Atthāpattisamuṭṭhāna
Saṃghādisesa
471. 2206 Upakkamitvā asuciṁ mocentassa saṁghādiseso katihi samuṭṭhānehi samuṭṭhāti? Upakkamitvā asuciṁ mocentassa saṁghādiseso ekena samuṭṭhānena samuṭṭhāti— kāyato ca cittato ca samuṭṭhāti, na vācato. (1)
2207 Mātugāmena saddhiṁ kāyasaṁsaggaṁ samāpajjantassa saṁghādiseso katihi samuṭṭhānehi samuṭṭhāti? Mātugāmena saddhiṁ kāyasaṁsaggaṁ samāpajjantassa saṁghādiseso ekena samuṭṭhānena samuṭṭhāti— kāyato ca cittato ca samuṭṭhāti, na vācato. (2)
2208 Mātugāmaṁ duṭṭhullāhi vācāhi obhāsentassa saṁghādiseso katihi samuṭṭhānehi samuṭṭhāti? Mātugāmaṁ duṭṭhullāhi vācāhi obhāsentassa saṁghādiseso tīhi samuṭṭhānehi samuṭṭhāti— siyā kāyato ca cittato ca samuṭṭhāti na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti. (3)
2209 Mātugāmassa santike attakāmapāricariyāya vaṇṇaṁ bhāsantassa saṁghādiseso katihi samuṭṭhānehi samuṭṭhāti? Mātugāmassa santike attakāmapāricariyāya vaṇṇaṁ bhāsantassa saṁghādiseso tīhi samuṭṭhānehi samuṭṭhāti…pe… . (4)
2210 Sañcarittaṁ samāpajjantassa saṁghādiseso katihi samuṭṭhānehi samuṭṭhāti? Sañcarittaṁ samāpajjantassa saṁghādiseso chahi samuṭṭhānehi samuṭṭhāti— siyā kāyato samuṭṭhāti, na vācato na cittato; siyā vācato samuṭṭhāti, na kāyato na cittato; siyā kāyato ca vācato ca samuṭṭhāti, na cittato; siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti. (5)
2211 Saññācikāya kuṭiṁ kārāpentassa saṁghādiseso katihi samuṭṭhānehi samuṭṭhāti? Saññācikāya kuṭiṁ kārāpentassa saṁghādiseso chahi samuṭṭhānehi samuṭṭhāti…pe… . (6)
2212 Mahallakaṁ vihāraṁ kārāpentassa saṁghādiseso katihi samuṭṭhānehi samuṭṭhāti? Mahallakaṁ vihāraṁ kārāpentassa saṁghādiseso chahi samuṭṭhānehi samuṭṭhāti…pe… . (7)
2213 Bhikkhuṁ amūlakena pārājikena dhammena anuddhaṁsentassa saṁghādiseso katihi samuṭṭhānehi samuṭṭhāti? Bhikkhuṁ amūlakena pārājikena dhammena anuddhaṁsentassa saṁghādiseso tīhi samuṭṭhānehi samuṭṭhāti…pe… . (8)
2214 Bhikkhuṁ aññabhāgiyassa adhikaraṇassa kiñci desaṁ lesamattaṁ upādāya pārājikena dhammena anuddhaṁsentassa saṁghādiseso katihi samuṭṭhānehi samuṭṭhāti? Bhikkhuṁ aññabhāgiyassa adhikaraṇassa kiñci desaṁ lesamattaṁ upādāya pārājikena dhammena anuddhaṁsentassa saṁghādiseso tīhi samuṭṭhānehi samuṭṭhāti…pe… . (9)
2215 Saṁghabhedakassa bhikkhuno yāvatatiyaṁ samanubhāsanāya na paṭinissajjantassa saṁghādiseso katihi samuṭṭhānehi samuṭṭhāti? Saṁghabhedakassa bhikkhuno yāvatatiyaṁ samanubhāsanāya na paṭinissajjantassa saṁghādiseso ekena samuṭṭhānena samuṭṭhāti— kāyato ca vācato ca cittato ca samuṭṭhāti. (10)
2216 Bhedakānuvattakānaṁ bhikkhūnaṁ yāvatatiyaṁ samanubhāsanāya na paṭinissajjantānaṁ saṁghādiseso katihi samuṭṭhānehi samuṭṭhāti? Bhedakānuvattakānaṁ bhikkhūnaṁ yāvatatiyaṁ samanubhāsanāya na paṭinissajjantānaṁ saṁghādiseso ekena samuṭṭhānena samuṭṭhāti— kāyato ca vācato ca cittato ca samuṭṭhāti. (11)
2217 Dubbacassa bhikkhuno yāvatatiyaṁ samanubhāsanāya na paṭinissajjantassa saṁghādiseso katihi samuṭṭhānehi samuṭṭhāti? Dubbacassa bhikkhuno yāvatatiyaṁ samanubhāsanāya na paṭinissajjantassa saṁghādiseso ekena samuṭṭhānena samuṭṭhāti— kāyato ca vācato ca cittato ca samuṭṭhāti. (12)
2218 Kuladūsakassa bhikkhuno yāvatatiyaṁ samanubhāsanāya na paṭinissajjantassa saṁghādiseso katihi samuṭṭhānehi samuṭṭhāti? Kuladūsakassa bhikkhuno yāvatatiyaṁ samanubhāsanāya na paṭinissajjantassa saṁghādiseso ekena samuṭṭhānena samuṭṭhāti— kāyato ca vācato ca cittato ca samuṭṭhāti. (13)
2219 Terasa saṁghādisesā niṭṭhitā.