Udumbarikasutta
Paribbājakānaṃpajjhāyana
78. 174 Siyā kho pana te[107], nigrodha, evamassa— ‘antevāsikamyatā no samaṇo gotamo evamāhā’ti. Na kho panetaṁ, nigrodha, evaṁ daṭṭhabbaṁ. Yo eva vo[108] ācariyo, so eva vo ācariyo hotu.
175 Siyā kho pana te, nigrodha, evamassa— ‘uddesā no cāvetukāmo samaṇo gotamo evamāhā’ti. Na kho panetaṁ, nigrodha, evaṁ daṭṭhabbaṁ. Yo eva vo uddeso so eva vo uddeso hotu.
176 Siyā kho pana te, nigrodha, evamassa— ‘ājīvā no cāvetukāmo samaṇo gotamo evamāhā’ti. Na kho panetaṁ, nigrodha, evaṁ daṭṭhabbaṁ. Yo eva vo ājīvo, so eva vo ājīvo hotu.
177 Siyā kho pana te, nigrodha, evamassa— ‘ye no dhammā[109] akusalā akusalasaṅkhātā sācariyakānaṁ, tesu patiṭṭhāpetukāmo samaṇo gotamo evamāhā’ti. Na kho panetaṁ, nigrodha, evaṁ daṭṭhabbaṁ. Akusalā ceva vo te dhammā hontu akusalasaṅkhātā ca sācariyakānaṁ.
178 Siyā kho pana te, nigrodha, evamassa— ‘ye no dhammā kusalā kusalasaṅkhātā sācariyakānaṁ, tehi vivecetukāmo samaṇo gotamo evamāhā’ti. Na kho panetaṁ, nigrodha, evaṁ daṭṭhabbaṁ. Kusalā ceva vo te dhammā hontu kusalasaṅkhātā ca sācariyakānaṁ.
179 Iti khvāhaṁ, nigrodha, neva antevāsikamyatā evaṁ vadāmi, napi uddesā cāvetukāmo evaṁ vadāmi, napi ājīvā cāvetukāmo evaṁ vadāmi, napi ye vo dhammā[110] akusalā akusalasaṅkhātā sācariyakānaṁ, tesu patiṭṭhāpetukāmo evaṁ vadāmi, napi ye vo dhammā[111] kusalā kusalasaṅkhātā sācariyakānaṁ, tehi vivecetukāmo evaṁ vadāmi. Santi ca kho, nigrodha, akusalā dhammā appahīnā saṁkilesikā ponobbhavikā[112] sadarā[113] dukkhavipākā āyatiṁ jātijarāmaraṇiyā, yesāhaṁ pahānāya dhammaṁ desemi. Yathāpaṭipannānaṁ vo saṁkilesikā dhammā pahīyissanti, vodānīyā dhammā abhivaḍḍhissanti, paññāpāripūriṁ vepullattañca diṭṭheva dhamme sayaṁ abhiññā sacchikatvā upasampajja viharissathā”ti.
79. 180 Evaṁ vutte, te paribbājakā tuṇhībhūtā maṅkubhūtā pattakkhandhā adhomukhā pajjhāyantā appaṭibhānā nisīdiṁsu yathā taṁ mārena pariyuṭṭhitacittā. Atha kho bhagavato etadahosi— “sabbepime moghapurisā phuṭṭhā pāpimatā. Yatra hi nāma ekassapi na evaṁ bhavissati— ‘handa mayaṁ aññāṇatthampi samaṇe gotame brahmacariyaṁ carāma, kiṁ karissati sattāho’”ti?
181 Atha kho bhagavā udumbarikāya paribbājakārāme sīhanādaṁ naditvā vehāsaṁ abbhuggantvā gijjhakūṭe pabbate paccupaṭṭhāsi[114]. Sandhāno pana gahapati tāvadeva rājagahaṁ pāvisīti.
182 Udumbarikasuttaṁ niṭṭhitaṁ dutiyaṁ.
- te: panetaṁ (cha1) (Word Variant) ↩
- vo: te (sī) (Word Variant) ↩
- dhammā: vo dhammā (sī, ka-ma), te dhammā (syā1-3) (Word Variant) ↩
- dhammā: napi ye ca kho dhammā (sī), napi ye te dhammā (syā1-3), napi ye ca vo dhammā (ka-ma) (Word Variant) ↩
- dhammā: napi ye ca kho dhammā (sī), napi ye te dhammā (syā1-3), napi ye ca vo dhammā (ka-ma) (Word Variant) ↩
- ponobbhavikā: ponobhavikā (sī, pā1, ka-ma) (Word Variant) ↩
- sadarā: sadarathā (syā1-3, ka-ma), saddarā (pā1, ka-ma) (Word Variant) ↩
- paccupaṭṭhāsi: paccuṭṭhāsi (sī, syā1-3, pā1) (Word Variant) ↩