Lakkhaṇasutta
490 Parimaṇḍalaanonamajaṇṇuparimasanalakkhaṇāni
222. 491 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno mahājanasaṅgahaṁ[301] samekkhamāno[302] samaṁ jānāti sāmaṁ jānāti, purisaṁ jānāti purisavisesaṁ jānāti— ‘ayamidamarahati ayamidamarahatī’ti tattha tattha purisavisesakaro ahosi. So tassa kammassa kaṭattā…pe… so tato cuto itthattaṁ āgato samāno imāni dve mahāpurisalakkhaṇāni paṭilabhati. Nigrodhaparimaṇḍalo ca hoti, ṭhitakoyeva ca anonamanto ubhohi pāṇitalehi jaṇṇukāni parimasati parimajjati.
492 So tehi lakkhaṇehi samannāgato sace agāraṁ ajjhāvasati, rājā hoti cakkavattī…pe… rājā samāno kiṁ labhati? Aḍḍho hoti mahaddhano mahābhogo pahūtajātarūparajato pahūtavittūpakaraṇo pahūtadhanadhañño paripuṇṇakosakoṭṭhāgāro. Rājā samāno idaṁ labhati…pe… buddho samāno kiṁ labhati? Aḍḍho hoti mahaddhano mahābhogo. Tassimāni dhanāni honti, seyyathidaṁ— saddhādhanaṁ sīladhanaṁ hiridhanaṁ ottappadhanaṁ sutadhanaṁ cāgadhanaṁ paññādhanaṁ. Buddho samāno idaṁ labhati”. Etamatthaṁ bhagavā avoca.
223. 493 Tatthetaṁ vuccati—
494 “Tuliya paṭivicaya cintayitvā,
Mahājanasaṅgahanaṁ samekkhamāno;
Ayamidamarahati tattha tattha,
Purisavisesakaro pure ahosi. [303]
495 Mahiñca pana ṭhito[304] anonamanto,
Phusati karehi ubhohi jaṇṇukāni;
Mahiruhaparimaṇḍalo ahosi,
Sucaritakammavipākasesakena.
496 Bahuvividhanimittalakkhaṇaññū,
Atinipuṇā manujā byākariṁsu;
Bahuvividhā gihīnaṁ arahāni,
Paṭilabhati daharo susu kumāro.
497 Idha ca mahīpatissa kāmabhogī,
Gihipatirūpakā bahū bhavanti;
Yadi ca jahati sabbakāmabhogaṁ,
Labhati anuttaraṁ uttamadhanaggan”ti.
- mahājanasaṅgahaṁ: mahājanasaṅgāhakaṁ (syā1-3, ka-ma), mahājanasaṁgahataṁ (pā1) (Word Variant) ↩
- samekkhamāno: samapekkhamāno (ka-ma) (Word Variant) ↩
- Mahājanasaṅgahanaṁ: mahājanasaṅgāhakaṁ (syā1-3), mahājanaṁ saṅgāhakaṁ (ka-ma) (Word Variant) ↩
- ṭhito: sa hi ca pana ṭhito (sī, pā1), samā ca panaṭṭhito (syā1-3) (Word Variant) ↩