Lakkhaṇasutta
473 Suvaṇṇavaṇṇalakkhaṇaṁ
218. 474 “Yampi, bhikkhave, tathāgato purimaṁ jātiṁ purimaṁ bhavaṁ purimaṁ niketaṁ pubbe manussabhūto samāno akkodhano ahosi anupāyāsabahulo, bahumpi vutto samāno nābhisajji na kuppi na byāpajji na patitthīyi, na kopañca dosañca appaccayañca pātvākāsi. Dātā ca ahosi sukhumānaṁ mudukānaṁ attharaṇānaṁ pāvuraṇānaṁ[289] khomasukhumānaṁ kappāsikasukhumānaṁ koseyyasukhumānaṁ kambalasukhumānaṁ. So tassa kammassa kaṭattā upacitattā…pe… so tato cuto itthattaṁ āgato samāno imaṁ mahāpurisalakkhaṇaṁ paṭilabhati. Suvaṇṇavaṇṇo hoti kañcanasannibhattaco.
475 So tena lakkhaṇena samannāgato sace agāraṁ ajjhāvasati, rājā hoti cakkavattī…pe… rājā samāno kiṁ labhati? Lābhī hoti sukhumānaṁ mudukānaṁ attharaṇānaṁ pāvuraṇānaṁ khomasukhumānaṁ kappāsikasukhumānaṁ koseyyasukhumānaṁ kambalasukhumānaṁ. Rājā samāno idaṁ labhati…pe… buddho samāno kiṁ labhati? Lābhī hoti sukhumānaṁ mudukānaṁ attharaṇānaṁ pāvuraṇānaṁ khomasukhumānaṁ kappāsikasukhumānaṁ koseyyasukhumānaṁ kambalasukhumānaṁ. Buddho samāno idaṁ labhati”. Etamatthaṁ bhagavā avoca.
219. 476 Tatthetaṁ vuccati—
477 “Akkodhañca adhiṭṭhahi adāsi[290],
Dānañca vatthāni sukhumāni succhavīni;
Purimatarabhave ṭhito abhivissaji,
Mahimiva suro abhivassaṁ.
478 Taṁ katvāna ito cuto dibbaṁ,
Upapajji sukataphalavipākamanubhutvā;
Kanakatanusannibho idhābhibhavati,
Suravarataroriva indo. [291]
479 Gehañcāvasati naro apabbajja,
Micchaṁ mahatimahiṁ anusāsati[292];
Pasayha sahidha sattaratanaṁ[293],
Paṭilabhati vimalasukhumacchaviṁ[294] suciñca.
480 Lābhī acchādanavatthamokkhapāvuraṇānaṁ,
Bhavati yadi anāgāriyataṁ upeti;
Sahito purimakataphalaṁ anubhavati,
Na bhavati katassa panāso”ti. [295]
- pāvuraṇānaṁ: pāpuraṇānaṁ (sī, syā1-3, pā1) (Word Variant) ↩
- adāsi: adāsi ca (pā1) (Word Variant) ↩
- Upapajji: dibbaṁ, upapajja (sī, pā1), dibbamupapajji (syā1-3) (Word Variant) ↩
- anusāsati: anusāsatī (sī), pasāsati (syā1-3) (Word Variant) ↩
- sattaratanaṁ: pasayha sa hi ca sattaratanaṁ (sī), pasayha abhivasana-varataraṁ (pā1) (Word Variant) ↩
- vimalasukhumacchaviṁ: vipula ... (syā1-3), vipulaṁ ... (pā1) (Word Variant) ↩
- Sahito: sa hi (sī), suhita (syā1-3), sahī (pā1) (Word Variant) ↩