Kathinabheda
Palibodhapañhābyākaraṇa
415. 1917 Pakkamanantiko kathinuddhāro,
Vutto ādiccabandhunā;
Etañca tāhaṁ pucchāmi,
Katamo palibodho paṭhamaṁ chijjati.
1918 Pakkamanantiko kathinuddhāro,
Vutto ādiccabandhunā;
Etañca tāhaṁ vissajjissaṁ,
Cīvarapalibodho paṭhamaṁ chijjati;
Tassa saha bahisīmagamanā,
Āvāsapalibodho chijjati. (1)
1919 Niṭṭhānantiko kathinuddhāro,
Vutto ādiccabandhunā;
Etañca tāhaṁ pucchāmi,
Katamo palibodho paṭhamaṁ chijjati.
1920 Niṭṭhānantiko kathinuddhāro,
Vutto ādiccabandhunā;
Etañca tāhaṁ vissajjissaṁ,
Āvāsapalibodho paṭhamaṁ chijjati;
Cīvare niṭṭhite cīvarapalibodho chijjati. (2)
1921 Sanniṭṭhānantiko kathinuddhāro,
Vutto ādiccabandhunā;
Etañca tāhaṁ pucchāmi,
Katamo palibodho paṭhamaṁ chijjati.
1922 Sanniṭṭhānantiko kathinuddhāro,
Vutto ādiccabandhunā;
Etañca tāhaṁ vissajjissaṁ,
Dve palibodhā apubbaṁ acarimaṁ chijjanti. (3)
1923 Nāsanantiko kathinuddhāro,
Vutto ādiccabandhunā;
Etañca tāhaṁ pucchāmi,
Katamo palibodho paṭhamaṁ chijjati.
1924 Nāsanantiko kathinuddhāro,
Vutto ādiccabandhunā;
Etañca tāhaṁ vissajjissaṁ,
Āvāsapalibodho paṭhamaṁ chijjati;
Cīvare naṭṭhe cīvarapalibodho chijjati. (4)
1925 Savanantiko kathinuddhāro,
Vutto ādiccabandhunā;
Etañca tāhaṁ pucchāmi,
Katamo palibodho paṭhamaṁ chijjati.
1926 Savanantiko kathinuddhāro,
Vutto ādiccabandhunā;
Etañca tāhaṁ vissajjissaṁ,
Cīvarapalibodho paṭhamaṁ chijjati;
Tassa saha savanena,
Āvāsapalibodho chijjati. (5)
1927 Āsāvacchediko kathinuddhāro,
Vutto ādiccabandhunā;
Etañca tāhaṁ pucchāmi,
Katamo palibodho paṭhamaṁ chijjati.
1928 Āsāvacchediko kathinuddhāro,
Vutto ādiccabandhunā;
Etañca tāhaṁ vissajjissaṁ,
Āvāsapalibodho paṭhamaṁ chijjati;
Cīvarāsāya upacchinnāya cīvarapalibodho chijjati. (6)
1929 Sīmātikkamanantiko kathinuddhāro,
Vutto ādiccabandhunā;
Etañca tāhaṁ pucchāmi,
Katamo palibodho paṭhamaṁ chijjati.
1930 Sīmātikkamanantiko kathinuddhāro,
Vutto ādiccabandhunā;
Etañca tāhaṁ vissajjissaṁ,
Cīvarapalibodho paṭhamaṁ chijjati;
Tassa bahisīme[324] āvāsapalibodho chijjati. (7)
1931 Sahubbhāro kathinuddhāro,
Vutto ādiccabandhunā;
Etañca tāhaṁ pucchāmi,
Katamo palibodho paṭhamaṁ chijjati. [325]
1932 Sahubbhāro kathinuddhāro,
Vutto ādiccabandhunā;
Etañca tāhaṁ vissajjissaṁ,
Dve palibodhā apubbaṁ acarimaṁ chijjantīti. (8)
416. 1933 Kati kathinuddhārā saṁghādhīnā? Kati kathinuddhārā puggalādhīnā? Kati kathinuddhārā neva saṁghādhīnā na puggalādhīnā? Eko kathinuddhāro saṁghādhīno— antarubbhāro. Cattāro kathinuddhārā puggalādhīnā— pakkamanantiko, niṭṭhānantiko, sanniṭṭhānantiko, sīmātikkamanantiko. Cattāro kathinuddhārā neva saṁghādhīnā na puggalādhīnā— nāsanantiko, savanantiko, āsāvacchediko, sahubbhāro. Kati kathinuddhārā antosīmāya uddhariyyanti? Kati kathinuddhārā bahisīmāya uddhariyyanti? Kati kathinuddhārā siyā antosīmāya uddhariyyanti siyā bahisīmāya uddhariyyanti? Dve kathinuddhārā antosīmāya uddhariyyanti— antarubbhāro, sahubbhāro. Tayo kathinuddhārā bahisīmāya uddhariyyanti— pakkamanantiko, savanantiko, sīmātikkamanantiko. Cattāro kathinuddhārā siyā antosīmāya uddhariyyanti siyā bahisīmāya uddhariyyanti— niṭṭhānantiko, sanniṭṭhānantiko, nāsanantiko, āsāvacchediko.
1934 Kati kathinuddhārā[326] ekuppādā ekanirodhā? Kati kathinuddhārā ekuppādā nānānirodhā? Dve kathinuddhārā ekuppādā ekanirodhā— antarubbhāro, sahubbhāro. Avasesā kathinuddhārā ekuppādā nānānirodhāti.
1935 Kathinabhedo[327] niṭṭhito.
1936
1937 Kassa kinti pannarasa,
dhammā nidānahetu ca;
Paccayasaṅgahamūlā,
ādi ca atthārapuggalā[328].
1938 Tiṇṇaṁ tayo jānitabbaṁ,
atthāraṁ uddesena ca;
Palibodhādhinā sīmāya,
uppādanirodhena cāti[330]. [329]
- bahisīme: bahisīmagatassa (sī, syā1-3, pā1) (Word Variant) ↩
- Sahubbhāro: saubbhāro (ka-ma) (Word Variant) ↩
- kathinuddhārā: kaṭhinuddhārā (sī, syā1-3, pā1) (Word Variant) ↩
- Kathinabhedo: kaṭhinabhedo (sī, pā1), kaṭhinabhedaṁ (syā1-3) (Word Variant) ↩
- atthārapuggalā: aṭṭhārapuggalā (ka-sī, pā1), aṭṭhapuggalabhedā (syā1-3) (Word Variant) ↩
- Tiṇṇaṁ: bhedā tiṇṇaṁ (sī, pā1), bhedato tiṇṇaṁ (ka-ma) (Word Variant) ↩
- cāti: ito paraṁ "parivāraṁ niṭṭhitaṁ" itipāṭho kesuci potthakesu (Word Variant) ↩