11.4 Adhikaraṇapaccayāpatti

Adhikaraṇabheda

Adhikaraṇapaccayāpatti

344. 1718 Vivādādhikaraṇaṁ āpattānāpattīti? Vivādādhikaraṇaṁ na āpatti. Kiṁ pana vivādādhikaraṇapaccayā āpattiṁ āpajjeyyāti? Āma, vivādādhikaraṇapaccayā āpattiṁ āpajjeyya. Vivādādhikaraṇapaccayā kati āpattiyo āpajjati? Vivādādhikaraṇapaccayā dve āpattiyo āpajjati. Upasampannaṁ omasati, āpatti pācittiyassa; anupasampannaṁ omasati, āpatti dukkaṭassa— vivādādhikaraṇapaccayā imā dve āpattiyo āpajjati.

1719 Tā āpattiyo catunnaṁ vipattīnaṁ kati vipattiyo bhajanti? Catunnaṁ adhikaraṇānaṁ katamaṁ adhikaraṇaṁ? Sattannaṁ āpattikkhandhānaṁ katihi āpattikkhandhehi saṅgahitā? Channaṁ āpattisamuṭṭhānānaṁ katihi samuṭṭhānehi samuṭṭhanti? Katihi adhikaraṇehi, katisu ṭhānesu, katihi samathehi sammanti?

1720 Tā āpattiyo catunnaṁ vipattīnaṁ ekaṁ vipattiṁ bhajanti— ācāravipattiṁ. Catunnaṁ adhikaraṇānaṁ, āpattādhikaraṇaṁ. Sattannaṁ āpattikkhandhānaṁ dvīhi āpattikkhandhehi saṅgahitā— siyā pācittiyāpattikkhandhena, siyā dukkaṭāpattikkhandhena. Channaṁ āpattisamuṭṭhānānaṁ tīhi samuṭṭhānehi samuṭṭhanti. Ekena adhikaraṇena— kiccādhikaraṇena; tīsu ṭhānesu— saṁghamajjhe, gaṇamajjhe, puggalassa santike; tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.

345. 1721 Anuvādādhikaraṇaṁ āpattānāpattīti? Anuvādādhikaraṇaṁ na āpatti. Kiṁ pana anuvādādhikaraṇapaccayā āpattiṁ āpajjeyyāti? Āma, anuvādādhikaraṇapaccayā āpattiṁ āpajjeyya. Anuvādādhikaraṇapaccayā, kati āpattiyo āpajjati? Anuvādādhikaraṇapaccayā tisso āpattiyo āpajjati. Bhikkhuṁ amūlakena pārājikena dhammena anuddhaṁseti, āpatti saṁghādisesassa; amūlakena saṁghādisesena anuddhaṁseti, āpatti pācittiyassa; amūlikāya ācāravipattiyā anuddhaṁseti, āpatti dukkaṭassa— anuvādādhikaraṇapaccayā imā tisso āpattiyo āpajjati.

1722 Tā āpattiyo catunnaṁ vipattīnaṁ kati vipattiyo bhajanti? Catunnaṁ adhikaraṇānaṁ katamaṁ adhikaraṇaṁ? Sattannaṁ āpattikkhandhānaṁ katihi āpattikkhandhehi saṅgahitā? Channaṁ āpattisamuṭṭhānānaṁ katihi samuṭṭhānehi samuṭṭhanti? Katihi adhikaraṇehi, katisu ṭhānesu, katihi samathehi sammanti?

1723 Tā āpattiyo catunnaṁ vipattīnaṁ dve vipattiyo bhajanti— siyā sīlavipattiṁ, siyā ācāravipattiṁ. Catunnaṁ adhikaraṇānaṁ, āpattādhikaraṇaṁ. Sattannaṁ āpattikkhandhānaṁ tīhi āpattikkhandhehi saṅgahitā— siyā saṁghādisesāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṁ āpattisamuṭṭhānānaṁ tīhi samuṭṭhānehi samuṭṭhanti. Yā tā āpattiyo garukā tā āpattiyo ekena adhikaraṇena— kiccādhikaraṇena; ekamhi ṭhāne— saṁghamajjhe; dvīhi samathehi sammanti— sammukhāvinayena ca paṭiññātakaraṇena ca. Yā tā āpattiyo lahukā tā āpattiyo ekena adhikaraṇena— kiccādhikaraṇena; tīsu ṭhānesu— saṁghamajjhe gaṇamajjhe puggalassa santike; tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.

346. 1724 Āpattādhikaraṇaṁ āpattānāpattīti? Āpattādhikaraṇaṁ āpatti. Kiṁ pana āpattādhikaraṇapaccayā āpattiṁ āpajjeyyāti? Āma, āpattādhikaraṇapaccayā āpattiṁ āpajjeyya. Āpattādhikaraṇapaccayā kati āpattiyo āpajjati? Āpattādhikaraṇapaccayā catasso āpattiyo āpajjati. Bhikkhunī jānaṁ pārājikaṁ dhammaṁ^[284] paṭicchādeti, āpatti pārājikassa; vematikā paṭicchādeti, āpatti thullaccayassa; bhikkhu saṁghādisesaṁ paṭicchādeti, āpatti pācittiyassa; ācāravipattiṁ paṭicchādeti, āpatti dukkaṭassa— āpattādhikaraṇapaccayā imā catasso āpattiyo āpajjati.

1725 Tā āpattiyo catunnaṁ vipattīnaṁ kati vipattiyo bhajanti? Catunnaṁ adhikaraṇānaṁ katamaṁ adhikaraṇaṁ? Sattannaṁ āpattikkhandhānaṁ katihi āpattikkhandhehi saṅgahitā? Channaṁ āpattisamuṭṭhānānaṁ katihi samuṭṭhānehi samuṭṭhanti? Katihi adhikaraṇehi, katisu ṭhānesu, katihi samathehi sammanti?

1726 Tā āpattiyo catunnaṁ vipattīnaṁ dve vipattiyo bhajanti— siyā sīlavipattiṁ siyā ācāravipattiṁ. Catunnaṁ adhikaraṇānaṁ— āpattādhikaraṇaṁ. Sattannaṁ āpattikkhandhānaṁ catūhi āpattikkhandhehi saṅgahitā— siyā pārājikāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṁ āpattisamuṭṭhānānaṁ ekena samuṭṭhānena samuṭṭhanti— kāyato ca vācato ca cittato ca samuṭṭhanti. Yā sā āpatti anavasesā sā āpatti na katamena adhikaraṇena, na katamamhi ṭhāne, na katamena samathena sammati. Yā tā āpattiyo lahukā tā āpattiyo ekena adhikaraṇena— kiccādhikaraṇena; tīsu ṭhānesu— saṁghamajjhe, gaṇamajjhe, puggalassa santike; tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.

347. 1727 Kiccādhikaraṇaṁ āpattānāpattīti? Kiccādhikaraṇaṁ na āpatti. Kiṁ pana kiccādhikaraṇapaccayā āpattiṁ āpajjeyyāti? Āma, kiccādhikaraṇapaccayā āpattiṁ āpajjeyya. Kiccādhikaraṇapaccayā kati āpattiyo āpajjati? Kiccādhikaraṇapaccayā pañca āpattiyo āpajjati. Ukkhittānuvattikā bhikkhunī yāvatatiyaṁ samanubhāsanāya na paṭinissajjati, ñattiyā dukkaṭaṁ; dvīhi kammavācāhi thullaccayā; kammavācāpariyosāne āpatti pārājikassa; bhedakānuvattakā bhikkhū yāvatatiyaṁ samanubhāsanāya na paṭinissajjanti, āpatti saṁghādisesassa; pāpikāya diṭṭhiyā yāvatatiyaṁ samanubhāsanāya na paṭinissajjanti, āpatti pācittiyassa— kiccādhikaraṇapaccayā imā pañca āpattiyo āpajjati.

1728 Tā āpattiyo catunnaṁ vipattīnaṁ kati vipattiyo bhajanti? Catunnaṁ adhikaraṇānaṁ katamaṁ adhikaraṇaṁ? Sattannaṁ āpattikkhandhānaṁ katihi āpattikkhandhehi saṅgahitā? Channaṁ āpattisamuṭṭhānānaṁ katihi samuṭṭhānehi samuṭṭhanti? Katihi adhikaraṇehi, katisu ṭhānesu, katihi samathehi sammanti?

1729 Tā āpattiyo catunnaṁ vipattīnaṁ dve vipattiyo bhajanti— siyā sīlavipattiṁ siyā ācāravipattiṁ. Catunnaṁ adhikaraṇānaṁ— āpattādhikaraṇaṁ. Sattannaṁ āpattikkhandhānaṁ pañcahi āpattikkhandhehi saṅgahitā— siyā pārājikāpattikkhandhena, siyā saṁghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena. Channaṁ āpattisamuṭṭhānānaṁ ekena samuṭṭhānena samuṭṭhanti— kāyato ca vācato ca cittato ca samuṭṭhanti. Yā sā āpatti anavasesā sā āpatti na katamena adhikaraṇena, na katamamhi ṭhāne, na katamena samathena sammati. Yā sā āpatti garukā sā āpatti ekena adhikaraṇena— kiccādhikaraṇena; ekamhi ṭhāne— saṁghamajjhe; dvīhi samathehi sammati— sammukhāvinayena ca paṭiññātakaraṇena ca. Yā tā āpattiyo lahukā tā āpattiyo ekena adhikaraṇena— kiccādhikaraṇena; tīsu ṭhānesu— saṁghamajjhe, gaṇamajjhe, puggalassa santike; tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca.