Tipitaka2500 tipitaka2500.github.io

Nigaṇṭhanāṭaputtakālaṃkiriyā

6.1. นิคัณ์นาฏปุต์ตกาลํกิริยา

Pāsādikasutta

Nigaṇṭhanāṭaputtakālaṃkiriyā

335 Tena kho pana samayena nigaṇṭho nāṭaputto[214] pāvāyaṁ adhunākālaṅkato hoti. Tassa kālaṁkiriyāya bhinnā nigaṇṭhā dvedhikajātā bhaṇḍanajātā kalahajātā vivādāpannā aññamaññaṁ mukhasattīhi vitudantā viharanti— “na tvaṁ imaṁ dhammavinayaṁ ājānāsi, ahaṁ imaṁ dhammavinayaṁ ājānāmi, kiṁ tvaṁ imaṁ dhammavinayaṁ ājānissasi? Micchāpaṭipanno tvamasi, ahamasmi sammāpaṭipanno. Sahitaṁ me, asahitaṁ te. Purevacanīyaṁ pacchā avaca, pacchāvacanīyaṁ pure avaca. Adhiciṇṇaṁ te viparāvattaṁ, āropito te vādo, niggahito tvamasi, cara vādappamokkhāya, nibbeṭhehi vā sace pahosī”ti. Vadhoyeva kho[215] maññe nigaṇṭhesu nāṭaputtiyesu vattati[216]. Yepi nigaṇṭhassa nāṭaputtassa sāvakā gihī odātavasanā, tepi[217] nigaṇṭhesu nāṭaputtiyesu nibbinnarūpā[218] virattarūpā paṭivānarūpā, yathā taṁ durakkhāte dhammavinaye duppavedite aniyyānike anupasamasaṁvattanike asammāsambuddhappavedite bhinnathūpe appaṭisaraṇe.

165. 336 Atha kho cundo samaṇuddeso pāvāyaṁ vassaṁvuṭṭho[219] yena sāmagāmo, yenāyasmā ānando tenupasaṅkami; upasaṅkamitvā āyasmantaṁ ānandaṁ abhivādetvā ekamantaṁ nisīdi. Ekamantaṁ nisinno kho cundo samaṇuddeso āyasmantaṁ ānandaṁ etadavoca— “nigaṇṭho, bhante, nāṭaputto pāvāyaṁ adhunākālaṅkato. Tassa kālaṁkiriyāya bhinnā nigaṇṭhā dvedhikajātā…pe… bhinnathūpe appaṭisaraṇe”ti.

337 Evaṁ vutte, āyasmā ānando cundaṁ samaṇuddesaṁ etadavoca— “atthi kho idaṁ, āvuso cunda, kathāpābhataṁ bhagavantaṁ dassanāya. Āyāmāvuso cunda, yena bhagavā tenupasaṅkamissāma; upasaṅkamitvā etamatthaṁ bhagavato ārocessāmā”ti. “Evaṁ, bhante”ti kho cundo samaṇuddeso āyasmato ānandassa paccassosi. [220]

338 Atha kho āyasmā ca ānando cundo ca samaṇuddeso yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinno kho āyasmā ānando bhagavantaṁ etadavoca— “ayaṁ, bhante, cundo samaṇuddeso evamāha, ‘nigaṇṭho, bhante, nāṭaputto pāvāyaṁ adhunākālaṅkato, tassa kālaṁkiriyāya bhinnā nigaṇṭhā…pe… bhinnathūpe appaṭisaraṇe’”ti.

  1. nāṭaputto: nātaputto (sī), nāthaputto (pā1) (Word Variant) ↩
  2. kho: vadhoyeveko (ka-ma) (Word Variant) ↩
  3. vattati: anuvattati (syā1-3, ka-ma) (Word Variant) ↩
  4. tepi: te tesu (ka-ma) (Word Variant) ↩
  5. nibbinnarūpā: nibiṇṇarūpā (pā1), nibbindarūpā (ka-ma) (Word Variant) ↩
  6. vassaṁvuṭṭho: vassaṁ vuttho (sī, syā1-3, pā1) (Word Variant) ↩
  7. ārocessāmā"ti: āroceyyāmāti (syā1-3) (Word Variant) ↩