Kathinabheda
Kathinaatthatādi
403. 1880 Kassa kathinaṁ[317] anatthataṁ? Kassa kathinaṁ atthataṁ? Kinti kathinaṁ anatthataṁ? Kinti kathinaṁ atthataṁ?
1881 Kassa kathinaṁ anatthatanti? Dvinnaṁ puggalānaṁ anatthataṁ hoti kathinaṁ— anatthārakassa ca ananumodakassa ca. Imesaṁ dvinnaṁ puggalānaṁ anatthataṁ hoti kathinaṁ.
1882 Kassa kathinaṁ atthatanti? Dvinnaṁ puggalānaṁ atthataṁ hoti kathinaṁ— atthārakassa ca anumodakassa ca. Imesaṁ dvinnaṁ puggalānaṁ atthataṁ hoti kathinaṁ.
1883 Kinti kathinaṁ anatthatanti? Catuvīsatiyā ākārehi anatthataṁ hoti kathinaṁ, na ullikhitamattena atthataṁ hoti kathinaṁ, na dhovanamattena atthataṁ hoti kathinaṁ, na cīvaravicāraṇamattena atthataṁ hoti kathinaṁ, na chedanamattena atthataṁ hoti kathinaṁ, na bandhanamattena atthataṁ hoti kathinaṁ, na ovaṭṭiyakaraṇamattena[318] atthataṁ hoti kathinaṁ, na kaṇḍusakaraṇamattena[319] atthataṁ hoti kathinaṁ, na daḷhīkammakaraṇamattena atthataṁ hoti kathinaṁ, na anuvātakaraṇamattena atthataṁ hoti kathinaṁ, na paribhaṇḍakaraṇamattena atthataṁ hoti kathinaṁ, na ovaddheyyakaraṇamattena[320] atthataṁ hoti kathinaṁ, na kambalamaddanamattena atthataṁ hoti kathinaṁ, na nimittakatena atthataṁ hoti kathinaṁ, na parikathākatena atthataṁ hoti kathinaṁ, na kukkukatena atthataṁ hoti kathinaṁ, na sannidhikatena atthataṁ hoti kathinaṁ, na nissaggiyena atthataṁ hoti kathinaṁ, na akappakatena atthataṁ hoti kathinaṁ, na aññatra saṅghāṭiyā atthataṁ hoti kathinaṁ, na aññatra uttarāsaṅgena atthataṁ hoti kathinaṁ, na aññatra antaravāsakena atthataṁ hoti kathinaṁ, na aññatra pañcakena vā atirekapañcakena vā tadaheva sañchinnena samaṇḍalīkatena atthataṁ hoti kathinaṁ, na aññatra puggalassa atthārā atthataṁ hoti kathinaṁ, sammā ce atthataṁ hoti kathinaṁ, tañce nissīmaṭṭho anumodati. Evampi anatthataṁ hoti kathinaṁ.
1884 Nimittakammaṁ nāma nimittaṁ karoti— “iminā dussena kathinaṁ attharissāmī”ti. Parikathā nāma parikathaṁ karoti— “imāya parikathāya kathinadussaṁ nibbattessāmī”ti. Kukkukataṁ nāma anādiyadānaṁ vuccati. Sannidhi nāma dve sannidhiyo— karaṇasannidhi vā nicayasannidhi vā. Nissaggiyaṁ nāma kayiramāne aruṇaṁ uṭṭhahati[321]. Imehi catuvīsatiyā ākārehi anatthataṁ hoti kathinaṁ.
1885 Kinti kathinaṁ atthatanti? Sattarasahi ākārehi atthataṁ hoti kathinaṁ. Ahatena atthataṁ hoti kathinaṁ, ahatakappena atthataṁ hoti kathinaṁ, pilotikāya atthataṁ hoti kathinaṁ, paṁsukūlena atthataṁ hoti kathinaṁ, pāpaṇikena atthataṁ hoti kathinaṁ, animittakatena atthataṁ hoti kathinaṁ, aparikathākatena atthataṁ hoti kathinaṁ, akukkukatena atthataṁ hoti kathinaṁ, asannidhikatena atthataṁ hoti kathinaṁ, anissaggiyena atthataṁ hoti kathinaṁ, kappakatena atthataṁ hoti kathinaṁ, saṅghāṭiyā atthataṁ hoti kathinaṁ, uttarāsaṅgena atthataṁ hoti kathinaṁ, antaravāsakena atthataṁ hoti kathinaṁ, pañcakena vā atirekapañcakena vā tadaheva sañchinnena samaṇḍalīkatena atthataṁ hoti kathinaṁ, puggalassa atthārā atthataṁ hoti kathinaṁ, sammā ce atthataṁ hoti kathinaṁ, tañce sīmaṭṭho anumodati, evampi atthataṁ hoti kathinaṁ. Imehi sattarasahi ākārehi atthataṁ hoti kathinaṁ.
1886 Saha kathinassa atthārā kati dhammā jāyanti? Saha kathinassa atthārā pannarasa dhammā jāyanti— aṭṭha mātikā, dve palibodhā, pañcānisaṁsā. Saha kathinassa atthārā ime pannarasa dhammā jāyanti.
- kathinaṁ: kaṭhinaṁ (sī, syā1-3, pā1) (Word Variant) ↩
- ovaṭṭiyakaraṇamattena: ovattikaraṇa ... (sī), ovaṭṭikaraṇa ... (syā1-3) (Word Variant) ↩
- kaṇḍusakaraṇamattena: na kaṇḍūsakaraṇamattena (syā1-3), na gaṇḍusakaraṇamattena (ka-ma) (Word Variant) ↩
- ovaddheyyakaraṇamattena: na ovaṭṭeyyakaraṇamattena (sī, syā1-3), na ovadeyyakaraṇamattena (ka-ma) (Word Variant) ↩
- uṭṭhahati: udriyati (sī, syā1-3, pā1) (Word Variant) ↩