgato nātisītāya nāccuṇhāya. Rājā samāno idaṁ labhati…pe… buddho samāno kiṁ labhati? Appābādho hoti appātaṅko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya. Buddho samāno idaṁ labhati”. Etamatthaṁ bhagavā avoca.
227. 509 Tatthetaṁ vuccati—
510 “Na pāṇidaṇḍehi panātha leḍḍunā,
Satthena vā maraṇavadhena[311] vā pana;
Ubbādhanāya paritajjanāya vā,
Na heṭhayī janatamaheṭhako ahu.
511 Teneva so sugatimupecca modati,
Sukhapphalaṁ kariya sukhāni vindati;
Samojasā rasaharaṇī susaṇṭhitā,
Idhāgato labhati rasaggasaggitaṁ. [312]
512 Tenāhu naṁ atinipuṇā vicakkhaṇā,
Ayaṁ naro sukhabahulo bhavissati;
Gihissa vā pabbajitassa vā puna[313],
Taṁ lakkhaṇaṁ bhavati tadatthajotakan”ti.
- 28Mi:976 (Cross Reference) ↩
- samābhivāhiniyo: samāvāhiniyo (sī), samavāharasaharaṇiyo (syā1-3), samabhivāhiniyo (pā1) (Word Variant) ↩
- maraṇavadhena: māraṇavadhena (ka-ma) (Word Variant) ↩
- Samojasā: pāmuñjasā (syā1-3), sampajjasā (pā1), sāmañca sā (ka-ma) (Word Variant) ↩
- puna: pana (syā1-3) (Word Variant) ↩