Udumbarikasutta
Tapojigucchāvāda
Parisuddhapapaṭikappattakathā
64. 138 “Idha, nigrodha, tapassī tapaṁ samādiyati, so tena tapasā na attamano hoti na paripuṇṇasaṅkappo. Yampi, nigrodha, tapassī tapaṁ samādiyati, so tena tapasā na attamano hoti na paripuṇṇasaṅkappo. Evaṁ so tasmiṁ ṭhāne parisuddho hoti.
139 Puna caparaṁ, nigrodha, tapassī tapaṁ samādiyati, so tena tapasā na attānukkaṁseti na paraṁ vambheti…pe… evaṁ so tasmiṁ ṭhāne parisuddho hoti.
140 Puna caparaṁ, nigrodha, tapassī tapaṁ samādiyati, so tena tapasā na majjati na mucchati na pamādamāpajjati…pe… evaṁ so tasmiṁ ṭhāne parisuddho hoti.
65. 141 Puna caparaṁ, nigrodha, tapassī tapaṁ samādiyati, so tena tapasā lābhasakkārasilokaṁ abhinibbatteti, so tena lābhasakkārasilokena na attamano hoti na paripuṇṇasaṅkappo…pe… evaṁ so tasmiṁ ṭhāne parisuddho hoti.
142 Puna caparaṁ, nigrodha, tapassī tapaṁ samādiyati, so tena tapasā lābhasakkārasilokaṁ abhinibbatteti, so tena lābhasakkārasilokena na attānukkaṁseti na paraṁ vambheti…pe… evaṁ so tasmiṁ ṭhāne parisuddho hoti.
143 Puna caparaṁ, nigrodha, tapassī tapaṁ samādiyati, so tena tapasā lābhasakkārasilokaṁ abhinibbatteti, so tena lābhasakkārasilokena na majjati na mucchati na pamādamāpajjati…pe… evaṁ so tasmiṁ ṭhāne parisuddho hoti.
66. 144 Puna caparaṁ, nigrodha, tapassī bhojanesu na vodāsaṁ āpajjati— ‘idaṁ me khamati, idaṁ me nakkhamatī’ti. So yañca khvassa nakkhamati, taṁ anapekkho pajahati. Yaṁ panassa khamati, taṁ agadhito amucchito anajjhāpanno ādīnavadassāvī nissaraṇapañño paribhuñjati…pe… evaṁ so tasmiṁ ṭhāne parisuddho hoti.
145 Puna caparaṁ, nigrodha, tapassī na tapaṁ samādiyati lābhasakkārasilokanikantihetu— ‘sakkarissanti maṁ rājāno rājamahāmattā khattiyā brāhmaṇā gahapatikā titthiyā’ti…pe… evaṁ so tasmiṁ ṭhāne parisuddho hoti.
67. 146 Puna caparaṁ, nigrodha, tapassī aññataraṁ samaṇaṁ vā brāhmaṇaṁ vā nāpasādetā hoti— ‘kiṁ panāyaṁ sambahulājīvo sabbaṁ sambhakkheti. Seyyathidaṁ— mūlabījaṁ khandhabījaṁ phaḷubījaṁ aggabījaṁ bījabījameva pañcamaṁ, asanivicakkaṁ dantakūṭaṁ, samaṇappavādenā’ti…pe… evaṁ so tasmiṁ ṭhāne parisuddho hoti.
147 [90] Puna caparaṁ, nigrodha, tapassī passati aññataraṁ samaṇaṁ vā brāhmaṇaṁ vā kulesu sakkariyamānaṁ garu kariyamānaṁ māniyamānaṁ pūjiyamānaṁ. Disvā tassa[91] na evaṁ hoti— ‘imañhi nāma sambahulājīvaṁ kulesu sakkaronti garuṁ karonti mānenti pūjenti. Maṁ pana tapassiṁ lūkhājīviṁ kulesu na sakkaronti na garuṁ karonti na mānenti na pūjentī’ti, iti so issāmacchariyaṁ kulesu nuppādetā hoti…pe… evaṁ so tasmiṁ ṭhāne parisuddho hoti.
68. 148 Puna caparaṁ, nigrodha, tapassī na āpāthakanisādī hoti…pe… evaṁ so tasmiṁ ṭhāne parisuddho hoti.
149 Puna caparaṁ, nigrodha, tapassī na attānaṁ adassayamāno kulesu carati— ‘idampi me tapasmiṁ, idampi me tapasmin’ti…pe… evaṁ so tasmiṁ ṭhāne parisuddho hoti.
150 Puna caparaṁ, nigrodha, tapassī na kiñcideva paṭicchannaṁ sevati, so— ‘khamati te idan’ti puṭṭho samāno akkhamamānaṁ āha— ‘nakkhamatī’ti. Khamamānaṁ āha— ‘khamatī’ti. Iti so sampajānamusā na bhāsitā hoti…pe… evaṁ so tasmiṁ ṭhāne parisuddho hoti.
151 Puna caparaṁ, nigrodha, tapassī tathāgatassa vā tathāgatasāvakassa vā dhammaṁ desentassa santaṁyeva pariyāyaṁ anuññeyyaṁ anujānāti…pe… evaṁ so tasmiṁ ṭhāne parisuddho hoti.
69. 152 Puna caparaṁ, nigrodha, tapassī akkodhano hoti anupanāhī. Yampi, nigrodha, tapassī akkodhano hoti anupanāhī evaṁ so tasmiṁ ṭhāne parisuddho hoti.
153 Puna caparaṁ, nigrodha, tapassī amakkhī hoti apaḷāsī…pe… anissukī hoti amaccharī… asaṭho hoti amāyāvī… atthaddho hoti anatimānī… na pāpiccho hoti na pāpikānaṁ icchānaṁ vasaṁ gato… na micchādiṭṭhiko hoti na antaggāhikāya diṭṭhiyā samannāgato… na sandiṭṭhiparāmāsī hoti na ādhānaggāhī suppaṭinissaggī. Yampi, nigrodha, tapassī na sandiṭṭhiparāmāsī hoti na ādhānaggāhī suppaṭinissaggī. Evaṁ so tasmiṁ ṭhāne parisuddho hoti.
154 Taṁ kiṁ maññasi, nigrodha, yadi evaṁ sante tapojigucchā parisuddhā vā hoti aparisuddhā vā”ti? “Addhā kho, bhante, evaṁ sante tapojigucchā parisuddhā hoti no aparisuddhā, aggappattā ca sārappattā cā”ti. “Na kho, nigrodha, ettāvatā tapojigucchā aggappattā ca hoti sārappattā ca; api ca kho papaṭikappattā[92] hotī”ti.