Bhikkhunivibhaṅga
Paṭhamabhāga
Katāpattivāra
Pācittiyakaṇḍa
Cittāgāravagga
235. 921 Rājāgāraṁ vā cittāgāraṁ vā ārāmaṁ vā uyyānaṁ vā pokkharaṇiṁ vā dassanāya gacchantī dve āpattiyo āpajjati. Gacchati, āpatti dukkaṭassa; yattha ṭhitā passati, āpatti pācittiyassa. (1)
922 Āsandiṁ vā pallaṅkaṁ vā paribhuñjantī dve āpattiyo āpajjati. Paribhuñjati, payoge dukkaṭaṁ; paribhutte, āpatti pācittiyassa. (2)
923 Suttaṁ kantantī dve āpattiyo āpajjati. Kantati, payoge dukkaṭaṁ; ujjavujjave, āpatti pācittiyassa. (3)
924 Gihiveyyāvaccaṁ karontī dve āpattiyo āpajjati. Karoti, payoge dukkaṭaṁ; kate, āpatti pācittiyassa. (4)
925 Bhikkhuniyā— “ehāyye, imaṁ adhikaraṇaṁ vūpasamehī”ti vuccamānā— “sādhū”ti paṭissuṇitvā neva vūpasamentī na vūpasamāya ussukkaṁ karontī ekaṁ āpattiṁ āpajjati. Pācittiyaṁ. (5)
926 Agārikassa vā paribbājakassa vā paribbājikāya vā sahatthā khādanīyaṁ vā bhojanīyaṁ vā dentī dve āpattiyo āpajjati. Deti, payoge dukkaṭaṁ; dinne, āpatti pācittiyassa. (6)
927 Āvasathacīvaraṁ anissajjitvā paribhuñjantī dve āpattiyo āpajjati. Paribhuñjati, payoge dukkaṭaṁ; paribhutte, āpatti pācittiyassa. (7)
928 Āvasathaṁ anissajjitvā cārikaṁ pakkamantī dve āpattiyo āpajjati. Paṭhamaṁ pādaṁ parikkhepaṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa. (8)
929 Tiracchānavijjaṁ pariyāpuṇantī dve āpattiyo āpajjati. Pariyāpuṇāti, payoge dukkaṭaṁ; pade pade āpatti pācittiyassa. (9)
930 Tiracchānavijjaṁ vācentī dve āpattiyo āpajjati. Vāceti, payoge dukkaṭaṁ; pade pade āpatti pācittiyassa. (10)
931 Cittāgāravaggo pañcamo.